ប្រជាជនកូរ៉េខាងត្បូងធ្វើបាតុកម្ម បណ្តេញ ប្រធានាធិបតី នៅថ្ងៃឆ្លងឆ្នាំថ្មី
ខុសពីប្រពៃណី ដែលគេទម្លាប់ធ្វើរៀងរាល់ឆ្នាំ ប្រជាជនកូរ៉េខាងត្បូងជ្រើសរើសយកថ្ងៃបុណ្យឆ្លងឆ្នាំ ដើម្បីធ្វើបាតុកម្ម ទាមទារប្រធានាធិបតីឲ្យចុះចេញពីតំណែង។ នៅយប់ថ្ងៃសៅរ៍ម្សិលមិញ ប្រជាជនកូរ៉េខាងត្បូងប្រមាណ កន្លះលាននាក់ បានជួបជុំគ្នា នៅមុខអគាររដ្ឋសំខាន់ៗ ដែលរួមមានវិមានប្រធានាធិបតី និងផ្ទះរបស់នាយករដ្ឋមន្រ្តី។ ក្រុមបាតុករបានស្រែកទាមទារឲ្យគេចាប់លោកស្រីប្រធានាធិបតី ប៉ាក់ គុនហេ ដាក់ពន្ធនាគារ ក្នុងរឿងអាស្រូវឃុបឃិត ប្រព្រឹត្តអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
នៅដំណាច់ឆ្នាំនេះ លោកស្រីប្រធានាធិបតីកូរ៉េខាងត្បូងមិនបានទទួលពាក្យជូនពរពីប្រជាជន នៅក្នុងឱកាសបុណ្យចូលឆ្នាំថ្មីទេ។ ផ្ទុយទៅវិញ នៅលើបដារបស់ក្រុមប្រជាជនកូរ៉េខាងត្បូង ដែលបានលើកគ្នាធ្វើបាតុកម្ម រាប់ម៉ឺននាក់ នៅមុខវិមានប្រធានាធិបតី គេឃើញតែអក្សរសរសេរ ទាមទារឲ្យលោកស្រីប្រធានាធិបតីប៉ាក់ គុនហេ ចុះចេញ ពីតំណែង ជាបន្ទាន់។ សម្រាប់ក្រុមបាតុករ គេមិនចង់ឃើញលោកស្រីប៉ាក់ គុនហេនៅជាប្រធានាធិបតីសម្រាប់ឆ្នាំថ្មី ឆ្នាំ ២០១៧ឡើយ។
នេះជាលើកទី១០ហើយ ដែលប្រជាជនកូរ៉េខាងត្បូង ចុះថ្នល់ ធ្វើបាតុកម្មទាមទារឲ្យប្រធានាធិបតីចុះចេញពីតំណែង។ លោកស្រីប៉ាក់ គុនហេ បានបដិសេធមិនចុះចេញពីអំណាច និងអះអាងរង់ចាំការសម្រេចរបស់តុលាការធម្មនុញ្ញ ដែលមានពេលវេលា ៦ខែដើម្បីកំណត់ជោគវាសនារបស់លោកស្រី។ លោកស្រីប៉ាក់ គុនហេ ដែលជាប់សង្ស័យ ក្នុងរឿងអាស្រូវឃុបឃិត ប្រព្រឹត្តអំពើពុករលួយ និងរំលោភអំណាច ជាមួយមិត្តស្រី ឆយ ស៊ុនស៊ីល ត្រូវបានសភាកូរ៉េខាងត្បូង បោះឆ្នោត ដកចេញពីតំណែង កាលពីថ្ងៃទី ៩ធ្នូកន្លងទៅ។ ក្នុងពេលរង់ចាំការសម្រេចរបស់តុលាការធម្មនុញ្ញ លោកស្រីមានតែឈ្មោះជាប្រធានាធិបតី ចំណែកអំណាចប្រតិបត្តិដឹកនាំប្រទេសត្រូវផ្ទេរទៅឲ្យនាយករដ្ឋមន្រ្តី ជាអ្នកកាន់កាប់។
រឿងអាស្រូវពុករលួយរបស់ថ្នាក់ដឹកនាំកំពូលរបស់កូរ៉េខាងត្បូងកាន់តែរីកមុខធំ បន្ទាប់ពីរដ្ឋអាជ្ញា កាលពីថ្ងៃសៅរ៍ បានបញ្ជារឲ្យចាប់ឃុំខ្លួន អតីតរដ្ឋមន្រ្តីសុខាភិបាល និងបច្ចុប្បន្ន ជានាយកបេឡាសោធននិវត្តន៍ ក្នុងបទប្រព្រឹត្តពុករលួយជាមួយក្រុមហ៊ុន អេឡិចត្រូនិច Samsung។ នៅក្នុងពេលឃាត់ខ្លួន លោកមូន យ៉ុងយូ បានសារភាពថា លោកធ្លាប់បានដាក់សម្ពាធទៅលើបេឡាសោធននិវត្តន៍ជាតិកូរ៉េខាងត្បូង ដែលជាម្ចាស់ភាគហ៊ុនមួយរបស់ក្រុមហ៊ុនសាខា Samsung ឲ្យយល់ព្រមទទួលការច្របាច់បញ្ចូលគ្នា រវាងក្រុមហ៊ុន សាខាSamsung ទៅតាមការចង់បានរបស់ថៅកែធំ។
តាមបណ្តាញសារព័ត៌មានកូរ៉េខាងត្បូង ក្រុមស៊ើបអង្កេតបានគ្រោងនឹងកោះហៅ ប្រធានក្រុមហ៊ុនវ័យក្មេងរបស់Samsung ដើម្បីឆ្លើយបញ្ជាក់ថា តើគេមានបានបញ្ជូនលុយទៅឲ្យលោកស្រី ឆយ ស៊ុនស៊ីលដើម្បី ជាថ្នូរនឹងការដាក់សម្ពាធរបស់រដ្ឋាភិបាលទៅលើបេឡាសោធននិវត្តន៍ជាតិកូរ៉េខាងត្បូង ដែរឬទេ។ ក្រុមស៊ើបអង្កេតរបស់តុលាការបានសង្ស័យថា ម្ចាស់ក្រុមហ៊ុនមហាសាលSamsung អាចផ្ទេរលុយ១៧លានដុល្លារទៅឲ្យមូលនិធិរបស់ឆយ ស៊ុនស៊ីល ដែលបានប្រើឥទ្ធិពល អំណាចរបស់លោកស្រី ប៉ាក់ គុនហេ ដើម្បី ដាក់គំនាបទារលុយពីម្ចាស់ក្រុមហ៊ុនធំៗនៅកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ