អាមេរិកសម្តែងការសោកស្តាយចំពោះការដោះលែងពួកឧទ្ទាមតាលីបង់សង្ស័យចំនួន ៦៥នាក់
នៅថ្ងៃព្រហស្បតិ៍ ទី១៣ កុម្ភៈនេះ សហរដ្ឋអាមេរិកបានសម្តែងការខកចិត្តយ៉ាងខ្លំាងចំពោះទង្វើរបស់រដ្ឋាភិបាលនៃប្រទេសអាហ្វហ្កានីស្ថានដែលបានសម្រេចដោះលែងជនសង្ស័យតាលីបង់ចំនួន ៦៥នាក់ពីពន្ធនាគារបាក្រាម (Bagram)។ ខុសពីការយល់ឃើញរបស់រដ្ឋអំណាចទីក្រុងកាប៊ូល ទីក្រុងវ៉ាស៊ីនតោនចាត់ទុកអ្នកទោសតាលីបង់សង្ស័យទំាង ៦៥នាក់នោះថា ជាការគំរាមកំហែងដល់សន្តិសុខប្រទេសអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:០៦
ទោះបីជាមានការជំទាស់យ៉ាងដាច់អហង្ការពីសហរដ្ឋអាមេរិកក៏ដោយ ក៏រដ្ឋអំណាចអាហ្វហ្កានីស្ថានបានសម្រេចដោះលែងឲ្យមានសេរីភាពវិញនូវអ្នកទោសសង្ស័យតាលីបង់ចំនួន ៦៥នាក់ចេញពីពន្ធនាគារបាក្រាម (Bagram) ក្បែរទីក្រុងកាប៊ូលនៅព្រលឹមស្រាងៗព្រឹកថ្ងៃព្រហស្បតិ៍ ទី១៣ កុម្ភៈនេះ។ ភ្លាមៗ ស្ថានទូតអាមេរិកប្រចំាប្រទេសអាហ្វហ្កានីស្ថានបានផ្សាយសេចក្តីជូនដំណឹងមួយដោយបញ្ជាក់យ៉ាងដូច្នេះថា « រដ្ឋាភិបាលអាហ្វហ្កានីស្ថានត្រូវតែទទួលខុសត្រូវនូវរាល់ផលវិបាកទំាងអស់ដែលនឹងអាចកើតចេញពីការសម្រេចចិត្តរបស់ខ្លួន។ អាមេរិកទាមទារឲ្យរដ្ឋាភិបាលទីក្រុងកាប៊ូលផ្តើមចាត់វិធានការគ្រប់បែបយ៉ាងដើម្បីធានាថា អ្នកទោសដោះលែងទំាងអស់នោះនឹងមិនបង្កអំពើភេរវកម្ម ឬក៏អំពើហិង្សាជាថ្មីទៀតឡើយ »។
សូមជម្រាបជូនថា ប្រតិកម្មព្រួយបារម្ភរបស់អាមេរិកចំពោះការដោះលែងអ្នកទោសសង្ស័យតាលីបង់ទំាង ៦៥នាក់ពីរដ្ឋាភិបាលអាហ្វហ្កានីស្ថានពេលនេះ មកពីទីក្រុងវ៉ាស៊ីនតោននៅបន្តចាត់ទុកអ្នកទោសតាលីបង់សង្ស័យទំាង ៦៥នាក់នោះថា ជាការគំរាមកំហែងដល់សន្តិសុខប្រទេសអាហ្វហ្កានីស្ថាន ក៏ដូចជាសហរដ្ឋអាមេរិក។ តែនេះមិនមែនជាការយល់ឃើញរបស់ទីក្រុងកាប៊ូលឯណា។ ទីក្រុងកាប៊ូលដែលបានបញ្ជាក់កាលពីថ្ងៃទី៩ មករាកន្លងទៅថា មានអ្នកទោសចំនួន ៧២នាក់នៅក្នុងពន្ធនាគារបាក្រាម (Bagram) ត្រូវដោះលែងឲ្យមានសេរីភាពវិញ ដោយសារតែគ្មានភស្តុតាងគ្រប់គ្រាន់ប្រឆំាងនឹងពួកគេ។ ជាថ្មីម្តងទៀត និងតាមសំណើរបស់រដ្ឋបាលអាមេរិកំាង រដ្ឋាភិបាលក្រុងកាប៊ូលបានបញ្ជាក់នៅដើមសប្តាហ៍នេះថា រដ្ឋាភិបាលធ្វើការសិក្សាយ៉ាងលំអិតលើសំណុំរឿងអ្នកទោសទំាងនោះ មុននឹងសម្រេចដោះលែងចំនួន ៦៥នាក់។
យ៉ាងណាក៏ដោយ ទីក្រុងវ៉ាស៊ីនតោនមានតែការខកចិត្តយ៉ាងខ្លំាងចំពោះកាយវិការរបស់ទីក្រុងកាប៊ូលនៅពេលនេះ។ សម្រាប់អាមេរិក អ្នកទោសដោះលែងទំាងនេះសុទ្ធសឹងជាមនុស្សគ្រោះថ្នាក់ ព្រោះពួកគេមានជាប់ពាក់ព័ន្ធដោយផ្ទាល់នឹងការវាយប្រហារសម្លាប់កម្លំាងអូតង់ ក៏ដូចជាកម្លំាងរបស់រដ្ឋាភិបាលអាហ្វហ្កានីស្ថាន។ សូមរម្លឹកជូនថា គឺទើបតែនៅក្នុងខែមីនា ឆ្នំា ២០១៣ ទេ ដែលអាមេរិកបានប្រគល់ការគ្រប់គ្រងពន្ធនាគារ បាក្រាម (Bagram) ឲ្យទៅរដ្ឋាភិបាលអាហ្វហ្កានីស្ថាន។ ការផ្ទេរការគ្រប់គ្រងដែលកាលណោះត្រូវបានលោកប្រធានាធិបតីអាហ្វហ្កានីស្ថាន Hamid Karzaï ចាត់ទុកជានិមិត្តរូបនៃការដណ្តើមបានវិញនូវអធិបតេយ្យជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ