តុលាការកំពូលប្រកាសលុបចោល លទ្ធផលឆ្នោតប្រធានាធិបតីនៅកេនយ៉ា
តុលាការកំពូលរបស់ប្រទេសកេនយ៉ានៅថ្ងៃសុក្រទី ១កញ្ញា បានបង្កឲ្យមានការភ្ញាក់ផ្អើលមួយ ដោយបានសម្រេច លុបចោល លទ្ធផលបោះឆ្នោត ប្រធានាធិបតី ដែលបានផ្តល់ជ័យជំនះទៅឲ្យប្រធានាធិបតីផុតអាណត្តិ គឺលោកយូរូ កេនយ៉ាតា។ ក្រុមប្រឆាំងកេនយ៉ាបានស្វាគមការសម្រេចរបស់ចៅក្រមតុលាការកំពូល។ បក្សកាន់អំណាចបានរិះគន់ការសម្រេចរបស់តុលាការកំពូលថា មានលក្ខណៈនយោបាយ ប៉ុន្តែ សន្យាថា នឹងទទួលធ្វើតាមការសម្រេចរបស់ស្ថាប័នច្បាប់កំពូលរបស់ប្រទេស។
ចុះផ្សាយនៅថ្ងៃ៖
តុលាការកំពូលកេនយ៉ាបានប្រកាស ចាត់ទុក ជ័យជំនះរបស់លោកយូរូ កេនយ៉ាតា ប្រធានាធិបតី អស់អាណត្តិ ថា ជាមោឃៈ ក្នុងហេតុផលថា ការបោះឆ្នោតប្រធានាធិបតី កាលពីថ្ងៃទី ៨សីហាកន្លងទៅ ត្រូវបានរៀបចំឡើង ដោយមិនសមស្រប ទៅតាមរដ្ឋធម្មនុញ្ញ។ នៅ នេះជាលើកទី១ ក្នុងប្រវត្តិសាស្រ្តអាហ្រ្វិក និងនៅកេនយ៉ា ដែលតុលាការកំពូលសម្រេចលុបចោល លទ្ធផលបោះឆ្នោតប្រធានាធិបតី
ក្នុងសេចក្តីសម្រេច នៅថ្ងៃសុក្រ នេះ ចៅក្រមរបស់តុលាការកំពូលកេនយ៉ាលើកឡើងថា ចៅក្រមយល់ស្របនឹងការលើកឡើងដែលថា មានភាពខុសច្បាប់ និងភាពមិនប្រក្រតីការបានកើតឡើង បោះឆ្នោតប្រធានាធិបតី កន្លងមក។ ជាលទ្ធផល តុលាការបានសម្រេចចាត់ទុកលទ្ធផលបោះឆ្នោតនៅថ្ងៃទី ៨សីហា ជាមោឃៈ និងបានបញ្ជាឲ្យគណៈកម្មាធិការរៀបចំការបោះឆ្នោតជាតិ កេនយ៉ា រៀបចំការបោះឆ្នោតប្រធានាធិបតីថ្មី មួយទៀត នៅក្នុងរយៈពេល យ៉ាងយូរ ៦០ថ្ងៃ ចាប់ពីថ្ងៃប្រកាសសាលក្រមរបស់តុលាការ។
នៅក្នុងការសម្រេចរបស់ខ្លួន ចៅក្រមតុលាការកំពូលបានស្តីបន្ទោស ផងដែរ គណៈកម្មាធិការរៀបចំការបោះឆ្នោតជាតិកេនយ៉ា ដែលបានបរាជ័យ ធ្វេសប្រហែស និងបដិសេធមិនព្រមរៀបចំការបោះឆ្នោត ឲ្យសមស្របតាមរដ្ឋធម្មនុញ្ញរបស់ប្រទេស។
មេដឹកនាំបក្សប្រឆាំង លោក រ៉ៃឡា អូឌីហ្គា បានត្រេកអ ស្វាគមការសម្រេចរបស់តុលាការកំពូល ប៉ុន្តែ លោកអះអាងថា លោកគ្មានជំនឿ លើគណៈកម្មាធិការរៀបចំការបោះឆ្នោតជាតិតទៅទៀតនោះទេ។ តាំងពីនៅមុនប្រកាសលទ្ធផលបោះឆ្នោត ដែលបានផ្តល់ជ័យជំនះ ទៅឲ្យប្រធានាធិបតីផុតអាណត្តិ គឺលោកយូរូ កេនយ៉ាតា គណបក្សប្រឆាំងបានបរិហាររិះគន់ពីភាពមិប្រក្រតី និងការលួចបន្លំសន្លឹកឆ្នោត ដើម្បីជ័យជំនះរបស់បក្សកាន់អំណាច។
តាមលទ្ធផលបោះឆ្នោត ប្រកាសនៅថ្ងៃទី ១១សីហា លោកប្រធានាធិបតីអស់អាណត្តិ យូរូ កេនយ៉ាតាទទួលជ័យជំនះ ជាមួយនឹងសំឡេង គាំទ្រ ៥៤,៧២% គឺច្រើនជាង មេដឹកនាំបក្សប្រឆាំង តែជាង ១លានសំឡេងតែប៉ុណ្ណោះ។ លោក រ៉ៃឡា អូឌីហ្គាដែលដឹកនាំបក្សប្រឆាំងរហូតមក ត្រូវបានបក្ស និងសហគមន៍អន្តរជាតិលើកទឹកចិត្ត ឲ្យដាក់ពាក្យបណ្តឹងទៅតុលាការ ជាជាង ដឹកនាំមនុស្សឲ្យធ្វើបាតុកម្ម ហិង្សា ប្រឆាំងនឹងលទ្ធផលបោះឆ្នោត។ នៅក្រោយ ការប្រកាសលទ្ធផលឆ្នោត បាតុកម្មហិង្សាប្រឆាំងនឹងជ័យជំនះ របស់លោកកេនយ៉ាតា បានសម្លាប់មនុស្ស ២១នាក់។ កេនយ៉ា នៅតែជាប់ស្នាមជានិច្ច អំពើហិង្សានៅក្រោយថ្ងៃបោះឆ្នោត នៅឆ្នាំ ២០០៨ ដែលកាលណោះ បានសម្លាប់មនុស្ស ជាង១ពាន់នាក់ និងមនុស្សជាង ៦សែននាក់ត្រូវផ្លាស់ទី ដោយសារអំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ