ព្រឹត្តិការណ៍ប្រណាំងកង់៤៧០គ.ម នឹងធ្វើឡើងនៅខែមីនា
ព្រឹត្តិការណ៍ប្រណាំងទោចក្រយានចម្ងាយឆ្ងាយលើកទី៣ ឆ្នាំ ២០១៦ នឹងចាប់ផ្តើមពីថ្ងៃទី ៤ខែមីនា រហូតដល់ថ្ងៃទី ៨ខែមីនាខាងមុខ។ ជាព្រឹត្តិការណ៍ប្រណាំងកង់ ក្នុងចម្ងាយ៤៧០គីឡូម៉ែត្រ ដែលតម្រូវឲ្យអ្នកចូលរួម ត្រូវឆ្លងកាត់តាម ៥កំណាត់ផ្លូវ ក្នុងខេត្តចំនួន ៥ នៅប៉ែកបូព៌ា រួមមានកំពង់ចាម ត្បូងឃ្មុំ ព្រៃវែង ស្វាយរៀង និងខេត្តកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅព្រឹកថ្ងៃទី ៤ខែមីនា ក្រុមប្រណាំងកង់មួយក្រុម នឹងជិះកង់របស់ពួកគេ ចាកចេញពីរាជធានីភ្នំពេញ ឆ្ពោះទៅកាន់ខេត្តកំពង់ចាម រួចបន្តដំណើរទៅតាមខេត្តចំនួន ៤ផ្សេងទៀត ដើម្បីប្រកួតប្រជែងក្នុងព្រឹត្តិការណ៍ប្រណាំងកង់ចម្ងាយ ៤៧០គីឡូម៉ែត្រ ៥កំណាត់ផ្លូវ ប្រចាំឆ្នាំ ២០១៦ នៅប៉ែកបូព៌ា នៃប្រទេសកម្ពុជា។
លោកវ៉ាន់ ថន អគ្គលេខាធិការនៃសហព័ន្ធខ្មែរកីឡាទោចក្រយាន បានប្រាប់វិទ្យុបារាំងថា ការប្រណាំងនេះ នឹងចេញដំណើររាជធានីភ្នំពេញ ទៅកាន់ស្គន់ ក្នុងខេត្តកំពង់ចាម នៅថ្ងៃទី ១ ហើយបន្ទាប់មកនៅថ្ងៃទី២ នឹងចេញពីស្គន់ ទៅខេត្តត្បូងឃ្មុំ។ ថ្ងៃទី ៣ ចេញពីត្បូងឃ្មុំ ទៅខេត្តព្រៃវែង។ ថ្ងៃទី ៤ ចេញពីព្រៃវែង ទៅកាន់ខេត្តស្វាយរៀង និងថ្ងៃទី៥ ចេញពីស្វាយរៀង មកបញ្ចប់នៅតាខ្មៅ ក្នុងខេត្តកណ្តាល។ ការប្រណាំងនេះ នឹងធ្វើឡើងតែក្នុងពេលថ្ងៃតែប៉ុណ្ណោះ ដោយពេលអ្នកប្រណាំងទៅដល់ខេត្តមួយ ពួកគេត្រូវឈប់សម្រាកនៅទីនោះមួយយប់សិន រង់ចាំចេញដំណើរនៅថ្ងៃបន្ទាប់ទៀត។
ការប្រណាំងតាមកំណាត់ផ្លូវ ក្នុងខេត្តទាំង ៥នេះ នឹងត្រូវគិតជាពិន្ទុ ដើម្បីស្វែងរកអ្នកទទួលបានជ័យលាភី។ ការប្រណាំងនេះ មានការសហការរវាងក្រសួងអប់រំ យុវជន និងកីឡា មន្ត្រីជំនាញ និងក្រុមហ៊ុនឯកជនមួយចំនួនទៀត។ លោកវ៉ាន់ ថន បានបញ្ជាក់ថា អ្នកចូលរួមក្នុងព្រឹត្តិការណ៍នេះ មានចំនួន ៤០នាក់ ដោយពួកគេសុទ្ធតែជាកីឡាករអាជីព ព្រោះប្រសិនបើមិនបានហ្វឹកហាត់ទេ ពួកគេមិនអាចជិះកង់ដោយរលូនក្នុងរយៈចម្ងាយឆ្ងាយបែបនេះទេ។
ព្រឹត្តិការណ៍នេះ ត្រូវបានសហព័ន្ធខ្មែរកីឡាទោចក្រយាន អះអាងថាជាការផ្សព្វផ្សាយពីកីឡាប្រភេទនេះ ក៏ដូចជាជាផ្នែកមួយនៃការទាក់ទាញទេសចរណ៍ ទៅទស្សនាតាមបណ្តាខេត្តនានា ឲ្យកាន់តែច្រើនផងដែរ។
សូមបញ្ជាក់ថា នេះជាលើកទី៣ហើយ នៃការរៀបចំព្រឹត្តិការណ៍ប្រណាំងកង់ក្នុងរយៈចម្ងាយឆ្ងាយបែបនេះ ដោយកាលពីលើកទី១ បានធ្វើឡើង នៅតាមខេត្តជុំវិញបឹងទន្លេសាប ក្នុងចម្ងាយប្រមាណជា ៦០០គីឡូម៉ែត្រ និងលើកទី២ ធ្វើឡើងនៅតាមខេត្តប៉ែកនិរតី ក្នុងចម្ងាយប្រមាណជា ៥០០គីឡូម៉ែត្រ។ ហើយព្រឹត្តិការណ៍នេះ ត្រូវបានចាត់ទុកជាព្រឹត្តិការណ៍ប្រចាំឆ្នាំ ដោយនៅឆ្នាំក្រោយ សហព័ន្ធមានគម្រោងរៀបចំ នៅតាមបណ្តាលខេត្តជុំវិញបឹងទន្លេសាប ជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ