អ្នករាយការណ៍អង្គការសហប្រជាជាតិចោទកូរ៉េខាងជើងពីបទឧក្រិដ្ឋកម្មប្រឆាំងមនុស្សជាតិ
នៅថ្ងៃចន្ទម្សិលមិញនេះ លោក Marzuki Darusman ដែលជាអ្នករាយការណ៍របស់អង្គការសហប្រជាជាតិ បានចោទប្រទេសកូរ៉េខាងជើង ថាបានបង្កនូវបទឧក្រិដ្ឋកម្មលើមនុស្សជាតិ។ លោក Marzuki Darusman បានលើកឡើងនូវការចោទប្រកាន់ចំនួន៩ចំនុចសំខាន់ៗ មានដូចជា ការរំលោភសិទ្ធិមនុស្ស ការឃុំឃាំងមនុស្ស ការបង្អត់អាហារប្រជាជន ការហាមឃាត់មិនអោយបញ្ចេញយោបល់ជាដើម។ ក្រុងព្យុងយ៉ាងបានបដិសេធនូវការចោទប្រកាន់នេះ ដោយវាយបកទៅវិញថា លោក Marzuki Darusman គឺនៅក្នុងក្រុមតែមួយជាមួយនឹងជប៉ុន សហរដ្ឋអាមេរិក និងសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
នៅចំពោះមុខក្រុមប្រឹក្សាសិទ្ធិមនុស្ស នៅក្នុងវេទិកាអង្គការសហប្រជាជាតិ នៅក្រុងហ្សឺណែវ កាលពីថ្ងៃចន្ទម្សិលមិញ លោក Marzuki Darusman អតីតប្រមុខការទូតឥណ្ឌូនេស៊ី និងជាអ្នករាយការណ៍របស់អង្គការសហប្រជាជាតិ បានចោទប្រទេសកូរ៉េខាងជើង ថាបានបង្កនូវឧក្រិដ្ឋកម្មប្រឆាំងមនុស្សជាតិ។
របាយការណ៍ចោទប្រកាន់របស់លោក Darusman បានលើកឡើងនូវបទឧក្រិដ្ឋ៩ចំនុចសំខាន់ៗ ក្នុងនោះមានដូចជា ការរំលោភសិទ្ធិមនុស្ស ការឃុំឃាំងមនុស្ស ការបង្អត់អាហារប្រជាជន ការធ្វើទារុណកម្មមនុស្ស ការហាមឃាត់មិនអោយបញ្ចេញមតិយោបល់ ព្រមទាំងការបាត់ខ្លួនរបស់ប្រជាជនជាច្រើននាក់ទៀតផង។ អ្នករាយការណ៍របស់អង្គការសហប្រជាជាតិរូបនេះ បានទាមទារអោយបង្កើតនូវគណកម្មការស៊ើបអង្កេតសិទ្ធិមនុស្សអន្តរជាតិមួយ នៅប្រទេសកូរ៉េខាងជើង។
ក្រុងព្យុងយ៉ាងបានបដិសេធនូវការចោទប្រកាន់របស់លោក Darusman ដោយវាយបកទៅវិញថា លោក Marzuki Darusman ស្ថិតនៅក្នុងក្រុមតែមួយជាមួយនឹងប្រទេសជប៉ុន សហរដ្ឋអាមេរិក និងសហភាពអឺរ៉ុប។ លោក Kum Ju Song អ្នកនាំពាក្យកូរ៉េខាងជើងបានឆ្លើយបដិសេធយ៉ាងសង្ហាទៅនឹងការចោទប្រកាន់នេះវិញថា « គ្មានការរំលោភសិទ្ធិមនុស្សកើតឡើងនៅកូរ៉េខាងជើង ដូចជាការដែលបានចោទប្រកាន់នៅក្នុងរបាយការណ៍នោះទេ។ រដ្ឋាភិបាលសាធារណរដ្ឋកូរ៉េនឹងបន្តការពារសិទ្ធិ និងសេរីភាពរបស់ប្រជាជនខ្លួនតទៅទៀត»។
ដោយឡែក ប្រទេសចិនដែលជាមិត្តជិតស្និទ្ធរបស់កូរ៉េខាងជើង បានលើកឡើងថាការបង្កើតគណកម្មការស៊ើបអង្កេតសិទ្ធិមនុស្សអន្តរជាតិ នៅក្នុងប្រទេសនេះ អាចនឹងធ្វើអោយស្ថានការណ៍នៅទ្វីបកូរ៉េ កាន់តែតានតឹងថែមទៀត។
ប្រទេសគុយបា និងវេណេហ្ស៊ុយអេឡា បានរិះគន់នូវគំរោងចង់បង្កើតគណកម្មការស៊ើបអង្កេតសិទ្ធិមនុស្សអន្តរជាតិនេះ។ ប្រទេសទាំងពីរបានសំណូមពរអោយសំរេចនូវដំណោះស្រាយតាមរយៈការចរចារ ជាជាងការបរិហារទៅលើក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ