រដ្ឋាភិបាលជប៉ុនសម្រេចបកស្រាយរដ្ឋធម្មនុញ្ញឡើងវិញ ផ្ទុយនឹងឆន្ទៈប្រជាជន
នៅថ្ងៃចន្ទទី ៣០ មិថុនា នេះ អ្នកនាំពាក្យរដ្ឋាភិបាលជប៉ុន លោក យោស្ហ៊ីហ៊ីដេ ស៊ូហ្កា (Yoshihide Suga) បានប្រកាសបន្តផែនការរៀបចំឱ្យមាន ការបកស្រាយរដ្ឋធម្មនុញ្ញ សន្តិនិយមរបស់ជប៉ុនឡើងវិញ ដដែល បើទោះបីជាសាធារណជនជប៉ុនមិនពេញចិត្ត ចេញធ្វើបាតុកម្ម និងមានពលរដ្ឋម្នាក់បានប៉ុនប៉ងដុតសម្លាប់ខ្លួន កណ្តាលក្រុងក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
អ្នកនាំពាក្យរដ្ឋាភិបាល មិនបានធ្វើអត្ថាធិប្បាយអ្វីជុំវិញ ករណីពលរដ្ឋជប៉ុនដុតសម្លាប់ខ្លួន កណ្តាលហ្វូងមហាជននៅទីក្រុងតូក្យូម្សិលមិញ ដើម្បីបរិហារប្រឆាំងនឹងផែនការបកស្រាយរដ្ឋធម្មនុញ្ញសន្តិនិយមទេ ប៉ុន្តែបែរជាបានបញ្ជាក់ និងបំភ្លឺអំពីជំហរជាក់លាក់របស់រដ្ឋាភិបាល ដែលចង់ឃើញទាហានជប៉ុនមានសិទ្ធិ “ស្វ័យការពារសមូហភាព”។ ស្វ័យការពារសមូហភាព មានន័យថាទាហានជប៉ុនអាចចេញធ្វើប្រតិបត្តិការ និងអន្តរាគមន៍នៅបរទេស ដើម្បីជួយសម្ព័ន្ធមិត្ត នៅជួរទីមួយទន្ទឹមនឹងសហរដ្ឋអាមេរិក។
ផ្តួចផ្តើម ស្នើឡើង និងផ្តល់សន្ទុះដោយនាយករដ្ឋមន្ត្រីជាតិនិយម ស៊ីនហ្សូ អាបេ ប្រវត្តិសាស្ត្រសន្តិនិយមជប៉ុន បាននិងកំពុងឈានដល់របត់ថ្មី គិតចាប់តាំងពីសង្គ្រាមលោកលើកទីពីរមក។ ដោយមាន ឯកសារសំអាងក្រាសឃ្មឹក របស់អ្នកឯកទេស ដែល នាយករដ្ឋមន្ត្រីបានតែងតាំងដោយផ្ទាល់ លោកស៊ីនហ្សូ អាបេ ចង់ឱ្យក្តីស្រមៃរបស់លោកក្លាយជាពិត ឃើញកងទ័ពជប៉ុនអាចមានតួនាទីសំខាន់នៅក្រៅប្រទេស និងលែងចាំតែការពារខ្លួន “ស្វ័យការពារ” ទៀតឡើយ។
សូមបញ្ជាក់ថា ក្រោយបរាជ័យក្នុងសង្គ្រាមលោកលើកទីពីរ ថ្ងៃទី ១៥សីហា ១៩៤៥ មកសហរដ្ឋអាមេរិក ប្រទេសឈ្នះសង្គ្រាម បានចាប់បង្ខំជប៉ុនឱ្យចែងច្បាប់ក្នុងរដ្ឋធម្មនុញ្ញ សន្តិនិយម មាត្រ៩ មិនលូកដៃក្នុងសង្គ្រាម ជារៀងរហូត។ កងទ័ពជប៉ុនមានសិទ្ធិត្រឹមស្វ័យការពារតែប៉ុណ្ណោះ។ ចំណែកបណ្តាជនជប៉ុនវិញ ជាងពាក់កណ្តាលនៅតែជាប់ចិត្តជានិច្ចនឹងរដ្ឋធម្មនុញ្ញសន្តិនិយម ប្រឆាំងជានិច្ចនឹងសកម្មភាពទាហានជប៉ុននៅបរទេស។ នេះបើតាមការស្ទង់មតិចុងក្រោយ។
ដោយហេតុមតិសាធារណៈ និងភាពស្មុគស្មាញក្នុងការធ្វើកំណែទម្រង់រដ្ឋធម្មនុញ្ញ លោកស៊ីនហ្សូ អាបេ នៅទីបំផុត ក៏ជ្រើសរើស ធ្វើការបកស្រាយ រដ្ឋធម្មនុញ្ញឡើងវិញ។ រដ្ឋាភិបាលជប៉ុន ទំនងជានឹងត្រូវអនុម័តគម្រោងវិសោធនកម្មនេះ នៅថ្ងៃអង្គារទី១កក្កដា ថ្ងៃខួប ៦០ឆ្នាំនៃការកកើត កងកម្លាំងស្វ័យការពារ ឈ្មោះផ្លូវការរបស់យោធាជប៉ុន។ បន្ទាប់មក វិសោធនកម្មនេះនឹងត្រូវឆ្លងកាត់ការធ្វើប្រជាមតិទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ