អាស៊ានបបួលចិនអោយចាប់ផ្តើមបង្កើតក្រមប្រតិបត្តិសមុទ្រចិនខាងត្បូង
ក្រោយពីបានលើកពេលជំនួបម្តងកាលពីពេលព្រឹកនិងការពន្យារពេលនៃកិច្ចប្រជុំរហូតដល់ល្ងាចថ្ងៃពុធនេះ កិច្ចប្រជុំអាស៊ានចិនបានចាប់ផ្តើម។ រដ្ឋមន្ត្រីការបរទេសវៀតណាម និងរដ្ឋមន្ត្រីការបរទេសចិនគឺជាសហប្រធាននៃកិច្ចប្រជុំនេះ។ នៅក្នុងសុន្ទរកថាបើកកិច្ចប្រជុំ រដ្ឋមន្ត្រីការបរទេសវៀតណាម បានហៅភាគីអោយចាប់ផ្តើមជជែកអំពីការបង្កើតក្រមប្រតិបត្តិស្តីពីសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:០៣
ក្រមប្រតិបត្តិនៃសមុទ្រចិនខាងត្បូងនៅតែជាប្រធានបទក្តៅគគុកនៅក្នុងកិច្ចប្រជុំអាស៊ានពេលនេះ។ ជាប្រធានបទសំខាន់សម្រាប់ប្រជាជាតិអាស៊ីអាគ្នេយ៍ដោយសារតែសមាជិក៤របស់ខ្លួនរួមមានវៀតណាម ហ្វីលីពីន ប្រ៊ុយនេ និងម៉ាឡេស៊ីកំពុងមានជម្លោះដែនសមុទ្រជាមួយចិន ហើយអាស៊ានកំពុងរួមគ្នាចងក្រងសេចក្តីព្រាងក្រមប្រតិបត្តិមួយដើម្បីអោយមានកំលាំងខ្លាំងទៅជជែកជាមួយដៃគូជម្លោះគឺមហាអំណាចចិន។
វាក៏ជាប្រធានសំខាន់សម្រាប់ចិនដែរ ក្នុងន័យថាចិនមិនចង់មានរបៀបវារៈនេះត្រូវជជែកជាទ្រង់ទ្រាយធំនៅក្នុងក្របខណ្ឌកិច្ចប្រជុំថ្នាក់តំបន់នោះឡើយ។ ជាក់ស្តែងពីទីក្រុងប៉េកាំងម្សិលមិញ អ្នកនាំពាក្យក្រសួងការបរទេសចិនបានថ្លែងព្រមានអាស៊ានមិនឲ្យអាស៊ានលើកយកបញ្ហាជម្លោះសមុទ្រចិនខាងត្បូងនេះទៅដាក់ក្នុងកិច្ចប្រជុំវេទិកាតំបន់អាស៊ានឡើយ។
នៅក្នុងថ្ងៃពុធនេះ ក្នុងចំណោមកិច្ចប្រជុំរវាងអាស៊ាននិងដៃគូរក៏មានដែរកិច្ចប្រជុំអាស៊ានចិន។ ប៉ុន្តែកិច្ចប្រជុំនេះត្រូវបានលើកពេល ពីពេលព្រឹកមកពេលល្ងាចនេះវិញ។ថ្លែងសុន្ទរកថាបើកកិច្ចប្រជុំអាស៊ានចិន ដែលដឹកនាំដោយសហប្រធានជារដ្ឋមន្ត្រីការបរទេសវៀតណាម និងចិន រដ្ឋមន្ត្រីការបរទេសវៀតណាមក្នុងនាមអាស៊ាន បានបបួលភាគីចិនអោយជជែកអំពី ក្រមប្រតិបត្តិសមុទ្រចិនខាងត្បូងនេះ។ ក្នុងចំណោមប្រធានបទដែលទាក់ទងនឹងការពង្រឹងភាពជាដៃគូយុទ្ធសាស្ត្ររវាងអាស៊ាននិងចិន រដ្ឋមន្ត្រីការបរទេសវៀតណាមនិយាយថាយើងសង្ឃឹមថានឹងអាចចាប់ផ្តើមការពិភាក្សាជាផ្លូវការអំពីការបង្កើតក្រមប្រតិបត្តិសមុទ្រចិនខាងត្បូង។ភាគីចិនវិញដែលតំណាងដោយរដ្ឋមន្ត្រីការបរទេសលោក យ៉ាង ជាឈីនៅក្នុងសុន្ទរកថារបស់ខ្លួនចិនមិនបានលើកឡើងមួយម៉ាត់អំពីបញ្ហាក្រមប្រតិបត្តិនេះឡើយ។
សូមរម្លឹកថា នៅពេលដែលអាស៊ានកំពុងរួមគ្នាបង្កើតក្រមប្រតិបត្តិដោះស្រាយជម្លោះសមុទ្រចិនខាងត្បូងនេះ ចិនបានបង្ហាញជំហរចង់ដោះស្រាយជាមួយប្រទេសសមាជិកអាស៊ាននីមួយៗដែលជម្លោះជាមួយចិន។ ហើយចិនក៏មិនចង់អោយអាស៊ានយកប្រធានបទនេះ ទៅជជែកនៅក្នុងវេទិកាតំបន់អាស៊ាននៅថ្ងៃព្រហស្បតិ៍ស្អែកនោះ ដែរ។
អ្នកនាំពាក្យក្រសួងការបរទេសចិនបាននិយាយកាលថ្ងៃម្សិលមិញថាវេទិកាតំបន់អាស៊ានគឺជាវេទិកាសំខាន់សម្រាប់ការជជែកអំពីការពង្រឹងសហប្រតិបត្តិការ និងការកសាងការជឿទុកចិត្តគ្នារវាងភាគី។ ប៉ុន្តែវាមិនមែនជាកន្លែងត្រឹមត្រូវដែលត្រូវនិយាយអំពីបញ្ហាសមុទ្រ ចិនខាងត្បូងនោះទេ។
ចិននៅតែបង្ហាញជំហរតឹងរ៉ឹងលើការបង្កើតសេចក្តីព្រាងក្រមប្រតិបត្តិដែលស្នើឡើងដោយអាស៊ាន។ នៅក្រោយកិច្ចប្រជុំអាស៊ានចិននៅល្ងាចថ្ងៃពុធនេះ អនុរដ្ឋមន្ត្រីការបរទេសចិនលោកស្រី ហ្វ៊ូ យីង បានប្រាប់អ្នកកាសែតថា ចិនចង់ពិចារណាដោយម៉ត់ចត់ទៅលើសំណើរបស់អាស៊ាន ដើម្បីមើលពីលទ្ធភាពនៃការពិភាក្សាលើក្រមប្រតិបត្តិនេះ។ លោកស្រី បន្តទៀតថា រដ្ឋមន្ត្រីការបរទេសចិន ចង់យកចិត្តទុកដាក់លើបញ្ហានេះ ដើម្បីធ្វើយ៉ាងណាឲ្យមានលក្ខខណ្ឌល្អសម្រាប់ការពិភាក្សានៅពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ