អាមេរិកប្រកាសជួយអាស៊ានប្រឈមនឹងគ្រោះមហន្តរាយធម្មជាតិ
ជាលើកទីមួយ ដែលកោះហាវៃអាមេរិក បានទទួលធ្វើជាម្ចាស់ផ្ទះរៀបចំជំនួបប្រជុំអាស៊ាន ថ្នាក់រដ្ឋមន្ត្រីការពារជាតិ ពីថ្ងៃទី ១ ដល់ថ្ងៃទី ៣ មេសា។ នាឱកាសនោះ រដ្ឋមន្ត្រីក្រសួងការពារជាតិអាមេរិក ឆាក់ ហាហ្គែល បានប្រកាសផ្តល់ជំនួយសហការជាមួយនឹងបណ្តាប្រទេសជាសមាជិកអាស៊ានទាំងអស់ ក្នុងត្រៀមប្រយុទ្ធប្រឆាំងនឹងគ្រោះមហន្តរាយធម្មជាតិ បង្កឡើងដោយការឡើងកម្តៅ នៃភពផែនដី ដោយពង្រឹងកិច្ចសហប្រតិបត្តិការរវាងយោធានិងអង្គការសង្គ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ប្រមុខដឹកនាំមន្ទីរបញ្ចកោណ និងអ្នកទទួលខុសត្រូវជាន់ខ្ពស់ជាច្រើនរូបផ្សេងទៀត កំពុងពិភាក្សាជាមួយនឹងរដ្ឋមន្ត្រីក្រសួងការពារជាតិទាំង១០ នៃប្រទេសជាសមាជិកសមាគមអាស៊ាន នៅទី Honolulu ក្រុងដែលមានមជ្ឈមណ្ឌលស្រាវជ្រាវឧតុនិយម តាមដានរលកស៊ូណាមី និងការឡើងកម្ពស់ទឹកមហសមុទ្ទប៉ាស៊ីហ្វិក។
វិទ្យាសាស្ត្រយល់កាន់តែច្បាស់អំពីគ្រោះធម្មជាតិ និងព្យាករណ៍ថា មហន្តរាយធម្មជាតិ នឹងមានកាន់តែញឹកញយ ដូច្នេះកិច្ចសហប្រតិបត្តិការ និងទំនាក់ទំនង ក្នុងការជួយគ្នាក៏កាន់តែត្រូវពង្រឹង។ បើតាមលោករដ្ឋមន្ត្រីការពារជាតិ កិច្ចសហប្រតិបត្តិការយោធាអាស៊ានក្នុងជំនួយសង្រ្គោះមនុស្សធម៌ កើនឡើងជាលំដាប់ ប៉ុន្តែត្រូវតែបន្តបង្កើនបន្ថែមទៀត។
របាយការណ៍ស្តីពីការប្រែប្រួលអាកាសធាតុ រៀបរៀងឡើងដោយក្រុមអ្នកឯកទេសអង្គការសហប្រជាជាតិ ចេញផ្សាយនៅសប្តាហ៍នេះ បានបញ្ជាក់យ៉ាងច្បាស់ថា លក្ខខណ្ឌអាកាសធាតុ នឹងប្រែប្រួល កាចសាហាវខ្លាំងបំផ្លាញ ពិភពលោកទាំងមូល ៖ ព្យុះកំបុតត្បូង មានកាន់តែញយ ទឹកជំនន់ ភាពរាំងស្ងួត ... កាន់តែញាប់។ ហើយ ៧០%នៃគ្រោះមហន្តរាយធម្មជាតិនេះ នឹងបោកបក់លើតំបន់អាស៊ីប៉ាស៊ីហ្វិក។ ជាក់ស្តែង គ្រោះមហន្តរាយរលកយក្សស៊ូណាមី នៅឆ្នាំ២០០៤ ព្យុះកំណាចហៃយាន នៅហ្វីលីពីន ឆ្នាំ២០១៣។
ដូច្នេះ ការរៀបចំភាពជាដៃគូរឹងមាំ រវាងក្រុមយោធានិងភ្នាក់ងារមនុស្សធម៌ ស៊ីវិល ដើម្បីសម្រួលការសង្គ្រោះនិងការផ្តល់ជំនួយបន្ទាន់ ត្រូវតែពង្រឹងឱ្យបាន។ ដោយឈរលើហេតុផលនេះហើយ បានជា អាមេរិកសន្យាធ្វើការជាមួយអាស៊ាន និងគាំទ្រអ្នកក្នុងកិច្ចខិតខំប្រែងនេះ។
អាមេរិកបានខិតមកស្និទ្ធនឹងអាស៊ានច្រើន តាំងពីប៉ុន្មានឆ្នាំចុងក្រោយនេះ ដើម្បីឱ្យសមាគមនេះជួយស្វែងរកដំណោះស្រាយពហុភាគី ក្នុងជម្លោះបូរណភាពដែនដីនៅសមុទ្ទចិនខាងត្បូង។ ប្រទេសជាសមាជិកអាស៊ានមួយចំនួន ក៏ត្រូវការរិតចំណងទំនាក់ទំនងជាមួយវ៉ាស៊ីនតោនដែរ ដើម្បីប្រឈមនឹងចិន ដែលស្ទុះឡើងខ្លាំងផ្នែកអំណាចយោធា និងដែលបង្ហាញមហិច្ឆតាចង់គ្រប់គ្រងសមុទ្ទម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ