ការរុករកយន្តហោះបូអ៊ីងម៉ាឡេស៊ី នឹងបន្តកាន់តែឆ្ងាយទៅប៉ែកខាងត្បូងមហាសមុទ្រឥណ្ឌា
ប្រតិបត្តិការរុករកយន្តហោះបូអ៊ីងម៉ាឡេស៊ី ដែលបាត់ស្រមោលតាំងពីថ្ងៃ៨មីនានោះ នឹងផ្តោតកាន់តែបន្តឆ្ងាយទៅប៉ែកខាងត្បូងមហាសមុទ្រឥណ្ឌាទៀត។ នេះបើយោងតាមអាជ្ញាធរអូស្ត្រាលី ប្រាប់អោយដឹងនៅថ្ងៃសុក្រនេះ។ ការិយាល័យសន្តិសុខផ្នែកដឹកជញ្ជូនអូស្ត្រាលី មិនចង់កំណត់ពីទីតាំងតំបន់រុករកថ្មីនេះទេ។
ចុះផ្សាយនៅថ្ងៃ៖
ស្តាប់ - ០១:២៩
អាជ្ញាធរអូស្ត្រាលីទទួលបន្ទុករុករកយន្តហោះបូអ៊ីងម៉ាឡេស៊ីអ៊ែរ ប្រាប់ថា ការវិភាគទិន្នន័យផ្កាយរណបថ្មីៗ ស្តីពីគន្លងដំណើររបស់យន្តហោះ បញ្ជាក់ថា តំបន់រុករកថ្មី គឺស្ថិតកាន់តែឆ្ងាយ កាន់តែបន្តទៅភាគខាងត្បូង នៃតំបន់ដែលរុករកកន្លងមក នៅមហាសមុទ្រឥណ្ឌា។ ប៉ុន្តែ អាជ្ញាធរអូស្ត្រាលីមិនចង់កំណត់ទីតាំងថ្មីនេះទេ។
ទោះយ៉ាងនេះក្តី តំបន់រុករកថ្មី នេះ នៅតែស្ថិតក្នុងទីតាំងកំណត់យកចុងក្រោយបង្អស់ដដែល។ ទីតាំងចុងក្រោយគេនេះ ផ្អែកលើសញ្ញាចុងក្រោយ ដែលផ្កាយរណបចាប់បាន បញ្ជាក់ពីពេលវេលាដែលយន្តហោះជិតអស់សាំង និងត្រូវធ្លាក់ក្នុងទឹក។
ដោយឡែក សារព័ត៌មានប្រចាំថ្ងៃអូស្ត្រាលីមួយ បានចុះផ្សាយប្រភពព័ត៌មានយកបានពីអាមេរិក ទាក់ទងទីតាំងរុករកថ្មី នៅប៉ែកខាងត្បូងមហាសមុទ្រឥណ្ឌា។ យោងតាមកាសែតអូស្ត្រាលី ក្នុងពេលឆាប់ៗនេះ អូស្ត្រាលីនឹងប្រកាសថា ទីតាំងរុករកថ្មីនេះ គឺស្ថិតនៅចំងាយ៨០០គីឡូម៉ែត្រ ពីភាគខាងត្បូងទីតាំងរុករកកន្លងមក ក្នុងមហាសមុទ្រឥណ្ឌា។
គួររំលឹកថា យន្តហោះបូអ៊ីងម៉ាឡេស៊ី ជើងហោះហើរ MH៣៧០ ដែលបាត់ស្រមោលកាលពីថ្ងៃ៨មីនា មានដឹកមនុស្ស២៣៩នាក់ អ្នកដំណើរជនជាតិចិនមានច្រើនជាងគេ។ យន្តហោះបានកាត់ផ្តាច់ទំនាក់ទំនងជាមួយផ្នែកត្រួតពិនិត្យអាកាស ហើយមិនបានផ្តល់ដំណឹងអ្វីទេ តាំងពីថ្ងៃ ៨មីនាមក។ កន្លងមក ប្រតិបត្តិការរុករក ក៏នៅមិនទាន់រកឃើញបំណែកយន្តហោះដែរ។
គេគិតថា យន្តហោះម៉ាឡេស៊ីប្រហែលជាបានហោះហើរទៅភាគខាងត្បូង មហាសមុទ្រឥណ្ឌា មុននឹងធ្លាក់ក្នុងទឹក ដោយសារអស់ប្រេងសាំង។ ក្នុងប្រតិបត្តិការរុករក នៅតាមឆ្នេរអូស្ត្រាលីកន្លងមក គេចាប់បានរលកសញ្ញាសម្លេង ដែលមានលក្ខណៈដូចគ្នាទៅនឹងសញ្ញាប្រអប់ខ្មៅយន្តហោះ។ ប៉ុន្តែ អ្នកស៊ើបអង្កេតគិតថា រលកសញ្ញាសម្លេងនេះ ក៏អាចជាសញ្ញាចេញមកពីកប៉ាល់ រឺក៏ចេញពីឧបករណ៍ស្ទង់ជម្រៅទឹកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ