លោក Donald Trump កំពុងបាត់សម្លេងឆ្នោតនៅរដ្ឋយូថាស៍ (Utah)
ចុះផ្សាយនៅថ្ងៃ៖
ស្តាប់ - ០៤:០៦
លោក Donald Trump កំពុងតែបាត់បង់ប្រជាប្រិយភាពនៅរដ្ឋយូថាស៍ (Utah)។ រដ្ឋនេះត្រូវបានគេប្រៀបប្រដូចទៅនឹងបន្ទាយដ៏ធំមួយរបស់គណបក្សសាធារណរដ្ឋអញ្ចឹង។ព្រោះរដ្ឋនេះមានសម្លេងគាំទ្រគណបក្សសាធារណរដ្ឋច្រើនជាងគេបំផុតនៅសហរដ្ឋអាមេរិក។ហើយអស់រយៈពេលកន្លះសតវត្សមកហើយ ដែលរដ្ឋនេះតែងបោះឆ្នោតគាំទ្របេក្ខជនមកពីគណបក្សសាធារណរដ្ឋ។តើហេតុអ្វីបានជារដ្ឋនេះស្រលាញ់គាំទ្រគណបក្សសាធារណរដ្ឋ? តើហេតុអ្វីប្រជាជនរដ្ឋនេះឈប់គាំទ្រលោក Donald Trump?
រដ្ឋយូថាស៍ (Utah) ត្រូវបានគេដឹងថាជាសំបុកអ្នកគាំទ្រគណបក្សសាធារណរដ្ឋអស់រយៈពេលជាង ៥០ ឆ្នាំមកហើយ។ រដ្ឋនេះមានប្រជាជនចំនួន ៣ លាននាក់។ ហើយ ៦០% នៃប្រជាជនជាសមាជិកគ្រឹស្តសាសនានិកាយម័រម៉ុន (Mormon) ឬគេហៅម៉្យាងទៀតថា ព្រះវិហារព្រះយេស៊ូគ្រឹស្តនៃពួកបរិសុទ្ធថ្ងៃចុងក្រោយ (The Church of Jesus Christ of Latter-day Saints)។ ទីស្នាក់ការកណ្តាលរបស់និកាយសាសនានេះមានទីតាំងនៅទីក្រុង Salk Lake City ដែលជារដ្ឋធានីរបស់រដ្ឋយូថាស៍នេះតែម្តង។ ពួកអ្នកមានជំនឿលើនិកាយនេះមានឥទ្ធិពលខ្លាំងណាស់នៅរដ្ឋយូថាស៍នេះ។ ពួកគេ គឺជាក្រុមអ្នកអភិរក្សនិយម ឬអាចហៅម៉្យាងទៀតថា ក្រុមអ្នកស្តាំនិយម ដែលប្រកាន់គោលការណ៍អភិរក្សរក្សាតម្លៃប្រពៃណីសាសនា ។
ជាទូទៅ ពួកគេមិនបោះឆ្នោតឲ្យគណបក្សប្រជាធិបតេយ្យឡើយ ដែលតួយ៉ាងមានលោកស្រី Hillary Clinton ជាបេក្ខនារីប្រធានាធិបតី។ បក្សប្រជាធិបតេ្យត្រូវបានគេស្គាល់ថា ជាបក្សប្រកាន់គោលការណ៍សេរីភាពនិយមរបស់បុគ្គលម្នាក់ៗ ឬហៅម៉្យាងទៀតថាក្រុមអ្នកឆ្វេងនិយម។ ហើយគណបក្សប្រជាធិបតេ្យអាមេរិកតែងធ្វើកំណែទម្រង់ប្រពៃណីសង្គមឥតឈប់ឈរតួយ៉ាងដូចជា ការបែងចែកអំណាចរដ្ឋឲ្យដាច់ចេញពីព្រះវិហារ។ ហើយជាពិសេស គឺគាំទ្រអាពាហ៍អាពិពាហ៍មនុស្សស្រលាញ់ភេទដូចគ្នា ដែលគោលការណ៍នេះផ្ទុយគ្នាស្រឡះពីពួកអ្នកអភិរក្សនិយម។
ប៉ុន្តែ សំរាប់ការបោះឆ្នោតឆ្នាំ ២០១៦ នេះ ពួកអ្នកគាំទ្រគណបក្សសាធារណរដ្ឋរស់នៅក្នុងរដ្ឋនេះប្រហែលជាមិនបោះឆ្នោតឲ្យលោក Donald Trump ទេ។ រឿងអាស្រូវបៀតបៀនផ្លូវភេទ និងសំដី ប្រមាថមើលងាយស្រ្តីភេទកំពុងអូសទាញយុទ្ធនាការឃោសនារបស់លោក Trump ឲ្យធ្លាក់ទឹកជាបណ្តើរៗហើយ។ បច្ចុប្បន្ននេះ លទ្ធផលនៃការស្ទាបស្ទង់មតិមួយបានបង្ហាញឲ្យដឹងថា លោក Donald Trump កំពុងតែបាត់បង់សម្លេងគាំទ្រពីក្រុមគាំទ្រគណបក្សសាធារណរដ្ឋ ដែលមានជំនឿលើព្រះវិហារព្រះយេស៊ូគ្រឹស្តនៃពួកបរិសុទ្ធថ្ងៃចុងក្រោយ។
ការស្ទាប់ស្ទង់មតិកន្លងមកក្នុងរដ្ឋនេះបានឲ្យដឹងថា កាលពីប្រមាណពីរខែមុន លោក Donald Trump មានសម្លេងដឹកមុខគេចំនួន ២០ ពិន្ទុ ដោយប្រជាជនរស់នៅរដ្ឋយូថាស៍គ្រោងបោះឆ្នោតជូន។ ប៉ុន្តែ បន្តិចម្តងៗ អាកប្បកិរិយាមិនសាកសមជាអ្នកដឹកនាំរបស់លោក Trump បានធ្វើឲ្យសម្លេងគាំទ្រថយយ៉ាងគំហុក។ សន្ទស្សន៍ថ្មីបានបង្ហាញថា លោក Trump និងលោកស្រី Clinton មានសម្លេង ២៦% ស្មើគ្នា។ អ្វីដែលចម្លែកទៅទៀតនោះ គឺអ្នកបោះឆ្នោតនៅរដ្ឋយូថាស៍កំពុងតែពពាក់ពពួនគ្នាងាកទៅគាំទ្របេក្ខជនម្នាក់ទៀត គឺលោក Evan McMullin។
អ្នកនយោបាយថ្មីថ្មោងជាអ្នកអភិរក្សនិយមធ្លាប់បម្រើការងារឲ្យទីភ្នាក់ CIA។ ប៉ុន្តែ គាត់ឈរឈ្មោះក្នុងនាមជាបេក្ខជនឯករាជ្យ។ គាត់បានឈរឈ្មោះកាលពីខែសីហាកន្លងទៅនេះ ដោយសារតែមើលឃើញថា ប្រជាជនក្នុងរដ្ឋយូថាស៍គ្មានជំនឿលើលោក Trump។ បច្ចុប្បន្ននេះ អ្នកនយោបាយថ្មីថ្មោងនេះកំពុងតែទទួលបានសម្លេងគាំទ្រ ២២%។ នេះបើយោងតាមការស្ទង់មតិចុងក្រោយ។
សូមជំរាបជូនផងដែរថា ការស្ទង់មតិនេះត្រូវបានធ្វើឡើងតាមរយៈទូរស័ព្ទ ចន្លោះពីថ្ងៃទី១០ ដល់ទី១១ តុលាកន្លងទៅនេះ ក្នុងចំណោមអ្នកមានសិទ្ធិបោះឆ្នោតចំនួន ៥ ពាន់រស់នៅរដ្ឋយូថាស៍។ ក្រុមហ៊ុន Y2 Analytics ប្រចាំក្រុង Salk Lake City ជាអ្នកដឹកនាំការស្ទាប់ស្ទង់មតិនេះ។
សារព័តមាន New York Times បានវិភាគថា ប្រសិនបើគណបក្សសាធារណរដ្ឋរបូតសម្លេងគាំទ្រនៅរដ្ឋយូថាស៍មែននោះ មហន្តរាយធំប្រាកដជាបង្កគ្រោះភ័យដល់គណបក្សសាធារណរដ្ឋមិនខានឡើយ។ ពោល គឺគណបក្សនេះអាចបាត់បង់សន្លឹកឆ្នោតនៅតាមរដ្ឋផ្សេងទៀត ជាពិសេស គឺបាត់បង់អាសនៈនៅព្រឹទ្ធសភា។ សូមបញ្ជាក់ថា ការបោះឆ្នោតនេះ គឺជ្រើសរើសប្រធានាធិបតីថ្មីផង និងជ្រើសរើសសមាជិកព្រឹទ្ធសភាថ្មីចំនួនពាក់កណ្តាលផង។ លើសពីនេះ ការបាត់សម្លេងគាំទ្រនៅរដ្ឋយូថាស៍ក៏ជាគ្រោះថ្នាក់ផងដែរដល់រដ្ឋ Wyoming, រដ្ឋ Kansas, រដ្ឋ Arkansas ឬរដ្ឋ Tennesse ដែលជាសំបុកអ្នកអភិរក្សនិយមគាំទ្រគណបក្សសាធារណរដ្ឋ។
ជាសរុប ការរបូតសម្លេងគាំទ្រពីទឹកដីអភិរក្សនិយមតួយ៉ាងដូចជារដ្ឋយូថាស៍នេះកំពុងតែបង្ហាញ ពីចំនុចខ្សោយរបស់លោក Donald Trump ដែលគ្មានសមត្ថភាពគ្រប់គ្រាន់ប្រមូលសម្លេងគាំទ្រអ្នកអភិរក្សនិយម។ កាលពីឆ្នាំ២០១២ លោក Mitt Romney អតីតៈបេក្ខជនប្រធានាធិបតីតំណាងឲ្យគណបក្សសាធារណរដ្ឋ និងជាសមាជិកនិកាយម័រម៉ុនផងដែរនោះបានទទួលជ័យជំនះយ៉ាងត្រចះត្រចង់នៅរដ្ឋយូថាស៍។ លោក Mitt Romney បានដឹកមុខលោកប្រធានាធិបតី បារ៉ាក់ អូបាម៉ា ចំនួន ៤៨ ពិន្ទុ។ ចំណែក អតីតៈប្រធានាធិបតីសាធារណរដ្ឋ គឺលោក George W. Bush ធ្លាប់បានទទួលសម្លេងគាំទ្រក្នុងរដ្ឋនេះរហូតទៅដល់ ៧០%។
គណបក្សប្រជាធិបតេយ្យធ្លាប់ឈ្នះឆ្នោតនៅរដ្ឋយូថាស៍កាលពីឆ្នាំ១៩៦៤។ ពោល គឺកាលពី ៥២ ឆ្នាំមុន។ ដោយឃើញស្ថានភាពកំពុងតែអំណោយផលឲ្យខ្លួនបែបនេះ បច្ចុប្បន្ននេះ គណបក្សប្រជាធិបតេយ្យកំពុងតែចំណាយថវិការដឹកនាំយុទ្ធនាការទ្រង់ទ្រាយធំនៅតាមរដ្ឋ Arizona និងរដ្ឋ Georgia ដែលតាមទម្លាប់ជារដ្ឋគាំទ្រគណបក្សសាធារណរដ្ឋ។ ជាថ្មីម្តងទៀត បេក្ខភាពប្រធានាធិបតីអាមេរិករបស់លោក Donald Trump កំពុងតែធ្វើឲ្យគណបក្សសាធារណរដ្ឋប្រកាសសញ្ញាអាសន្នហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ