ទិវាអេដស៍១ធ្នូ៖ កម្ពុជាផ្តោតលើស្ត្រីមានផ្ទៃពោះ
កម្ពុជានឹងប្រារព្ធទិវាអេដស៍១ធ្នូដូចរៀងរាល់ឆ្នាំ។ ស្ថានភាពនៃការឆ្លងមេរោគអេដស៍នេះនឹងត្រូវបញ្ជ្រាបទៅដល់ស្រទាប់យុវជន និងស្ត្រីមានផ្ទៃពោះ។ អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍បានបញ្ជាក់ថា បើទោះជាស្ថានភាពទូទៅនៃបញ្ហាអេដស៍ហាក់មាននិន្នាការទៅរកផ្លូវល្អក៏ដោយ ប៉ុន្តែក្រុមប្រឈមទាំង៣ក្រុមដែលរដ្ឋាភិបាលព្រួយបារម្ភនោះ នៅតែជាគោលដៅនៃប្រយុទ្ធប្រឆាំងដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បើទោះជាកម្ពុជាត្រូវបានទទួលស្គាល់ជាអន្តរជាតិថា ជាកូនសិស្សល្អម្នាក់នៅក្នុងការងារប្រយុទ្ធប្រឆាំងនឹងជំងឺអេដស៍ក៏ដោយ កម្ពុជានៅមានការងារច្រើនដែលត្រូវបំពេញអោយបានកាន់តែប្រសើរ។ ដើម្បីបញ្ជ្រាបការងារទាំងនេះ នៅក្នុងទិវា១ធ្នូឆ្នាំនេះ កម្មវិធីជាច្រើនត្រូវរៀបចំធ្វើ និងផ្សព្វផ្សាយដូចជា ការពិភាក្សា ការរៀបចំពិធីជួបជុំនានានៅក្នុងរាជធានីភ្នំពេញ និងនៅតាមខេត្ត ដើម្បីបន្តផ្សព្វផ្សាយអំពីការបង្ការការចម្លងមេរោគអេដស៍។
កម្ពុជាបានកំណត់មនុស្សបីក្រុម ដែលជាក្រុមប្រឈមនឹងការចម្លងនៃមេរោគអេដស៍ គឺក្រុមអ្នកបម្រើការងារនៅកន្លែងកំសាន្ត ក្រុមមនុស្សស្រឡាញ់ភេទដូចគ្នា និងក្រុមអ្នកប្រើប្រាស់គ្រឿងញៀន។ លោកវេជ្ជបណ្ឌិត តែង គន្ធី អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍បានរៀបរាប់អោយដឹងថា មានសញ្ញាវិវឌ្ឍន៍ល្អនៅក្នុងក្រុមប្រឈមទាំង៣នេះ ពោលគឺ ក្រុមអ្នកធ្វើការតាមមណ្ឌលកំសាន្តកាន់តែច្រើនបានទៅរកសេវាប្រឹក្សា រីឯអត្រាឆ្លងនៅក្នុងក្រុមអ្នកស្រឡាញ់ភេទដូចគ្នាបានថយចុះ ពីជាង៨ភាគរយ មកនៅត្រឹម២,២ភាគរយ។ ដោយឡែកស្ថានភាពអត្រាឆ្លងនៅក្នុងក្រុមអ្នកប្រើប្រាស់គ្រឿងញៀនកំពុងស្ថិតនៅក្រោមការតាមដាននៅឡើយ។ បើតាមការបញ្ជាក់របស់លោកវេជ្ជបណ្ឌិត រដ្ឋាភិបាលកម្ពុជានៅតែចាត់ទុកមនុស្សទាំង៣ក្រុមនេះ ជាការងារដែលត្រូវដោះស្រាយដ៏សំខាន់ដដែល។
ក្រៅពីក្រុមប្រឈមទាំងបីក្រុមនេះ លោកអគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានអំពាវនាវអោយក្រុមស្ត្រីមានផ្ទៃពោះទៅពិនិត្យរកមេរោគអេដស៍អោយបានកាន់តែច្រើន។ ហើយថានេះ គឺគោលដៅមួយទៀតដែលកម្ពុជាត្រូវបញ្ចប់ គឺការចម្លងមេរោគអេដស៍ពីម្តាយទៅកូន។
កម្ពុជាបានបេ្តជ្ញាអនុវត្តគោលដៅរបស់អង្គការសហប្រជាជាតិដែលកំណត់កាត់បន្ថយដល់អត្រាសូន្យនៃការឆ្លងថ្មី អត្រាសូន្យនៃការរើសអើង និងអត្រាសូន្យនៃអ្នកស្លាប់ដោយជំងឺអេដស៍នៅក្នុងឆ្នាំ២០២០។
គួរកត់សម្គាល់ថា ការក្លាយខ្លួនជាសិស្សល្អរបស់កម្ពុជាក្នុងការប្រយុទ្ធនឹងជំងឺអេដស៍ អាចធ្វើអោយកម្ពុជាប្រឈមនឹងការប្រមូលថវិកាបន្តទៀតដើម្បីធ្វើការងារនេះ ខណៈដែលដៃគូអភិវឌ្ឍន៍ត្រូវងាកទៅរកតំបន់ដែលបញ្ហាអេដស៍មានស្ថានភាពធ្ងន់ធ្ងរខ្លាំង។
កម្ពុជាត្រូវការថវិកាប្រមាណ៥៨លានដុល្លារក្នុងមួយឆ្នាំដើម្បីធ្វើការងារប្រយុទ្ធនឹងជំងឺអេដស៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ