គ.ជ.ប.ហុងកុងច្រានចោលបេក្ខភាពឈរឈ្មោះរបស់សកម្មជនប្រជាធិបតេយ្យ Joshua Wong
ចុះផ្សាយនៅថ្ងៃ៖
ស្តាប់ - ០៦:២៣
នៅហុងកុង នៅថ្ងៃអង្គារ ទី២៩តុលា គណៈកម្មាធិការរៀបចំការបោះឆ្នោតថ្នាក់មូលដ្ឋាន បានបដិសេធមិនទទួលឈ្មោះបេក្ខជន Joshua Wong ដែលជាសកម្មជនដ៏លេចធ្លោ ខាងទាមទារលទ្ធិប្រជាធិបតេយ្យហុងកុង។ ដំណឹងពីការច្រានចោលបេក្ខភាពនេះ ត្រូវលោក Joshua Wong ប្រកាសប្រាប់អ្នកសារព័ត៌មានដោយខ្លួនឯងតែម្តង បន្ទាប់ពីបានតវ៉ានិងសាកសួរបញ្ជាក់អាជ្ញាធរពីរបីដងរួចមកហើយ។ សកម្មជនរូបនេះ លើកឡើងថា រដ្ឋអំណាចហុងកុង បានរំលោភសិទ្ធិជាមូលដ្ឋានរបស់ប្រជាពលរដ្ឋ និងថែមទាំងបានរំលោភសិទ្ធចូលរួមធ្វើនយោបាយរបស់ខ្លួនថែមទៀតផង។ អ្នកវិភាគនយោបាយអន្តរជាតិ បញ្ជាក់ថា ការបដិសេធនេះ គឺគ្មានអ្វីក្រៅពីសកម្មភាពនយោបាយក្នុងការទាមទារលទ្ធិប្រជាធិបតេយ្យ និងការសកម្មភាពនៅបរទេសក្នុងការស្នើសុំសហគមន៍អន្តរជាតិយកចិត្តទុកដាក់ជួយឱ្យហុងកុងទទួលបានឯករាជ្យ។ ចំពោះអាជ្ញាធរហុងកុង, សកម្មភាពទាំងនេះ គឺផ្ទុយពីធម្មនុញ្ញរបស់ហុងកុង ដែលចែងថាហុងកុងជាដែនដីរបស់ចិន។ ការមិនទទួលបេក្ខភាពរបស់ Joshua Wong ឱ្យឈរឈ្មោះបោះឆ្នោតនេះ នឹងបង្កជាក្តីក្តៅក្រហាយកាន់តែខ្លាំងបន្ថែមទៀត ចំពោះមហាបាតុកម្មជាច្រើនខែមកនេះ និងដែលហាក់ប្រៀបបានដូចយកសាំងទៅចាក់លើភ្លើងដូច្នោះដែរ។
តើមានមូលហេតុអ្វីខ្លះ បានជាគណៈកម្មាធិការរៀបចំការបោះឆ្នោត មិនព្រមទទួលរូបលោកឱ្យឈរឈ្មោះយ៉ាងដូច្នោះ?
មូលហេតុផ្លូវការចេញពីគណៈកម្មាធិការរៀបចំការបោះឆ្នោតហុងកុង គឺគ្មានទេ ព្រោះគណៈកម្មការបោះឆ្នោត គ្មានពន្យល់ ឬបកស្រាយអ្វីសោះឡើយ។ តែលោក Joshua Wong ខ្លួនឯង ដែលប្រាប់ដំណឹងថា ឯកសារសុំឈរឈ្មោះឱ្យគេបោះឆ្នោត មិនត្រូវទទួលក្តីអនុញ្ញាតនោះទេ។ ពេលធ្វើសន្នីសីទកាសនៅថ្ងៃអង្គារនេះ លោកយល់ឃើញថា គណៈកម្មាធិការរៀបចំការបោះឆ្នោត ធ្វើតាមខ្សែញាក់របស់អាជ្ញាធរហុងកុង គឺជាការសម្រេចចិត្តដោយផ្អែកលើនិន្នាការនយោបាយសុទ្ធសាធ។ ហេតុនេះហើយ សកម្មជន Joshua Wong បានថ្កោលទោសរដ្ឋអំណាចហុងកុង ថាបានបំបិទសិទ្ធិចូលរួមនយោបាយ។
ក្នុងពេលភ្លាមៗ អ្នកនាំពាក្យអាជ្ញាធររដ្ឋអំណាចហុងកុង បានចេញមុខបកស្រាយថា ការច្រាលចោលបេក្ខភាពនេះ មិនមែនដោយសារការសម្រេចិត្តតាមផ្លូវនយោបាយដែលតាក់តែងដោយរដ្ឋអំណាចនោះទេ, ហើយក៏គ្មានការបំបិទសិទ្ធិសេរីភាពក្នុងការឈរឈ្មោះអ្វីដែរ។ បើតាមអ្នកនាំពាក្យអាជ្ញាធរហុងកុងដដែល , គឺពលរដ្ឋគ្រប់ៗគ្នាអាចមានសិទ្ធិឈ្មោះឈរឱ្យគេបោះឆ្នោតបាន ក៏ប៉ុន្តែ បើបេក្ខជនណាមួយ គ្មានលក្ខណៈសម្បត្តិគ្រប់គ្រាន់ដែលកំណត់ដោយច្បាប់ នោះគឺច្បាស់ជាមិនត្រូវបានស្វាគមន៍ឡើយ។
ក្នុងក្រសែភ្នែកអ្នកវិភាគនយោបាយ និងអ្នកជំនាញកិច្ចការអាស៊ី, ការបដិសេធមិនទទួលបេក្ខភាពរបស់ Joshua Wong ឱ្យឈរឈ្មោះបោះឆ្នោតនេះ គឺគ្មានអ្វីក្រៅពីសកម្មភាពនយោបាយក្នុងការទាមទារលទ្ធិប្រជាធិបតេយ្យរបស់លោកនោះទេ។ Joshua Wong ជាយុវជនក្លាហាន វ័យក្មេង អាយុ២២ឆ្នាំ និងជានិស្សិតរៀនផ្នែកវិទ្យាសាស្ត្រនយោបាយ។ លោកត្រូវអាជ្ញាធរចាប់ឃុំឃាំងច្រើនដងហើយ ចេញចូលពន្ធនាគារដូចចេញចូលរោងល្ខោនទៅហើយ គឺជាប់ពន្ធនាគារចំនួនបួនដងរួចហើយ តាំងពីពេលដែលដឹកនាំបាតុកម្មបដិវត្តន៍ឆ័ត្រ នៅឆ្នាំ២០១៤មក។ នៅខែសីហា កន្លងទៅនេះ ពេលដែលបាតុកម្មនៅហុងកុង កំពុងតែក្តៅពេញបន្ទុក គាត់បានចេញទៅបរទេស, ទៅអឺរ៉ុបនិងអាមេរិក ដើម្បីស្នើសុំសហគមន៍អន្តរជាតិ ជួយឱ្យហុងកុងទទួលបានឯករាជ្យផ្តាច់ពីចិនប៉េកាំង។ ចំពោះអាជ្ញាធរហុងកុង, ទង្វើនេះ គឺផ្ទុយពីធម្មនុញ្ញរបស់ហុងកុង ដែលចែងថាជាដែនដីរបស់ចិន។
ការបដិសេធមិនទទួលបេក្ខភាពរបស់ Joshua Wong ឱ្យឈរឈ្មោះបោះឆ្នោតនេះ គឺមិនមែនជាលើកទីមួយទេ! កាលពីឆ្នាំមុន នាង Agnes Chow សមាជិកាបក្ស Demosisto ដូចលោក Joshua Wong ដែរ ក៏ត្រូវគណៈកម្មាធិការរៀបចំការបោះឆ្នោតហុងកុង ច្រានចោលបេក្ខភាពឈរឈ្មោះបោះឆ្នោតដែរ។ ហើយបើគេគិត ក្នុងប៉ុន្មានឆ្នាំចុងក្រោយនេះ គឺមានបេក្ខជន៦នាក់ហើយដែល ឋិតក្នុងករណីស្រដៀងគ្នានេះ។
ការបដិសេធបេក្ខភាព របស់ Joshua Wong មិនខុសពីយកសាំងទៅចាក់លើភ្លើង
អ្នកស្រាវជ្រាវម្នាក់ខាងសិទ្ធិមនុស្ស នៅអង្គការ Humain Wright Watch លោកស្រី ម៉ាយ៉ា វាំង បង្ហាញទស្សនៈថា ប្រសិនបើរដ្ឋអំណាចហុងកុងបិទផ្លូវពលរដ្ឋចំពោះការឈរឈ្មោះបោះឆ្នោត, គឺរដ្ឋអំណាចកំពុងតែជំរុញឱ្យពលរដ្ឋចុះផ្លូវ ធ្វើបាតុកម្មកាន់តែច្រើនឡើងថែមទៀតហើយ។ ពីព្រោះថា មានតែបាតុកម្មតាមដងផ្លូវនេះហើយ ទើបពួកគេអាចមានលទ្ធភាពបញ្ចេញសំឡេងរបស់ខ្លួនបាន។
ជារួម ទន្ទឹមនេះ បាតុកម្មកំពុងក្តៅជាច្រើនខែមកផង ការសម្រេចច្រាលចោលបេក្ខភាពរបស់របស់ Joshua Wong គឺជាកម្លាំងចលករជំរុញនិងបញ្ឆេះបាតុកម្មឱ្យរឹតតែខ្លាំងថែមទៀត។
សេដ្ឋកិច្ចហុងកុងកំពុងតែធ្លាក់ដុបដាបខ្លាំង ហើយការធ្លាក់ចុះនេះ នឹងលំបាកស្រង់ដូចដើមណាស់ ប្រសិនបើ បាតុកម្មនៅហុងកុងមិនព្រមឈប់នោះទេ។
ប្រមុខដឹកនាំតំបន់ស្វយ័តហុងកុង លោកស្រី ការី ឡាំ បានចេញមុខប្រកាសជាញឹកញយមកហើយថា សកម្មភាពវិនិយោគសេដ្ឋកិច្ចហុងកុងធ្លាក់ចុះ និងប៉ះពាល់ធ្ងន់ធ្ងរ ដោយសារបាតុកម្មរ៉ាំរ៉ៃជាច្រើនខែមកនេះ។ លោកស្រី ការី ឡាំ ក៏ធ្លាប់បានប្រៀបធៀបការខាតបង់សេដ្ឋកិច្ចក្នុងរយៈកាលនេះ ទៅនឹងវិបត្តិសេដ្ឋកិច្ចឆ្នាំ២០០៣ និងក៏ប្រៀបប្រដូចនឹងវិបត្តិសេដ្ឋកិច្ចពិភពលោក២០០៨ ដូច្នេះដែរ។ វិស័យទេសចរណ៍វិញ! សណ្ឋាគារ ផ្ទះសំណាក់ ល្ហល្ហេវ គ្មានទេសចរបរទេសច្រើនទេ ហើយវិស័យចរណ៍ ពិសេសខាងដំណើរកម្សាន្តជាក្រុម គឺធ្លាក់ចុះ ដល់ទៅជាង៥០ភាគរយឯណោះ។
នាពេលកន្លងមក រដ្ឋអំណាចហុងកុង និងប៉េកាំង ហាក់ធ្វើសម្បទានតិចតួចបំផុត ឬស្ទើរតែគ្មាន សម្រាប់ការឆ្លើយតបតាមការទាមទាររបស់ក្រុមបាតុករ។ បាតុករទាមទារឱ្យបោះឆ្នោតជ្រើសរើសថ្នាក់ដឹកនាំថ្មី, ឱ្យអ្នកដឹកនាំសព្វថ្ងៃលាចេញពីតំណែង និងបើកការស៊ើបអង្កេតចំពោះហិង្សារបស់ប៉ូលីសលើបាតុករ។ អាជ្ញាធរហុងកុង គ្រាន់តែសុខចិត្តលុបចោលពង្រាងច្បាប់ធ្វើបត្យាប័ន ដែលជាដើមហេតុដំបូងនៃបាតុកម្មតែប៉ុណ្ណោះ ក្រៅពីនោះ ហាក់គ្មានឆ្លើយតបតាមសំណើរបស់បាតុករនោះទេ។
ប្រឈមមុខនឹងវិបត្តិកាន់តែធ្ងន់នៃបាតុករសព្វថ្ងៃនេះ! ថ្មីៗនេះ មានលេចឮដំណឹងពីការសែតអង់គ្លេស Financial Times ថាប្រមុខដឹកនាំចិន យល់ព្រមឱ្យប្តូរក្បាលម៉ាស៊ីនដឹកនាំហុងកុង។ ប៉ុន្តែដំណឹងនេះ មិនទាន់មានការបញ្ជាក់ច្បាស់លាស់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ