អ៊ីស្រាអែលនិងប៉ាឡេស្ទីន៖វប្បធម៌នៃការសងសឹកគ្នាកំពុងបន្តមានយ៉ាងគគ្រឹកគគ្រេង
ចុះផ្សាយនៅថ្ងៃ៖
ស្តាប់ - ០៥:០៥
ជាថ្មីម្តងទៀត ពំនូកភ្លើងនៅក្នុងតំបន់ដើមបូព៌ាបានចាប់ផ្តើមបញ្ចេញអណ្តាតភ្លើងយ៉ាងសន្ធោសន្ធៅ។ អស់រយៈពេលជាច្រើនថ្ងៃកន្លងមកហើយដែលក្រុមយុវវ័យប៉ាឡេស្ទីន និងក្រុមប៉ូលិសអ៊ីស្រាអែលបានប្រឈមមុខដាក់គ្នាយ៉ាងហិង្សានៅហ្សេរុយសាឡិមប៉ែកខាងកើត។ ចលនាប៉ាឡេស្ទីនហាម៉ាសដែលកំពុងកាន់កាប់តំបន់ហ្កាហ្សាបានបាញ់គ្រាប់រ៉ូកែតចូលក្នុងទឹកដីអ៊ីស្រាអែល រីឯទ័ពអ៊ីស្រាអែលក៏មិនញញើតនឹងតប ត វិញជាមួយនឹងការទម្លាក់គ្រាប់បែកលើដែនដីហ្កាហ្សាដែរ។ ឧប្បត្តិហេតុថ្មីនេះបានធ្វើឲ្យប៉ះពាល់យ៉ាងខ្លំាងដល់ដំណើរស្វែងរកសន្តិភាពរវាងអ៊ីស្រាអែល និងប៉ាឡេស្ទីនដែលផ្តួចផ្តើមដោយសហរដ្ឋអាមេរិក។
រវាងអ៊ីស្រាអែល និងប៉ាឡេស្ទីន វាមិនខុសអ្វីរវាងទឹក និងប្រេងដែលមិនអាចរលាយចូលគ្នានោះទេ។ ការផ្ទុះអំពើហិង្សារវាងអ្នកទំាងពីរដែលកំពុងរស់នៅក្បែរគ្នាសព្វថ្ងៃនេះ មិនមែនជារឿងថ្មីទេ តែជាដំណើរវិលចុះ វិលឡើងរបស់កង់ប្រវត្តិសាស្រ្តនៅក្នុងតំបន់ដើមបូព៌ា។ អំពើហិង្សារវាងអ៊ីស្រាអែល និងប៉ាឡេស្ទីនបានកើតមានជាថ្មី នៅក្រោយការស្លាប់សិស្សសាលាជនជាតិជ្វីហ្វចំនួន ៣នាក់កាលពីជាង ៣សប្តាហ៍កន្លងទៅ។ កាលពីជាង ៣សប្តាហ៍កន្លងទៅ សិស្សសាលាជនជាតិជ្វីហ្វទំាង ៣នាក់ដែលមានអាយុ ១៦ និង ១៩ឆ្នំា ត្រូវបានជនមិនស្គាល់មុខចាប់ធ្វើជាចំណាប់ខ្មំាង រួចក៏អារ ក សម្លាប់ចោលតែម្តងទៅ។ នេះហើយជាផ្កាភ្លើងដែលបានចូលទៅអុជពំនូកភ្លើងអ៊ីស្រាអែល និងប៉ាឡេស្ទីនដែលកំពុងក្តៅងំស្រាប់។
អ្វីដែលគួរឲ្យកត់សម្គាល់នោះនៅត្រង់ថា រាល់ទង្វើដែលបំផ្លិចបំផ្លាញផលប្រយោជន៍អ៊ីស្រាអែល រហូតដល់ធ្វើឲ្យមានការបាត់បង់ជីវិតជនជាតិជ្វីហ្វនោះ រដ្ឋាភិបាលអ៊ីស្រាអែលមិនដែលបានស្រាវជ្រាវស្វែងរកការពិត តាមរកជនដៃដល់នោះទេ តែបែរជាបានទម្លាក់កំហុសភ្លាមៗដាក់ប្រជាជនអារ៉ាប់ទូទៅ ពិសេសប្រជាជនប៉ាឡេស្ទីនតែម្តង។ សម្រាប់អ៊ីស្រាអែលគឺច្បាស់ណាស់ ប្រជាជនប៉ាឡេស្ទីនជាអ្នកទទួលខុសត្រូវទំាងស្រុងនៃការស្លាប់សិស្សសាលាជនជាតិជ្វីហ្វទំាង ៣នាក់កាលពី ៣សប្តាហ៍កន្លងទៅ។ តែបញ្ហានៅត្រង់ថា រហូតមកដល់ម៉ោងនេះ លោកប្រធានរដ្ឋអំណាចប៉ាឡេស្ទីនម៉ាមូដ អាបាស់បានថ្កោលទោសលើទង្វើសម្លាប់សិស្សសាលាជនជាតិជ្វីហ្វ វាលើកលែងតែចលនាប៉ាឡេស្ទីនហាម៉ាសចេញដែលបានត្រេកត្រអាលចំពោះរឿងនោះ តែបានបដិសេធពីការទទួលខុសត្រូវរបស់ខ្លួន។
វាពិតជារឿងមួយធម្មតាទេដែលរដ្ឋាភិបាលអ៊ីស្រាអែលត្រូវបញ្ចេញប្រតិកម្មប្រឆំាងនឹងទង្វើសម្លាប់ប្រជាជនខ្លួន តែអ្វីដែលអ៊ីស្រាអែលហាក់ដូចជាមិនបានគិតដល់នោះនៅត្រង់ថា ខ្លួនបាន និងកំពុងដាក់ទ័ណ្ឌកម្មលើប្រជាជនប៉ាឡេស្ទីនគ្រប់រូបដោយមិនរើសមុខ។ ចំណែកប្រជាជនអ៊ីស្រាអែលវិញក៏បាននំាគ្នាចុះផ្លូវធ្វើបាតុកម្មប្រឆំាងនឹងប្រជាជនអារ៉ាប់ទូទៅដែរ ពិសេសប្រជាជនប៉ាឡេស្ទីនតែម្តង។ បាតុករអ៊ីស្រាអែលបានអំពាវនាវឲ្យមានការសងសឹកសម្លាប់ពួកអារ៉ាប់ដោយមិនរើសមុខ។ ការអំពាវនាវរបៀបនេះក៏គេឃើញមាននៅក្នុងបណ្តាញសង្គមដែរ។ ជារៀងរាល់ថ្ងៃមកទល់ថ្ងៃនេះ អំពើហិង្សាកំពុងបន្តមានជាប្រចំារវាងក្រុមយុវវ័យប៉ាឡេស្ទីន និងកម្លំាងប៉ូលិសអ៊ីស្រាអែលនៅហ្សេរុយសាឡិមខាងលិច។ បន្តិចម្តងៗ រូបភាពនៃការសងសឹកគ្នាបាន និងកំពុងលេចឡើងកាន់តែច្បាស់រវាងអ៊ីស្រាអែល និងប៉ាឡេស្ទីន។ ថ្មីៗនេះ ក្មេងប្រុសជនជាតិប៉ាឡេស្ទីនម្នាក់ត្រូវបានគេរកឃើញស្លាប់ដោយអារ កដូចករណីការស្លាប់របស់សិស្សសាលាជនជាតិជ្វីហ្វ ៣នាក់ដែរ។
តើរូបភាពទំាងអស់នេះ មិនមែនជាចំណុចចាប់ផ្តើមនៃការប្រកាសសង្រ្គាមចោលដុំថ្ម Intifada ជាលើកទី៣នៅក្នុងតំបន់ដើមបូព៌ាទេ ឬយ៉ាងណា?
ក្នុងរយៈពេលមួយសប្តាហ៍កន្លងទៅ កងទ័ពអ៊ីស្រាអែលបានធ្វើការបិទច្រកចេញ ចូលស្រុកហេប្រុងក្នុងទឹកដីប៉ាឡេស្ទីនស៊ីហ្ស៊កដានី ព្រមទំាងបើកការវាយប្រហារតាមផ្លូវអាកាសលើលំនៅដ្ឋានប្រជាជនប៉ាឡេស្ទីន និងចូលឆែកឆេរតាមរកជនដៃដល់ដែលសម្លាប់សិស្សសាលាជនជាតិជ្វីហ្វ។ មានស្លាប់ជនជាតិប៉ាឡេស្ទីនជាច្រើននាក់ និងមានជនសង្ស័យបាឡេស្ទីនជាង ៤០០នាក់ត្រូវបានចាប់ខ្លួន។ ទន្ទឹមគ្នានេះ រដ្ឋាភិបាលអ៊ីស្រាអែលក៏បានផ្តើមពង្រឹងកម្លំាងទ័ពរបស់ខ្លួននៅប៉ែកខាងត្បូងជាប់នឹងតំបន់ប៉ាឡេស្ទីនហ្កាហ្សាដែលគ្រប់គ្រងដោយចលនាហាម៉ាស់។ ចលនាដែលអ៊ីស្រាអែលចាត់ទុកជាចលនាភេរវនិយម និងដែលក្រុមគណបក្សប្រឆំាងនៅអ៊ីស្រាអែលបានអំពាវនាវឲ្យរដ្ឋាភិបាលរបស់លោកនាយករដ្ឋមន្រ្តីនេតាន់យ៉ាហ៊ូប្រើកម្លំាងទ័ពវាយកំចាត់ឲ្យដល់ឫសគល់។
គេនៅមិនទាន់ដឹងទេថា តើស្ថានការណ៍ថ្មីរវាងអ៊ីស្រាអែល និងប៉ាឡេស្ទីននឹងវិវត្តន៍ទៅយ៉ាងណានោះ។ អ្វីដែលគេដឹងគឺថា ឧប្បត្តិហេតុថ្មីនេះបានកើតមានឡើង ចំពេលដែលកិច្ចចរចាស្វែងរកសន្តិភាពរវាងអ៊ីស្រាអែល និងប៉ាឡេស្ទីនកំពុងបន្តជាប់គំាង ពិសេសកិច្ចចរចារយៈពេល ៩ខែចុងក្រោយដែលផ្តួចផ្តើមឡើងដោយសហរដ្ឋអាមេរិក។ ក្នុងរយៈពេល ៩ខែកន្លងទៅនេះ លោករដ្ឋមន្រ្តីការបរទេសអាមេរិកចន ឃ៊ែរីបានធ្វើដំណើរ ចេញ ចូលតំបន់ដើមបូព៌ា ពីទឹកដីអ៊ីស្រាអែលឆ្លងចូលទឹកដីប៉ាឡេស្ទីន និងពីប៉ាឡេស្ទីនឆ្លងចូលអ៊ីស្រាអែលជាច្រើនដង។ កម្មវត្ថុរបស់លោកចន ឃ៊ែរី គឺស្វែងរកកិច្ចព្រមព្រៀងសន្តិភាពមួយដើម្បីអនុញ្ញាតឲ្យប្រជាជនជិតខាងទំាងពីររស់នៅដោយសុខសាន្តរវាងគ្នា។
តើព្រឹត្តិការណ៍ថ្មីចុងក្រោយរវាងអ៊ីស្រាអែល និងប៉ាឡេស្ទីនពេលនេះនឹងអាចចូលទៅរំលាយកិច្ចខិតខំប្រឹងប្រែងរបស់សហរដ្ឋអាមេរិកដែរ ឬទេ?។ ពិបាកនឹងផ្តល់ចម្លើយជាក់ច្បាស់ចំពោះសំណួរនេះ តែអ្វីដែលគេអាចនិយាយបានពេលនេះគឺថា នៅមិនទាន់មានប្រទេសមហាអំណាចណាមួយចេញមុខឈឺឆ្អាលដើម្បីចូលខ្លួនជួយដោះស្រាយទេ។ ចំណែកលោកប្រមុខការទូតអាមេរិកចន ឃ៊ែរីទៀតសោតក៏ធ្លាប់បានប្រាប់ឲ្យដឹងរួចហើយថា លោកនឹងឈប់រវល់នៅក្នុងកិច្ចចរចាសន្តិភាពរវាងអ៊ីស្រាអែល និងប៉ាឡេស្ទីនទៀតទេ ប្រសិនបើស្ថានការណ៍នៅក្នុងតំបន់កាន់តែស្មុគស្មាញខ្លំាងនោះ។ សម្រាប់លោកចន ឃ៊ែរី មាន ឬគ្មានសន្តិភាពរវាងអ៊ីស្រាអែល និងប៉ាឡេស្ទីន វាមិនអាស្រ័យលើអាមេរិកទេ តែវាអាស្រ័យលើឆន្ទៈរបស់សមីខ្លួនម្នាក់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ