អេដស៍

តុល្យការនៃការប្រយុទ្ធប្រឆាំងនឹងអេដស៍

ថ្ងៃទី១ធ្នូ ឆ្នាំ២០០៤ ជាទិវាពិភពលោកប្រឆាំងនឹងជំងឺអេដស៍លើកទី ២៤។ ដោយសារមានថ្នាំពន្យាជីវិត មេរោគហ៊ីវ បានបន្ថយល្បឿននៃការឆ្លងរាតត្បាត នៅលើពិភពលោក ប៉ុន្តែ ការប្រយុទ្ធប្រឆាំងនឹងជំងឺនេះ មិនទាន់ទទួលបានជោគជ័យនៅឡើយទេ ព្រោះបច្ចុប្បន្ននេះមានអ្នកផ្ទុកមេរោគអេដស៍ដល់ទៅ ៣៤លាននាក់។

ចុះផ្សាយនៅថ្ងៃ៖ 01/12/2011 - 11:39កែប្រែថ្ងៃទី៖ 01/12/2011 - 11:57

ដោយ៖ អៀង សុខម៉ិញ

ផ្សាយពាណិជ្ជកម្ម

ចំនួនអ្នកឆ្លងមេរោគហ៊ីវ បានថយចុះជារៀងរាល់ឆ្នាំ នៅលើពិភពលោក ៖ ពី៣លាន២សែននាក់ មក២លាន៧សែននាក់ ក្នុងរយៈពេលជាង១០ឆ្នាំនេះ ពោលគឺ ពីឆ្នាំ១៩៩៧ដល់២០០៩។ នៅទ្វីបអាហ្វ្រិក ទីដែលមានចំនួនមនុស្សស្លាប់ព្រោះជំងឺអេដស៍ ច្រើនជាងគេ វីរ៉ុសហ៊ីវបានថយចុះគួរឲ្យកត់សម្គាល់។

វីរ៉ុសថយ តែមិនងាយកម្ចាត់បានទាំងស្រុងឡើយ

ភាពជឿនលឿនផ្នែកវេជ្ជសាស្ត្រ និងការផ្តល់ថ្នាំព្យាបាលពន្យារជីវិត ជាលក្ខណៈទូទៅ នៅលើពិភពលោក បានចូលរួមចំណែកមិនត្រឹមតែធ្វើឲ្យ អ្នកមានផ្ទុកមេរោគអេដស៍ អាចបន្តជីវិតរស់នៅជាមួយមេរោគហ៊ីវ ដូចមនុស្សធម្មតាទេ តែក៏អាចជួយកាត់បន្ថយការចម្លងមេរោគទៅមនុស្សម្នាក់ទៀតផង។ ជនម្នាក់ដែលមានផ្ទុកមេរោគអេដស៍ ហើយបានទទួលការព្យាបាលភ្លាមតាំងពីដំបូង អាចបន្ថយគ្រោះចម្លងមេរោគបាន២០ដង។

ទោះបីជាយ៉ាងដូច្នេះក្តី ក៏កម្មវត្ថុរបស់អង្គការសហប្រជាជាតិ ទំនងជាសម្រេចទៅបានដោយលំបាកបំផុត។ ឧទាហរណ៍ កម្មវិធី គ្រោងកាត់បន្ថយឲ្យដល់ចំនួន សូន្យ -គ្មានការចម្លងថ្មីទៅទារក ឬកុមារ សោះ ចាប់ពីឆ្នាំ២០១៥ទៅ។

រនាំងហិរញ្ញវត្ថុ

បើតាមអង្គការសហប្រជាជាតិ កម្មវិធីនេះអាចសម្រេចទៅបាន ដោយត្រូវការចំណាយថវិកាប្រមាណជាង៥ពាន់លានអឺរ៉ូ។ ប៉ុន្តែហិរញ្ញវត្ថុសម្រាប់ប្រយុទ្ធប្រឆាំងនឹងជំងឺអេដស៍នេះ បានចោទជាបញ្ហាកាន់ខ្លាំងឡើងៗ។ មូលនិធិអន្តរជាតិបានធ្លាក់ចុះ១០% នៅឆ្នាំ២០១០។ សមាគមប្រយុទ្ធប្រឆាំងនឹងអេដស៍ បានអំពាវនាវឲ្យបណ្តាប្រទេសអ្នកមានខ្លាំង បង្កើនជំនួយអភិវឌ្ឍន៍សាធារណៈ និងស្នើសុំឲ្យមានការយកពន្ធលើរាល់ជំនួញហិរញ្ញវត្ថុ។ តាមរយៈវិធានការនេះ គ្រាន់តែនៅប្រទេសបារាំងមួយ គេអាចប្រមូលប្រាក់បាន១២ពាន់លានអឺរ៉ូក្នុងមួយឆ្នាំ។ ប៉ុន្តែសួរថាគេនឹងយកមកប្រើក្នុងវិស័យសុខភាពសាធារណៈនេះប៉ុន្មាន ?!