មេដឹកនាំប្រទេសមហាអំណាចលើពិភពលោក ជូនពរឆ្នាំថ្មីទៅកាន់ប្រជាជន ហើយឆ្លៀតឌឺដងគូបដិបក្ខ
នាឱកាសឆ្នាំថ្មី ឆ្នាំ២០១៧ មេដឹកនាំនៃប្រទេសមហាអំណាចលើពិភពលោក បានថ្លែងសារជូនពរ ទៅកាន់ប្រជាជន និងពិភពលោក។ មេដឹកនាំភាគច្រើន លើកឡើងពីបញ្ហាប្រឈមដែលពិភពលោក កំពុងជួបប្រទះដូចជា អំពើភេរវកម្ម បញ្ហាអន្តោប្រវេសន៍ និងការរើសអើងពូជសាសន៍ជាដើម។ ក្រៅពីនេះ ប្រមុខដឹកនាំទាំងអស់បានអំពាវនាវឱ្យពិភពលោកពួតដៃគ្នា ដើម្បីដោះស្រាយបញ្ហាទាំងនោះ។ តាមរយៈសារជូនពរឆ្នាំថ្មី មេដឹកនាំប្រទេសខ្លះ ក៏បានឆ្លៀតឌឺដងវាយប្រហារគូបដិបក្ខរបស់ខ្លួនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសុន្ទរកថា នាឱកាសឆ្លងឆ្នាំថ្មី ឆ្នាំ ២០១៧ ប្រធានាធិបតេយ្យចិន លោក ស៊ី ជីនពីង បានលើកសរសើរពីកំណែទម្រង់សំខាន់ៗ ក្រោមការដឹកនាំរបស់លោក ក្នុងរយៈពេលពេញមួយឆ្នាំ ២០១៦ ដូចជា កំណែទម្រង់ផ្នែករចនាសម្ព័ន្ធផ្គត់ផ្គង់ ការប្រឆាំងអំពើពុករលួយ កិច្ចការពារជាតិ កំណែទម្រង់ប្រព័ន្ធច្បាប់ ការគាំពារសមភាពនិងយុត្តិធម៌ក្នុងសង្គមជាដើម។
លោក ស៊ី ក៏បានរំឭកពីបញ្ហាប្រឈមរបស់ពិភពលោកនាពេលបច្ចុប្បន្ន ដូចជាសង្រ្គាមរ៉ាំរ៉ៃនិងភាពក្រីក្រ។ មេដឹកនាំរូបនេះបានអំពាវនាវឱ្យសហគមន៍អន្តរជាតិ ប្រកៀកស្មាគ្នា ដើម្បីកសាងភពផែនដីឱ្យកាន់តែមានសុខសន្តិភាពនិងរុងរឿងថ្កុំថ្កើង។
ដោយឡែក មេដឹកនាំកំពូលផុតលេខកូរ៉េខាងជើង លោក គីម ជុងអ៊ុន បានយកឱកាស ថ្ងៃឆ្លងឆ្នាំ ដើម្បីបង្ហាញសារគំរាមទៅកាន់ពិភពលោកពីឥទ្ធិពលនៃគ្រាប់មីស៊ីលរបស់ខ្លួន ដោយអះអាងថានឹងអាចយកមកធ្វើតេស្តនៅដើមឆ្នាំ២០១៧នេះ។
បណ្តាប្រទេសនានា ដែលមានទំនោរប្រឆាំងកូរ៉េខាងជើងដូចជា កូរ៉េខាងត្បូង ជប៉ុន និងអាមេរិកជាដើម បានបង្ហាញក្តីព្រួយបារម្ភថា សមត្ថភាពនុយក្លេអ៊ែរកូរ៉េខាងជើង នឹងកាន់តែវិវឌ្ឍទៅមុខខ្លាំងក្លាជាងនេះទៀត ប្រសិនបើពិភពលោកមិនអាចចាត់វិធានការប្រកបដោយប្រសិទ្ធភាពណាមួយទេនោះ។
ចំណែក លោកប្រធានាធិបតីជាប់ឆ្នោតអាមេរិក ដូណាល់ ត្រាំ បានបង្ហោះសារជូនពរឆ្នាំថ្មីតាមប្រព័ន្ធទំនាក់ទំនងសង្គម Twitter ផ្ញើរជូនប្រជាជនពិភពលោក រួមទាំងសត្រូវនិងអ្នកដែលតាមផ្ចាញ់ផ្ចាលលោកផងតាំងពីលោកជាប់ឆ្នោត។ ទោះបីជាមិនបញ្ចេញឈ្មោះក៏ដោយ ក៏គេអាចយល់ដែរថា សត្រូវ ដែលលោកបានបញ្ជាក់ក្នុងសំណេរនេះ គឺគ្មាននរណាក្រៅពីក្រុមអ្នកប្រជាធិបតេយ្យ ប្រព័ន្ធផ្សព្វផ្សាយ និងក្រុមអ្នកសាធារណរដ្ឋមួយចំនួន ដែលមិនចង់ឲ្យលោកជាប់ឆ្នោតនោះឡើយ។
ទោះបីជាយ៉ាងណាក៏ដោយ លោក ប៉ារ៉ាក់ អូប៉ាម៉ា ប្រធានាធិបតីជិតផុតអាណត្តិ មិនបានខ្វាយខ្វល់ទៅនឹងអ្វីដែល លោក ត្រាំ លើកឡើងទេ។ លោកចង់ឱ្យប្រជាពលរដ្ឋអាមេរិក បែរក្រោយសម្លឹងមើលជោគជ័យនៃរដ្ឋបាលរបស់លោកក្នុងរយៈពេល៨ឆ្នាំចុងក្រោយ។
ជោគជ័យដែលមានជាអាថិ៍៖ អត្រាគ្មានការងារធ្វើដែលបន្តដាំក្បាលធ្លាក់ចុះ ច្បាប់ស្ដីពីប្រព័ន្ធធានារ៉ាប់រងថែទាំសុខភាព ការសម្លាប់មេដឹកនាំលោក អូសាម៉ា ប៊ីនឡាដេន និងការភ្ជាប់ទំនាក់ទំនងការទូតឡើងវិញជាមួយប្រទេសគុយបា។
ចំណែកឯប្រធានាធិបតីរុស្ស៊ីវិញ បានសម្ដែងសុទិដ្ឋិនិយមថា ប្រទេសរុស្ស៊ីនឹងនៅតែរឹងមាំ ហើយបន្តដំណើរឆ្ពោះទៅរកការអភិឌ្ឍន៍កាន់តែខ្លាំង បើទោះបីជាស្ថិតនៅក្នុងដំណាក់កាលដ៏សែនតានតឹងនិងលំបាកក្ដី។
ងាកទៅមើលលោកប្រធានាធិបតីបារាំង ហ្វ្រង់ស័រ-ហូឡង់។ ក្នុងសារជូនពរជាលើកចុងក្រោយក្នុងឋានៈជាប្រធានាធិបតីបារាំង លោកហូឡង់បានរម្លឹកឡើងវិញពីអំពើភេវរកម្ម នៅទីក្រុង នីស។ ហើយក្នុងនាមជាប្រមុខរដ្ឋ លោក ហ្វ្រង់ស័រ-ហូឡង់ បានសម្ដែងសមានចិត្ត និងចែករំលែកដោយអស់ពីចិត្តចំពោះពលរដ្ឋរងគ្រោះ។ ចំពោះមុខបញ្ហាភេរវកម្មដែលរីកសាយនៅសហភាពអឺរ៉ុបសព្វថ្ងៃនេះ លោក ហ្វ្រង់ស័រ-ហូឡង់ បញ្ជាក់ជំហរជាថ្មីថា បារាំងត្រូវតែបន្តប្រយុទ្ធឆាំងអំពើភេរវកម្មនៅក្រៅប្រទេសបន្តទៅទៀត ដូចជាអ្វីដែលក្រុមប្រតិបត្តិការយោធាបារាំងកំពុងធ្វើនៅប្រទេសម៉ាលី នៅស៊ីរី និងនៅអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ