តុលាការម៉ូស្គូវិនិច្ឆ័យលើបណ្តឹងឧទ្ធរណ៍នារី៣នាក់នៃក្រុមចម្រៀង Pussy Riot
សំណុំរឿងនារី៣នាក់នេះ ដែលកាលពី២ខែមុន ត្រូវបានតុលាការកាត់ទោសឲ្យជាប់ក្នុងជំរំពលកម្ម ម្នាក់ៗរយៈពេល២ឆ្នាំ បានញ៉ាំងឲ្យមានប្រតិកម្មជួយឈឺឆ្អាលពីខាងឥស្សរជនសិល្បៈជាតិ និងអន្តរជាតិដ៏ល្បីៗនៅក្នុងលោក។ ទោសរបស់គេ គឺគ្រាន់តែគេបានប្រព្រឹត្ត “អំពើយូកូម” ដែលថា ប្រមាថលើមនោសញ្ចេតនាអ្នកកាន់សាសនានៅរុស្ស៊ី ដោយកាលពីខែកុម្ភៈ គេបានចូលទៅឡក និងច្រៀងក្នុងវិហារគ្រិស្តសាសនាអ័រថូដុក្សដ៏ធំបំផុត។
ចុះផ្សាយនៅថ្ងៃ៖
ស្តាប់ - ០២:១១
តាមពិត អង្គសវនាការពិនិត្យមើលបណ្តឹងឧទ្ធរណ៍នេះ បានបើកធ្វើម្តងទៅហើយ កាលពីថ្ងៃទី១ តុលា។ ប៉ុន្តែកាលណោះ ពីក្នុងចំណោមនារី៣នាក់នោះ មានម្នាក់ស្រាប់តែបានធ្វើសេចក្តីថ្លែងការណ៍នាំឲ្យគេភ្ញាក់ផ្អើល គឺថាសុំឲ្យផ្លាស់ប្តូរមេធាវីរបស់ខ្លួន ហេតុដែលជំរុញចៅក្រមប្រធានតុលាការឲ្យលើកអង្គជំនុំជម្រះ មកធ្វើថ្ងៃទី១០ តុលានេះវិញ ទម្រាំរកបានមេធាវីថ្មីមកជំនួសឲ្យបានត្រូវនឹងបំណងរបស់សាមីជន។ អ្វីដែលក្រុមមេធាវីការពារនារីទាំង៣នាក់នោះចង់បាន គឺឲ្យតុលាការពិនិត្យសើរើឡើងវិញ ទោស២ឆ្នាំនោះ ពីព្រោះតាមយោបល់គេ ការកាត់ទោសនោះមិនឈរលើសត្យានុម័តទេ ហើយមានលក្ខណៈនយោបាយទេតើ។ ម៉្លោះហើយបានជាគេទាមទារ ៖ ឬមួយ ឲ្យបន្ទាបទោសនោះមកនៅត្រឹមរយៈពេល ៧ខែ ដែលនារីទាំងនោះជាប់នៅក្នុងការឃុំឃាំងទៅហើយ រួចទូរទាត់ទៅ គឺត្រូវដោះលែងពួកគេឲ្យមានសេរីភាពវិញទៅ។ ឬមួយ ទុកឲ្យនៅដដែល ទោស២ឆ្នាំនោះ ប៉ុន្តែ ជាការព្យួរទោសទៅវិញ ដែលហុចលទ្ធភាពដល់សាមីខ្លួនទាំង៣នាក់ ឲ្យនៅក្រៅឃុំទៅ។
ពាក្យថា “លក្ខណៈនយោបាយ” ដែលពួកមេធាវីបានប្រើនោះ មិនមែនចៃដន្យទេ ដ្បិតនារីទាំង ៣នាក់នៃក្រុមចម្រៀង Pussy Riot ពេលសំដែងក្នុងវិហារនោះ បានបន្លឺឡើងនូវឃ្លាទាមទារពី “ ប្រមុខគ្រិស្តសាសនាអ័រថូដុក្សរុស្ស៊ី សម្តេចសង្ឃ Kirill ឲ្យជួយបណ្តេញរូបលោកពូទីនចេញពីរដ្ឋអំណាចទៅ ”។
គួរនិយាយថា លោកប្រធានាធិបតីពូទីនផ្ទាល់ ក្នុងបទអន្តរាគមន៍តាមទូរទស្សន៍កាលពី៣ថ្ងៃមុន គឺថ្ងៃទី៧ តុលា ដែលជាទិវាខួបកំណើត៦០ឆ្នាំរបស់គាត់ តបនឹងសំណូមពរអ្នកកាសែត សុំឲ្យគាត់បញ្ចេញយោបល់ជុំវិញសំណុំរឿង Pussy Riot បានថ្លែងថា “ ការកាត់ទោសចំពោះនារីទាំងនោះក្នុងកម្រិតដែលសម្រេចដោយតុលាការ គឺស័ក្តិសមនឹងទង្វើដែលពួកគេបានប្រព្រឹត្ត”។
ជាការកត់សម្គាល់ លោកនាយករដ្ឋមន្ត្រីមេដវេដេវ ពីចំណែកខ្លួន ពេលថ្មីៗ បានថ្លែងថា “ សមជាង បើកាត់ទោសនារីទាំងនោះ ឲ្យនៅក្រៅឃុំបានហើយ ”។ ឧទ្ទិសដល់អង្គសវនាការថ្ងៃនេះ ក្នុងក្រុង Varsovie យុវជនប៉ូឡូញធ្វើបាតុកម្មនៅពីមុខស្ថានទូតរុស្ស៊ី ដោយដោតផ្កាលើសួននៅទីនោះ ជាតួអក្សរធំៗថា “ សេរីភាពសម្រាប់ Pussy Riot ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ