អង្គការតម្លាភាពកម្ពុជាពិភាក្សាជាមួយសហគ្រិននិយាយពីអំពើពុករលួយ
អង្គការតម្លាភាពកម្ពុជានៅថ្ងៃទី២៦ ខែសីហានេះបានជួបជាមួយសហគ្រិនដែលមកពីសហគ្រាសធុនតូចនិងមធ្យម(SME)ដើម្បីពិភាក្សាអំពីការប្រយុទ្ធប្រឆាំងអំពើពុករលួយ។ អង្គការនេះចង់ឲ្យសហគ្រិនទាំងនោះចូលរួមបង្កើតយុទ្ធសាស្ត្រប្រឆាំងអំពើពុករលួយនៅក្នុងអាជីវកម្មរបស់ពួកគេ។ កាលពីពេលថ្មីៗនេះ អង្គភាពប្រឆាំងអំពើពុករលួយក៏បានជួបជាមួយអ្នកជំនួញក្នុងវិស័យឯកជន ដើម្បីរិះរកវិធីទប់ស្កាត់អំពើពុករលួយក្នុងមុខជំនួញនេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សហគ្រិនមកពីសហគ្រាសធុនតូចនិងមធ្យមប្រមាណ ៥០ នាក់បានមកជួបជុំគ្នាក្នុងសិក្ខាសាមួយនៅព្រឹកថ្ងៃទី ២៦ សីហានេះនៅឯសណ្ឋាគារ Green Palace ក្នុងទីក្រុងភ្នំពេញដើម្បីរិះរកវិធីទប់ស្កាត់អំពើពុករលួយក្នុងមុខជំនួញ។ ពួកគេបានជជែកពិភាក្សាអំពីការបង្កើតប្រព័ន្ធសុចរិតភាពធុរកិច្ចមួយសំដៅលុបបំបាត់ហានិភ័យនៃអំពើពុករលួយនៅក្នុងអាជីវកម្ម។
សិក្ខាសាលានេះសហការរៀបចំដោយអង្គការតម្លាភាពកម្ពុជា សមាគមសហគ្រិនវ័យក្មេង សមាគមភ្នាក់ងារបញ្ជូនទំនិញកម្ពុជា និងសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជាជាដើម។ លោក ព្រាប កុល នាយកប្រតិបត្តិអង្គការតម្លាភាពកម្ពុជា បានពន្យល់ថា ប្រទេសមួយដែលមានអំពើពុករលួយ និងការស៊ីសំណូក ធ្វើឲ្យប៉ះពាល់ធ្ងន់ធ្ងរដល់បរិយាកាសអាជីវកម្ម ហើយនេះជាបញ្ហាប្រឈមដ៏ច្រើនលើសលុប ដែលទាមទារឲ្យមានការចូលរួមទើបអាចប្រយុទ្ធប្រឆាំងអំពើពុករលួយបាន។
ក្នុងបរិបទនេះហើយដែលអង្គការតម្លាភាពកម្ពុជាអញ្ជើញអ្នកជំនួញទាំងនោះឲ្យមកជួបជុំពិភាក្សាគ្នាដើម្បីប្រយុទ្ធប្រឆាំងជាមួយផ្នត់គំនិតពុករលួយ និងស៊ីសំណូក។ បើតាមលោក ព្រាប កុល សហគ្រាសធុនតូចនិងមធ្យមមានធនធានមនុស្សនិងហិរញ្ញវត្ថុតិចតួចជាងសាជីវកម្មខ្នាតធំ។ ដូច្នេះហើយពួកគេត្រូវប្រឈមមុខនឹងបញ្ហាជាច្រើនក្នុងនោះអំពើពុករលួយជាបញ្ហាធ្ងន់ធ្ងរមួយដែលត្រូវលុបបំបាត់។
កាលពីថ្ងៃទី១៥សីហា អង្គភាពប្រឆាំងអំពើពុករលួយក៏បានជួបពិគ្រោះយោបល់ជាមួយអ្នកជំនួញក្នុងវិស័យឯកជនជាច្រើនដែរដើម្បីរិះរកវិធីបំបាត់អំពើពុករលួយក្នុងមុខជំនួញ។ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានជំរុញឲ្យអ្នកជំនួញក្នុងវិស័យឯកជនសហការជាមួយអង្គភាពប្រឆាំងអំពើពុករលួយដើម្បីលុបបំបាត់វប្បធម៌ផ្តល់លុយក្រោមតុដល់អាជ្ញាធរមានសមត្ថកិច្ចគ្រប់លំដាប់ថ្នាក់។ យ៉ាងណាក៏ដោយ គេនៅរង់ចាំមើលថា តើអំពើពុករលួយដុះស្លែនៅក្នុងពិភពអ្នកជំនួញអាចលុបបំបាត់បានដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ