ចិន និងកូរ៉េខាងត្បូងចង់ប្រារព្ធរួមគ្នា ថ្ងៃរំលឹកបរាជ័យរបស់ជប៉ុន
នៅក្នុងទស្សនកិច្ចទៅក្នុងប្រទេសកូរ៉េខាងត្បូង ប្រធានាធិបតីចិន លោកស៊ី ជីនពីង ហាក់និយាយតិចតួចពីសំណុំរឿងនុយក្លេអ៊ែរកូរ៉េខាងជើង ប៉ុន្តែនៅថ្ងៃសុក្រទី ៤កក្កដា លោកបានថ្លែងផ្តោតសំខាន់ ទៅលើការឈឺចាប់ ដែលប្រជាជនចិន និងកូរ៉េខាងត្បូងជួបប្រទះ នៅក្នុងអំឡុងត្រួតត្រារបស់កងទ័ពជប៉ុន នៅសម័យសង្រ្គាម។ សុន្ទរកថារិះគន់ជប៉ុនរបស់ប្រមុខដឹកនាំចិន ធ្វើ នៅពីរថ្ងៃក្រោយ រដ្ឋាភិបាលជប៉ុនបានសម្រេចជាប្រវត្តិសាស្រ្ត អនុញ្ញាតឲ្យកងទ័ពជប៉ុនអាចចេញប្រតិបត្តិការនៅក្រៅប្រទេស ដើម្បីជួយសម្ព័ន្ធមិត្តរបស់ជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅចំពោះមុខនិស្សិតកូរ៉េខាងត្បូង លោកប្រធានាធិបតីចិន ស៊ី ជីនពីង ថ្លែងសុន្ទរកថា រំលឹកពីសង្រ្គាមព្រៃផ្សៃរបស់កងទ័ពជប៉ុន នៅក្នុងទឹកដីចិន និងឧបទ្វីបកូរ៉េ។ ក្នុងមួយពាក់កណ្តាលសតវត្សរ៍ ទី២០ ជប៉ុនបានឈ្លានពាន លេបត្របាក់កូរ៉េ និងចូលទៅត្រួត្រា ទឹកដីពាក់កណ្តាលរបស់ប្រទេសចិន។ តាមប្រមុខរដ្ឋចិន នៅសម័យក្តោបក្តាប់អំណាចរបស់ជប៉ុន ប្រជាជនចិន និងប្រជាជនកូរ៉េធ្លាប់បានជួយគាំទ្រ គ្នាទៅវិញ ទៅមក ជាមួយញើស និងឈាម។
នៅក្នុងជំនួបម្សិលមិញនេះទៀត ប្រមុខដឹកនាំប្រទេសទាំងពីរ កូរ៉េខាងត្បូង និងចិន បានប្រកាសចង់ប្រារព្ធរួមគ្នា ថ្ងៃរំលឹកខួបបរាជ័យរបស់ជប៉ុន នៅឆ្នាំក្រោយ ឆ្នាំ ២០១៥។ នៅក្នុងទឹកដីកូរ៉េខាងត្បូង ប្រមុខដឹកនាំចិន ចាប់រំលឹកនិយាយឡើងវិញ ពីការឈ្លានពានរបស់កងទ័ពជប៉ុន បន្ទាប់ពីរដ្ឋាភិបាលជប៉ុនទើបបានសម្រេចផ្លាស់ប្តូរតួនាទីរបស់កងទ័ពជប៉ុន។
កាលពីថ្ងៃអង្គារ រដ្ឋាភិបាលជប៉ុនបានសើរើ ច្បាប់សន្តិភាពនិយម និងបានបកស្រាយច្បាប់រដ្ឋធម្មនុញ្ញ ដើម្បីពង្រីកវិសាលភាព អំណាចកងទ័ពជប៉ុន ពីកងទ័ពស្វ័យការពារ ទៅជាកងទ័ពដែលមានសិទ្ធិចូលរួមអន្តរាគម ទៅក្នុងជម្លោះក្នុងតំបន់។
សូមបញ្ជាក់ថា នៅក្រោយបរាជ័យក្នុងសង្គ្រាមលោកលើកទីពីរ សហរដ្ឋអាមេរិក ប្រទេសឈ្នះសង្គ្រាម បានចាប់បង្ខំជប៉ុនឱ្យសរសេររដ្ឋធម្មនុញ្ញ សន្តិភាពនិយម ដែលនៅក្នុងមាត្រទី៩ កងទ័ពជប៉ុន មិនត្រូវលូកដៃក្នុងសង្គ្រាម ជារៀងរហូត។ កងទ័ពជប៉ុនគឺ មានសិទ្ធិត្រឹមតែស្វ័យការពារ ការពារខ្លួន តែប៉ុណ្ណោះ។
នយោបាយកែប្រែតួនាទីកងទ័ពរបស់លោកនាយករដ្ឋមន្រ្តីអាបេមិនបានទទួលការគំាទ្រជាទូទៅពីប្រជាជនជប៉ុន ដែលជិតពាក់កណ្តាលបានទាមទារឲ្យរដ្ឋាភិបាលបោះបង់ចោលគំនិតធ្វើសង្រ្គាម។ ប៉ុន្តែ ដើម្បីបញ្ជាក់ភាពចាំបាច់ក្នុងការកែប្រែច្បាប់សន្តិភាពនិយម លោកនាយករដ្ឋមន្រ្តីជប៉ុន ស៊ីនហ្សូ អាបេ បានលើកឡើងពីគ្រោះថ្នាក់គំរាមកំហែងរបស់ចិន ដល់សន្តិសុខរបស់ប្រទេស និងប្រជាជនជប៉ុន។ តាមលោកអាបេ ចិនកំពុងពង្រីកអំណាចយោធា មិនឈប់ឈរ នៅក្នុងតំបន់ និងបានបង្កើនថវិកាយោធា ទ្វេដង ក្នុងមួយឆ្នាំៗ។
តាមអ្នកវិភាគអាមេរិក ចិនមិនបានព្រងើយកន្តើយនឹងរបត់ប្រវត្តិសាស្រ្តនៃកងទ័ពជប៉ុន ដែលចិនចាត់ទុកជាឧបសគ្គរបស់ខ្លួន នៅក្នុងការពង្រីកឥទ្ធិពល អំណាចនៅក្នុងតំបន់។ កន្លងមក ហ្វីលីពីនផ្ទាល់ដែលជាប់ឈ្លោះដណ្តើមដីកោះជាមួយចិន ក៏ធ្លាប់បានស្នើសុំឲ្យកងទ័ពជប៉ុនប្តូរឈ្មោះពីកងទ័ពស្វ័យការពារមកជាកងទ័ពអាចជួយអន្តរាគមនៅក្នុងជម្លោះក្នុងតំបន់។
កូរ៉េខាងត្បូងវិញ បើទោះជាសម្ព័ន្ធមិត្តរបស់ជប៉ុន ទល់នឹងកូរ៉េខាងជើង ក៏កំពុងមិនសប្បាយចិត្តនឹងជប៉ុនពីរឿងជម្លោះដីកោះ និងជំហរមិនច្បាស់លាស់ របស់ជប៉ុន ដែលចង់សើរើ លែងចង់សុំទោសដល់ជនរងគ្រោះកូរ៉េ ដែលធ្លាប់រងការធ្វើបាបពីទាហានជប៉ុន នៅក្នុងសង្រ្គាមលោកលើកទីពីរ។ ចិនពេលនេះ ទំនងចង់ឆ្លៀតយកឱកាសនេះ ដើម្បីរុញច្រានកូរ៉េខាងត្បូង ឲ្យឈ្លោះកាន់តែខ្លាំងជាមួយជប៉ុន ដែលតាមពិតជាសត្រូវរបស់ចិន នៅក្នុងរឿងដណ្តើមដីកោះដែរនោះ។ យុទ្ធសាស្រ្តរបស់ចិន គឺបំបែកបំបាក់សម្ព័ន្ធមិត្តសំខាន់ទាំងពីររបស់អាមេរិក ពោលគឺដើម្បីកុំឲ្យកូរ៉េខាងត្បូង រួមជាមួយជប៉ុន និងអាមេរិក ប្រជែងជាមួយឥទ្ធិពលចិន នៅក្នុងតំបន់អាស៊ីប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ