ជំនួបកំពូល អាស៊ី-អឺរ៉ុប លើកទី១០ នៅទីក្រុងមីឡង់ ប្រទេសអ៊ីតាលី
ចុះផ្សាយនៅថ្ងៃ៖
ស្តាប់ - ០៦:០៤
ជំនួបកំពូល អាស៊ី-អឺរ៉ុប លើកទី១០ បានចាប់ផ្តើមហើយ នៅទីក្រុងមីឡង់ ប្រទេសអ៊ីតាលី ចាប់តាំងពីថ្ងៃព្រហស្បតិ៍ទី១៦តុលានេះ រហូតដល់ថ្ងៃសុក្រទី១៧។ ប្រធានបទនៃការពិភាក្សាគ្នា ដែលមានរយៈពេលពីរថ្ងៃ របស់ជំនួបកំពូលនេះ គឺផ្តោតទៅលើ ការទទួលខុសត្រូវរួម ក្នុងកំណើនសេដ្ឋកិច្ច និងវិស័យសន្តិសុខ។ ដោយឡែកវេទិកា នេះក៏ជាឱកាសមួយ អនុញ្ញាតឲ្យមេដឹកនាំធំៗរបស់បណ្តាប្រទេសនៅអឺរ៉ុប និងអាស៊ី ជួបពិភាក្សាគ្នាក្រៅផ្លូវការ ស្តីពីបញ្ហាវិបត្តិផ្សេងៗ ដែលចោទឡើង តួយ៉ាង ដូចជាវិបត្តិនៅអ៊ុយក្រែនជាដើម។
ជំនួបកំពូលអាស៊ី-អឺរ៉ុប៖
ជំនួបកំពូល អាស៊ី-អឺរ៉ុប មិនមែនជាអង្គការ រឺស្ថាប័នផ្លូវការ ដូចជាសមាគមន៍អាស៊ាន រឺក៏សហភាពអឺរ៉ុបទេ វាគ្រាន់តែជាវេទិកាមិនផ្លូវការ ដែលអនុញ្ញាតឲ្យប្រទេសពីអឺរ៉ុប និងអាស៊ី ជួបពិភាក្សា ផ្លាស់ប្តូរយោបល់គ្នាប៉ុណ្ណោះ។ ជំនួបកំពូលអាស៊ី-អឺរ៉ុបនេះ ត្រូវបានបង្កើតឡើងដំបូង ក្រោមការផ្តួចផ្តើមគំនិតរបស់បារាំង និងសឹង្ហបុរី នៅឆ្នាំ1996។ កាលពីដំបូង មានប្រទេស២៦ បានចូលរួមជាសមាជិក ហើយឥឡូវនេះ មានសមាជិកទាំងអស់៥១ ដែលក្នុងនោះមានប្រទេសសមាជិកអាស៊ានទាំង១០ និងសមាគមន៍អាស៊ានផ្ទាល់តែម្តង រួមជាមួយ ប្រទេសផ្សេងៗទៀតដូចជាចិន ជប៉ុនជាដើម តំណាងឲ្យខាងអាស៊ី ហើយផ្នែកអឺរ៉ុបវិញ មានប្រទេស២៧ ជាមាជិកសហភាពអឺរ៉ុប និងប្រទេសមួយចំនួនទៀត ដែលមិននៅក្នុងសហភាពអឺរ៉ុប ដូចជាន័រវែហ្ស និងរុស្ស៊ីជាដើម។ វេទិកាកំពូលនេះ ត្រូវគេរៀបចំឡើង ក្នុងរវាង២ឆ្នាំម្តង ដោយត្រូវឆ្លាស់គ្នា ម្តងធ្វើនៅក្នុងប្រទេសអាស៊ី ម្តងធ្វើនៅប្រទេសអឺរ៉ុប។
វេទិកាអាស៊ី-អឺរ៉ុប មានគោលដៅពិភាក្សាគ្នា លើប្រធានបទទូលំទូលាយណាស់ ដោយរាប់បញ្ចូលទំាងបញ្ហាសេដ្ឋកិច្ច និងទំនាក់ទំនងពាណិជ្ជកម្មរវាង អាស៊ីនិងអឺរ៉ុប ព្រមទាំងបញ្ហានយោបាយ និងការគោរពសិទ្ធិមនុស្សផងដែរ។ ប្រធានបទចំបងមួយទៀតនោះ គឺកិច្ចសហប្រតិបត្តិការ ផ្លាស់ប្តូរបទពិសោធន៍ លើវិស័យមួយចំនួនដូចជា វិស័យអប់រំ សុខាភិបាល វិស័យការងារ និងការការពារបរិស្ថានជាដើម។
ការទទួលខុសត្រូវរួម ក្នុងការអភិវឌ្ឍន៍សេដ្ឋកិច្ច និងវិស័យសន្តិសុខ៖
ជំនួបកំពូលលើកទីដប់ដែលកំពុងតែធ្វើឡើងនៅទីក្រុងមីឡង់ ប្រទេសអ៊ីតាលី នាពេលនេះ ធ្វើឡើងក្រោមប្រធានបទ ស្តីពី ការទទួលខុសត្រូវរួមគ្នា ដើម្បីលើកកម្ពស់កំណើនសេដ្ឋកិច្ច និងវិស័យសន្តិសុខ។ មានន័យថា វាមិនមែនផ្តោតសំខាន់តែទៅលើកិច្ចសហប្រតិបត្តិការសេដ្ឋកិច្ចនោះទេ។ ការទទួលខុសត្រូវរួមគ្នា មានន័យថា ទាំងអឺរ៉ុប ទាំងអាស៊ី ត្រូវមានគោលនយោបាយសេដ្ឋកិច្ច ស្មើភាពគ្នា ក្នុងការពង្រឹងកំណើនសេដ្ឋកិច្ច ទាំងសងខាង ដើម្បីជួយគ្នា លប់បំបាត់ភាពក្រីក្រ បន្តិចម្តងៗ។ ដូចយើងដឹងស្រាប់ ថា ប្រទេសអាស៊ីមួយចំនួនធំ មានសេដ្ឋកិច្ច មិនទាន់រីកចំរើន ហើយប្រជាជនភាគច្រើន រស់នៅក្រោមបន្ទាត់នៃភាពក្រីក្រ។ កិច្ចសហប្រតិបត្តិការសេដ្ឋកិច្ច មិនមែនមានន័យថា ប្រទេសធំៗគេមករកស៊ី កើបលុយនៅក្នុងប្រទេសក្រីក្រ ហើយមិនរវីរវល់ ទុកឲ្យប្រជាជនប្រទេសទាំងនោះនៅតែក្រវេទនាដដែលនោះទេ។ គឺគេត្រូវធ្វើយ៉ាងណា ដើម្បីឲ្យកំណើនសេដ្ឋកិច្ច បានផ្តល់ផលប្រយោជន៍ជាក់លាក់ ទៅដល់ប្រទេសក្រីក្រ ពោលគឺប្រជាជននៅតាមបណ្តាប្រទេសទាំងនោះ ឲ្យគ្នាបានក្រេបជញ្ជក់លទ្ធផល វិជ្ជមានដែលបានមកពី ការវិនិយោគទន់ និងការបង្កើតការងារធ្វើ។
ទាក់ទងទៅនឹងវិស័យសន្តិសុខវិញ វាសំខាន់ណាស់ដើម្បីធានាបាននូវ និរន្តរភាពនៃការអភិវឌ្ឍន៍។ សន្តិសុខនេះ មិនមែនសំដៅតែទៅលើ សន្តិសុខផ្លូវកាយ ថាមានចោររឺអត់នោះទេភារី។ សន្តិសុខក្តោបទាំងអស់ ទាំងសុវត្ថិភាពទូទៅទាក់ទិនទៅនឹងសន្តិសុខប្រចាំថ្ងៃ និងការកាត់បន្ថយបទឧក្រិដ្ឋផ្សេងៗក្នុងសង្គម ប៉ុន្តែ វា ក៍សំដៅទៅលើសន្តិសុខ ផ្នែកចំណីអាហារ ការគោរពច្បាប់ និងការការពារជាតិជាដើម។ គោលដៅ នៃជំនួបកំពូលលើកនេះ គឺចង់ឲ្យប្រទេសទាំងអស់ ទាំងអាស៊ី ទាំងអឺរ៉ុប ត្រូវចេះជួយគ្នា កុំសម្លឹងឃើញតែផលប្រយោជន៍សេដ្ឋកិច្ច តែរៀងៗខ្លួន។
វិបត្តិនៅអ៊ុយក្រែន៖ ប្រធានបទមិនផ្លូវការ តែមានការចាប់អារម្មណ៍ខ្ពស់
ថ្វីត្បិតតែមានប្រធានបទពិភាក្សាដោយឡែក ដែលនឹងត្រូវលើកមកពិភាក្សា ក្នុងជំនួបកំពូលលើកនេះ ក៏ប៉ុន្តែ អ្វីដែលគេកំពុងតែរងចាំតាមដាននោះ គឺជំនួបក្រៅផ្លូវការរវាង ប្រធានាធិបតីរុស្ស៊ី និងប្រធានាធិបតីអ៊ុយក្រែន នៅព្រឹកថ្ងៃ ទី១៧តុលា ទាក់ទិនទៅនឹងការស្វែងរកដំណោះស្រាយ ដើម្បីបញ្ចប់វិបត្តិនៅភាគខាងកើតអ៊ុយក្រែន ដែលបានអូសបន្លាយជាយូរមកហើយ។
សូមបញ្ជាក់ថា រហូតមកដល់ពេលនេះ ថ្វីត្បិតតែមានការព្រមព្រៀងបណ្តោះអាសន្នដាក់អាវុធចុះ ក៏ប៉ុន្តែគេនៅតែឃើញមានការបាញ់ផ្លោងទៅវិញទៅមករវាង ពួកឧទ្ទាមផ្តាច់ទឹកដីនិយមរុស្ស៊ី និងកងទាហានរដ្ឋាភិបាលអ៊ុយក្រែនដដែល។ លោកពូទីន ក៏នឹងជួបជាមួយលោកស្រី អង់ហ្គេឡា មែគែល ប្រមុខរដ្ឋាភិបាលអាល្លឺម៉ង់ផងដែរ។ ប៉ុន្តែបើតាម ការវិភាគ មួយចំនួន គេមិនសូវជាសង្ឃឹមថា ជំនូបក្រៅផ្លូវការនេះ នឹងផ្តល់លទ្ធផលជាដុំកំភួនអីទេ។ គ្មាននរណាជឿថា ការដែលលោកពូទីនព្រមមកជួបជាមួយលោកប៉ូរូឆិនកូ នឹងមានន័យថា រុស្ស៊ីព្រមបន្ទន់ឥរិយាបថ ដកទ័ពចេញពីអ៊ុយក្រែននោះទេ។ គ្រប់គ្នាយល់ថា លោកពូទីនធ្វើជាល្អយកតែមុខប៉ុណ្ណោះ ព្រោះថា នៅឯអ៊ុយក្រែនឯណោះ ទាហានរុស្ស៊ី នៅពេញដដែល។
មុននេះមួយថ្ងែ លោកចន ឃែរី ប្រមុខការទូតអាមេរិក បានមកបារាំង ហើយបានឆ្លៀតពិភាក្សាគ្នា ទាក់ទិនទៅនឹង ការដកទណ្ឌកម្មសេដ្ឋកិច្ចចេញពីលើរុស្ស៊ី។ ទាំងបារាំងទាំងអាមេរិក ព្រមគ្នា ថាក្នុងពេលនេះ គេមិនទាន់អាចដកទណ្ឌកម្មបានទេ ព្រោះរុស្ស៊ីនៅមិនទាន់បង្ហាញឲ្យឃើញ ពីភាពស្មោះសរបស់ខ្លួន ក្នុងការបញ្ចប់វិបត្តិនៅអ៊ុយក្រែននៅឡើយ។ ថ្នាក់ដឹកនាំ អឺរ៉ុបខ្លះ មិនទាំងចង់ ឲ្យលោកពូទីន មកចូលរួមជំនួបកំពូលនេះផង។
សូមបញ្ជាក់ផងដែរថា ក្រៅតែពីវិបត្តិនៅអ៊ុយក្រែន វិបត្តិនៅក្នុងឈូងសមុទ្រចិនខាងត្បូង ក៏អាចជាចំណុចរសើបផងដែរ ព្រោះថា បញ្ហានេះ បានធ្វើឲ្យប្រទេសនៅអាស៊ីមួយចំនួន ដូចជាជប៉ុន វៀតណាម និងហ្វីលីពីន មើលមុខគ្នាមិនត្រង់ជាមួយនឹងចិន។ មួយវិញទៀត ជំនួបកំពូលអាស៊ី-អឺរ៉ុបលើកនេះ បានអនុញ្ញាតឲ្យ លោកប្រាយុទ្ធ ចន្ទអូចារ បានចេញមុខលើឆាកអន្តរជាតិជាលើកទីមួយ ក្នុងនាមជាប្រមុខរដ្ឋាភិបាលថៃ បន្ទាប់ពីគាត់បានធ្វើរដ្ឋប្រហារយោធា កាលពីខែឧសភាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ