ហេតុអ្វីបានជាអ៊ីស្រាអែល និងចលនាប៉ាឡេស្ទីនហាម៉ាស់លួចចរចាគ្នាស្ងាត់ៗ
ចុះផ្សាយនៅថ្ងៃ៖
ស្តាប់ - ០៥:២៣
នៅតំបន់ដើមបូព៌ា មានលេចឡើងនូវព័ត៌មានមួយដែលថា ប្រទេសអ៊ីស្រាអែល និងចលនាប៉ាឡេស្ទីនហាម៉ាស់ដែលគ្រប់គ្រងតំបន់ហ្កាហ្សាបានជួបចរចាគ្នាស្ងាត់ៗនៅក្នុងទីក្រុងដូហា ប្រទេសកាតា។ មិនមែនជាការជួបចរចាដោយផ្ទាល់ទេ តែបានឆ្លងកាត់តាមរយៈភាគីទី៣ ម្នាក់ដែលជាអតីតនាយករដ្ឋមន្រ្តីអង់គ្លេសលោកតូនី ប្ល៊ែរ។ ដំណឹងសម្ងាត់ដែលទើបធ្លាយពេលនេះបាននិងកំពុងធ្វើឲ្យលោកប្រធានរដ្ឋអំណាចប៉ាឡេស្ទីម៉ាមូដ អាប៉ាស់ក្តៅក្រហាយយ៉ាងខ្លំាង។ ហេតុអ្វីបានជាអ៊ីស្រាអែលបានបើកកិច្ចចរចាស្ងាត់ៗជាមួយនឹងចលនាប៉ាឡេស្ទីនហាម៉ាសដែលខ្លួនចាត់ទុកជាចលនាភេរវនិយម?
ចាប់ពីពេលនេះតទៅ ព័ត៌មានជុំវិញវត្តមានកិច្ចចរចារវាងប្រទេសអ៊ីស្រាអែល និងចលនាប៉ាឡេស្ទីនហាម៉ាស់ដែលកំពុងកាន់កាប់តំបន់ហ្កាហ្សាលែងជាព័ត៌មានចចាមអារ៉ាមទៀតឡើយ តែជាព័ត៌មានពិតមែន។ រីឯអ្នកដែលបានទម្លាយព័ត៌មានសម្ងាត់មួយនេះ គឺគ្មាននរណាក្រៅពីសមីខ្លួនផ្ទាល់ទេ ពិសេសគឺមនុស្សខ្លំាងទី១ របស់ចលនាហាម៉ាស់លោកខាលីដ មឺឆាអាល់។ នៅក្នុងបទសន្ទនាមួយកាលពីថ្ងៃទី២១ សីហាជាមួយកាសែតអារ៉ាប់មានទីស្នាក់ការក្នុងទីក្រុងឡុងដ៍ ប្រទេសអង់គ្លេស លោកខាលីដបានប្រកាសទទួលស្គាល់ជាលើកទី១ ពីវត្តមានទំនាក់ទំនងជាមួយប្រទេសអ៊ីស្រាអែល ព្រមទំាងហ៊ានអះអាងពីដំណើរការចម្រើនទៅមុខគួរឲ្យកត់សម្គាល់នៅក្នុងការចរចាជាមួយអ៊ីស្រាអែលទៀតផង។
ការថ្លែងប្រាប់ជាសាធារណៈ និងជាចំហរបស់លោកខាលីដកាលណោះបានធ្វើឲ្យលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបាក់មុខ មាត់យ៉ាងខ្លំាង។ បាក់មុខ មាត់ក៏ដោយសារថា ៤ថ្ងៃមុនការថ្លែងរបស់លោកខាលីដ លោកនេតាន់យ៉ាហ៊ូបានប្រកាសបដិសេធយ៉ាងដាច់អហង្ការថា អ៊ីស្រាអែលមិនដែល និងគ្មានបំណងណាមួយចង់បើកកិច្ចចរចាជាមួយចលនាប៉ាឡេស្ទីនហាម៉ាសដែលជាសត្រូវស៊ូពូជរបស់ខ្លួនឡើយ ទោះបីជាកិច្ចចរចាធ្វើឡើងដោយផ្ទាល់ តាមរយៈប្រទេសផ្សេង ឬមួយក៏តាមរយៈអន្តរការីណាមួយក្តី។ ក្រៅពីការប្រកាសទទួលស្គាល់ដោយមនុស្សខ្លំាងទី១ របស់ចលនាហាម៉ាស់ ទីប្រឹក្សារបស់លោកនាយករដ្ឋមន្រ្តីនៃប្រទេសតួកគីក៏បានបញ្ជាក់ច្បាស់ៗថា កិច្ចព្រមព្រៀងមួយរវាងអ៊ីស្រាអែល និងចលនាហាម៉ាស់នឹងចេញជារូបរាងនាពេលឆាប់ៗខាងមុខ។
ដូច្នេះឃើញថា អ្វីៗកាន់តែច្បាស់ទៅៗ និងហាក់ដូចជាលែងស្រពិចស្រាពិលទៀតឡើយ។ តែអ្វីដែលគ្រប់គ្នាកំពុងចង់ដឹងពេលនេះគឺថា តើការចរចារវាងអ៊ីស្រាអែល និងចលនាប៉ាឡេស្ទីនហាម៉ាស់បានធ្វើឡើងយ៉ាងដូចម្តេចខ្លះ?
មន្រ្តីការទូតបស្ចិមលោកម្នាក់ឲ្យដឹងថា គឺលោកអតីតនាយករដ្ឋមន្រ្តីអង់គ្លេសតូនី ប្ល៊ែរជាអ្នកធ្វើអន្តរការីនៅក្នុងកិច្ចចរចាពីចម្ងាយរវាងអ៊ីស្រាអែល និងចលនាប៉ាឡេស្ទីនហាម៉ាស់។ លោកតូនី ប្ល៊ែរបានទៅជួបសន្ទនាជាមួយមនុស្សខ្លំាងទី១ នៃចលនាហាម៉ាស់លោកខាលីដ មឺឆាអាល់យ៉ាងតិច ២ដងនៅក្នុងទីក្រុងដូហា ប្រទេសកាតាដែលលោកខាលីដកំពុងរស់នៅ។ ពីដំបូងឡើយ កិច្ចចរចាពីចម្ងាយរវាងអ៊ីស្រាអែល និងចលនាប៉ាឡេស្ទីនហាម៉ាស់ដែលដឹកនំាដោយលោកតូនី ប្ល៊ែរត្រូវបានគ្រប់គ្នាព្យាយាមលាក់យ៉ាងសម្ងាត់ខ្លំាងណាស់។ តែនៅតែចៀសមិនផុតពីការបែកធ្លាយនៅតាមសារព័ត៌មានផ្សេងៗ។
ប្រភពមន្រ្តីការទូតបស្ចិមលោកដដែលបានបញ្ជាក់ថា កិច្ចចរចារវាងអ៊ីស្រាអែល និងចលនាហាម៉ាស់ គឺសំដៅស្វែងរកកិច្ចព្រមព្រៀងមួយដែលអ៊ីស្រាអែលយល់ព្រមកសាងតំបន់ហ្កាហ្សាគ្រប់គ្រងដោយចលនាហាម៉ាស់ឡើងវិញ ជាថ្នូរនឹងការដែលចលនាហាម៉ាស់សុខចិត្តបញ្ឈប់ការធ្វើសង្រ្គាមប្រឆំាងអ៊ីស្រាអែល។
បើគេមើលមួយភ្លែតទៅឃើញថា វាពិតជាសុឆន្ទៈរបស់អ៊ីស្រាអែល និងចលនាប៉ាឡេស្ទីនហាម៉ាស់ដែលមិនចង់បន្តប្រឈមមុខដាក់គ្នា។ តែបើគេពិនិត្យមើលឲ្យបានស៊ីជម្រៅបន្តិចទៅឃើញថា ផលប្រយោជន៍បានមកពីកិច្ចព្រមព្រៀងរវាងអ៊ីស្រាអែល និងចលនាហាម៉ាស់មិនមែនធ្លាក់តែក្នុងដៃអ៊ីស្រាអែល និងចលនាហាម៉ាស់ប៉ុណ្ណោះទេ តែវាក៏បានធ្វើឲ្យប្រទេសជិតខានខ្លះនៅក្នុងតំបន់ទទួលបានចំណេញដែរ មុនគេគឺប្រទេសអារ៉ាប៊ីសាអូឌីត។ ទីក្រុងរីយ៉ាដដែលមានជំហររំកិលរកចលនាហាម៉ាស និងកំពុងបន្តសង្ស័យចំពោះកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ចង់បានកិច្ចព្រមព្រៀងឆាប់ៗរវាងអ៊ីស្រាអែល និងចលនាហាម៉ាស់។ សម្រាប់អារ៉ាប៊ីសាអូឌីត កិច្ចព្រមព្រៀងអ៊ីស្រាអែល និងចលនាហាម៉ាស់អាចនឹងបំបែកអ៊ីរ៉ង់ឲ្យស្ថិតឆ្ងាយពីពួកហាម៉ាស។
បន្ទាប់ពីអារ៉ាប៊ីសាអូឌីត តួកគីក៏ជាប្រទេសដែលកំពុងទន្ទឹងរង់ចំាកិច្ចព្រមព្រៀងអ៊ីស្រាអែល និងចលនាហាម៉ាស់យ៉ាងអន្ទះសារដែរ ព្រោះវាជាឱកាសមួយដែលទីក្រុងអង់ការ៉ាត្រូវជម្រះបញ្ជីឲ្យបានស្អាតទាក់ទងនឹងកប៉ាល់ដឹកជំនួយមនុស្សធម៌មួយគ្រឿងរបស់ខ្លួនដែលត្រូវបានទ័ពអ៊ីស្រាអែលបាញ់នៅឆ្នេរសមុទ្រក្នុងតំបន់ហ្កាហ្សាកាលពីឆ្នំា ២០១០ ដោយបានផ្តាច់ជីវិតអ្នកដំណើរចំនួន ១០នាក់។ ដោយឡែក និងក្រៅពីផ្តល់ផលប្រយោជន៍សម្រាប់ប្រទេសខ្លះក្នុងតំបន់ កិច្ចព្រមព្រៀងអ៊ីស្រាអែល និងចលនាហាម៉ាស់ក៏អាចហុចប្រយោជន៍ដល់បស្ចិមលោកផងដែរ ពិសេសនៅក្នុងវិស័យសេដ្ឋកិច្ច និងសន្តិសុខ។
តែទន្ទឹមគ្នានេះ អ្នកជំទាស់នឹងកិច្ចចរចារវាងអ៊ីស្រាអែល និងចលនាហាម៉ាសក៏មានច្រើនដែរ ពិសេសរដ្ឋអំណាចប៉ាឡេស្ទីននៅតំបន់ស៊ីហ្សកដានី។ គួររម្លឹកជូនថា ដែនដីប៉ាឡេស្ទីនសព្វថ្ងៃត្រូវបានចែកចេញជាពីរ នៅម្ខាងគឺតំបន់ហ្កាហ្សាដែលកាន់កាប់ដោយចលនាហាម៉ាស់ និងនៅម្ខាងទៀត គឺតំបន់ស៊ីហ្សកដានីដែលគ្រប់គ្រងដោយចលនាហ្វាតារបស់លោកប្រធានរដ្ឋអំណាចប៉ាឡេស្ទីនម៉ាមូដ អាប៉ាស់។ តែគឺខាងលោកម៉ាមូដ អាបាស់ទេដែលសហគមន៍អន្តរជាតិបានទទួលស្គាល់ជាផ្លូវការ។ រីឯហាម៉ាស់ជាចលនាជ្រុលនិយម និងដែលអ៊ីស្រាអែល ក៏ដូចអាមេរិកបានចាត់ទុកជាចលនាភេរវនិយម។
គឺពួកហាម៉ាស់នេះឯងដែលបានចេញមុខប្រឆំាងអ៊ីស្រាអែលពេញទំហឹង។ គឺពួកហាម៉ាស់នេះឯងដែលទ័ពអ៊ីស្រាអែលបានបើកការវាយប្រហារជារឿងៗ ហើយគឺពួកហាម៉ាស់ដដែលនេះហើយដែលបានធ្វើឲ្យអ៊ីស្រាអែលកំពុងឈឺក្បាលជារៀងរាល់ថ្ងៃ។ អ៊ីចឹងហើយបានជាមានសំណួរមួយចោទឡើងថា តើទង្វើដែលអ៊ីស្រាអែល និងហាម៉ាស់បានសុខចិត្តចរចាជាមួយគ្នាពេលនេះ មិនមែនជាការដោះដូរ ធ្វើសម្បទានឲ្យគ្នាទៅវិញ ទៅមកដើម្បីសេចក្តីសុខរៀងៗខ្លួនទេ ឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ