នៅរុស្ស៊ីទឹកចិត្តប្រឆាំងបស្ចិមលោកកើនឡើងដល់កម្រិតខ្ពស់មិនធ្លាប់មាន
ចុះផ្សាយនៅថ្ងៃ៖
ស្តាប់ - ០៤:៤០
លទ្ធផលនៃការស្ទង់មតិចេញផ្សាយ ដើមសប្តាហ៏នេះ ដោយអង្គការសង្គមសាស្ត្រ មួយ នៅរុស្ស៊ីបង្ហាញថា អ្នកស្រុករុស្ស៊ីដល់ទៅជាង៨០% សំដែងនូវទឹកចិត្តខ្លួនប្រឆាំងនឹង បស្ចិមលោក។ តួលេខនេះ គឺខ្ពស់មិនធ្លាប់មានដូចទេបើគិតក្នុង២៥ឆ្នាំចុងក្រោយ។
ក្នុងដំណើរប្រព្រឹត្តទៅនៃការស្ទង់មតិលើកនេះ ធ្វើដោយអង្គការសង្គមសាស្ត្ររុស្ស៊ី ឈ្មោះ Levada-Center មានប្រជាពលរដ្ឋរុស្ស៊ី ដល់ទៅ៨១% ដែលបានថ្លែងអំពីឥរយាបថ អវិជ្ជមានរបស់ខ្លួន ចំពោះស.រ.អា.។ ជាការប្រៀបធៀប តួលេខបែបនេះ មួយឆ្នាំមុន គឺបានមាន កម្រិតតែ ៤៤%។ ចំណែកអ្នកស្រុក ដែលយល់ឃើញថា ទំនាក់ទំនងបច្ចុប្បន្ន រវាងរុស្ស៊ីនិងស.រ.អា ជា ទំនាក់ទំនងសត្រូវនឹងគ្នា គ្រាន់តែក្នុងមួយឆ្នាំកន្លងទៅ គឺបានកើនឡើង ១០ដង ពី ៤% ដល់ ៤២%។
ជាការកត់សម្គាល់ ទឹកចិត្តបែបនេះ កើតឡើង មិនមែនចៃដន្យទេ។ ប្រធានាធិបតីអាមេរិកាំង លោកបារ៉ាក់ អូបាម៉ា ថ្លែងហើយថ្លែងទៀតថា គឺពិតជា ស.រ.អា. ដែលនាំមុខចលនាពិភពលោក បង្ខាំងរុស្ស៊ីឲ្យនៅឯកោលើឆាកអន្តរជាតិ ដើម្បីផ្តន្ទាទោសប្រទេសនេះ ចំពោះទង្វើឈ្លានពាន ទៅលើអ៊ុយក្រែនដោយរំលោភលើច្បាប់អន្តរជាតិនិងថាគឺដោយសារនយោបាយដាក់ទណ្ឌកម្ម ទល់នឹងរុស្ស៊ីដែលនាំមុខដោយអាមេរិក បានជាតាមសម្តីលោកអូបាម៉ា សេដ្ឋកិច្ចរុស្ស៊ី ឥឡូវធ្លាក់ ក្នុងភាពដាច់ដោចទ្រុឌទ្រោម ទៅហើយ។
មិនតែប៉ុណ្ណោះ លោកអូបាម៉ា ដោយបបូរមាត់គាត់ផ្ទាល់រាប់បញ្ចូលប្រទេសរុស្ស៊ី ទៅក្នុងចង្កោមគ្រោះថ្នាក់បីដ៏ធំជាងគេក្នុងលោក គឺថា ទី១-ជម្ងឺអេបូឡា, ទី២ គឺ រុស្ស៊ី ហើយ ទី៣ គឺ អង្គការ”រដ្ឋអ៊ីស្លាម”។
ស្របនឹងការស្ទង់មតិនោះ ចំពោះសហភាពអឺរ៉ុបវិញ គឺមានអ្នកស្រុករុស្ស៊ីចំនួន៧១% ដែល សំដែងឥរិយាបថអវិជ្ជមាន។ ពីក្នុងនោះ ២៤% ចាត់ទុកទំនាក់ទំនងរវាងរុស្ស៊ីនិងសហភាពអឺរ៉ុបជាទំនាក់ទំនងសត្រូវនឹងគ្នាឬ ២៤ដងច្រើនជាងកាលពីមួយឆ្នាំមុន ដែលតួលេខបែបនេះបានមានកម្រិតតែ ១%ប៉ុណ្ណោះ។
ទាក់ទងនឹងនយោបាយសហភាពអឺរ៉ុបបច្ចុប្បន្ននេះ ចំពោះរុស្ស៊ី មជ្ឈដ្ឋាននៅម៉ូស្គូរមែង សំដែងនូវការសោកស្តាយដោយឃើញថាសហភាពនេះស្រាប់តែបាត់បង់ភាពម្ចាស់ការណ៍បណ្តោយឲ្យក្រុងវ៉ាស៊ីនតោនដឹកច្រមុះស្រេចតែចិត្ត។
ព្រមជាមួយនេះ ក្នុងដំណើរស្ទង់មតិពួកអ្នកស្រាវជ្រាវនៃអង្គការសង្គមសាស្ត្រ ក៏កត់ត្រាឃើញដែរថាមានអ្នកស្រុកដល់៤០% បានបញ្ចេញយោបល់ថា ប្រទេសរុស្ស៊ីគួរតែពង្រឹងទំនាក់ទំនងជាមួយបស្ចិមលោក។
លទ្ធផលនៃការស្ទង់មតិក៏បង្ហាញឲ្យឃើញថា ពិតជាសកម្មភាពរបស់ ស.រ.អា. និងសហភាពអឺរ៉ុបក្នុងស្ថានការណ៍នៅអ៊ុយក្រែន ដែលបានជះឥទ្ធិពលមកលើផ្នត់គំនិតគេ ឲ្យប្រឆាំងនឹងបស្ចិមលោកពីព្រោះតាមយោបល់គេគឺបស្ចិមលោកទេតើដែលត្រូវទទួលខុសត្រូវចំពោះសង្គ្រាមនៅអ៊ុយក្រែន។
ក្នុងខែកុម្ភៈនេះដែរ អង្គការសង្គមសាស្ត្ររុស្ស៊ីមួយទៀត ឈ្មោះ VSIOM បានចេញផ្សាយ លទ្ធផលនៃការស្ទង់មតិដែលថា ៖ មានអ្នកស្រុករុស្ស៊ី ចំនួន៥០%ដែលចាត់ទុកសង្គ្រាម នៅ អ៊ុយក្រែន ជាសង្គ្រាមស៊ីវិល។ ក្នុងសង្គ្រាមនេះ ស្របនឹងមតិសំដែងដោយពលរដ្ឋ រុស្ស៊ី១៧% ប្រតិបត្តិការរបស់អាជ្ញាធរក្រុងគៀវ បង្ក្រាបការបះបោរនៃតំបន់ខាងកើត មានលក្ខណៈសាហាវជាទង្វើប្រល័យពូជសាសន៍តែម្តង។ បើកាលពី៣ខែមុន មានអ្នកស្រុករុស្ស៊ីតែ១៦% យល់ថា អាចមានផ្ទុះឡើងមែន សង្គ្រាមត្រង់ៗរវាងរុស្ស៊ីនិងអ៊ុយក្រែន នោះឥឡូវមតិយល់ឃើញបែបនេះ គឺស្ទុះដល់ជិត៣០% ឫ កើនឡើងសឹង ២ដង។ ចំណែក១០% យល់ថា សង្គ្រាមរវាងរុស្ស៊ីនិងអ៊ុយក្រែនកំពុងប្រព្រឹត្តទៅហើយ។
តបនឹងសំនួរ“តើ ៥ប្រទេសណា ដែលសត្រូវនឹងរុស្ស៊ីជាងគេ?” ចម្លើយដែលមានគឺ ថា ៖
មតិ៦៩% នៅរុស្ស៊ីយល់ថាគឺ ស.រ.អា. , ៣០% យល់ថា គឺ អ៊ុយក្រែន, ២៤% យល់ថា គឺ លីទុយអានី , ២៣% យល់ថា គឺ ឡេតូនីនិង ២១% គឺ អេស្តូនី។
តបនឹងសំនួរ“ តើ៥ប្រទេសណាដែលជាមិត្តជំនិតបំផុតរបស់រុស្ស៊ី ?” ចម្លើយដែលមាន គឺដូចតទៅ ៖ មតិនៅរុស្ស៊ី ក្នុងចំនួនដល់ ៥១% យល់ថា គឺបេឡារុស ៤០% យល់ថា គឺ មហាប្រទេសចិន , ៣៧% យល់ថាគឺ ប្រទេស កាហ្សាក់ស្ថាន, ១៥% យល់ថា គឺប្រទេសអារមេនី , មតិ ១៣% យល់ថាគឺ ប្រទេសឥណ្ឌា។
នៅទីបំផុត នៅរុស្ស៊ី បច្ចុប្បន្ន គឺមានមតិ តែ ១% ដែលយល់ថា អ៊ុយក្រែន ជាមិត្តរបស់រុស្ស៊ី ដោយ ជាប់លេខចុងប៉ូចគេ។ ពិតជា រដ្ឋសភាអ៊ុយក្រែន ដែលបានចេញច្បាប់ ប្រកាសរុស្ស៊ី ជា”ប្រទេសឈ្លានពាន”។ ប៉ុន្តែ ក្រសួងការបរទេសរុស្ស៊ី ប្រតិកម្មថា មានតែក្រុមប្រឹក្សាសន្តិសុខ អ.ស.ប. ប៉ុណ្ណោះ ដែលបំពាក់ដោយសិទ្ធិចាត់ទុក រដ្ឋនេះឫនោះ ជា ប្រទេសឈ្លានពាន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ