លោកដូណាល់ត្រាំ ក្លាយជាបេក្ខជនប្រធានាធិបតីជាផ្លូវការនិងកំពុងផ្តុំកម្លាំងផ្តួលលោកស្រីគ្លីនតុន
បន្ទាប់ពីមានភាពប្រទាញប្រទង់គ្នាអស់ពីរថ្ងៃ គណបក្សសាធារណរដ្ឋ បានសម្រេចតែងតាំងជាផ្លូវការលោក ដូណាល់ ត្រាំ ជាបេក្ខជនប្រធានធិបតី នៅល្ងាចថ្ងៃអង្គារម្សិលមិញ មុនកាលកំណត់មួយថ្ងៃ ដោយគ្មានបញ្ជាក់មូលហេតុ។ គណបក្សសាធារណរដ្ឋពេលនេះ កំពុងប្រឹងបំភ្លេចភាពប្រេះឆាផ្ទៃក្នុង ហើយងាកមករួបរួមផ្តុំកម្លាំងគ្នា ដើម្បីប្រឈមនឹងសត្រូវរួម គឺបេក្ខនារី ហ៊ីឡារី គ្លីនតុននៃបក្សប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៤៧
គ្មានអ្វីប្រកែកតវ៉ាបានទៀតទេ ! ចាប់ពីថ្ងៃនេះទៅ លោក ដូណាល់ ត្រាំ គឺជាបេក្ខជនប្រធានាធិបតីបក្សសាធារណរដ្ឋ ដោយពិតៗ។ បក្សសាធារណរដ្ឋ បានបោះឆ្នោតផ្តល់ទំនុកចិត្ត លើរូបលោកមហាសេដ្ឋីជាផ្លូវការ សម្រាប់ចូលទៅប្រកួតប្រជែង ក្នុងសម័យបោះឆ្នោតប្រធានាធិបតី នា ខែ វិច្ឆិកាខាងមុខ ដោយត្រូវយកឈ្នះលោកស្រី ហ៊ីឡារី គ្លីនតុននៃបក្សប្រជាធិបតេយ្យ និងដោយចង់ក្លាយជាប្រធានាធិបតី បន្តពីលោក បារ៉ាក់អូបាម៉ា។
នៅទីបំផុត ពិធីតែងតាំងបេក្ខជនប្រធានាធិបតីប្រព្រឹត្តទៅដោយគ្មានភាពតានតឹង ស្របតាមលទ្ធផលនៃការបោះឆ្នោតកន្លងមក ផ្ទុយស្រលះកាលពីប៉ុន្មានខែមុនដែលគ្មាននរណាហ៊ានភ្នាល់លើលោកដូណាល់ត្រាំទេ។ ប៉ុន្តែពិធីប្រព្រឹត្តទៅដោយមានភាពភ្ញាក់ផ្អើលចម្លែកមួយ គឺកូនប្រុសលោកមហាសេដ្ឋីជាអ្នកប្រកាសលទ្ធផល បង្ហាញចំនួនប្រតិភូអ្នកគាំទ្រលោកដូណាល់ត្រាំ នៅញូវយ៉ក។ ទោះជាយ៉ាងនេះក្តី សម្រាប់អ្នកនាំពាក្យគណបក្ស ជោគជ័យនៅថ្ងៃនេះជាសារបញ្ជាក់ថាបក្សសាធារណរដ្ឋមានមូលដ្ឋានគ្រឹះរឹងមាំ និងគ្រប់គ្រងសមាសភាគបក្សបានយ៉ាងពេញលេញ។
ចំណែកអ្នកដែលធ្លាប់ប្រឆាំង ឬដំបៅចាស់ចង់ឬមិនចង់ត្រូវតែជាសះស្បើយនៅចាប់ពីពេលនេះទៅ។ ពាក្យថា “រួបរួមគ្នា” ត្រូវបានប្រកបចេញមាត់តំណាងប្រតិភូជាច្រើនរូប ប៉ុន្តែពេលវេលាដែលមានការស្រែកហ៊ោកញ្ជ្រៀវខ្លាំង ស្រុះគ្នា ក្នុងសំឡេងតែមួយពិតប្រាកដ គឺនៅពេលស្រែកជ័យឃោសបង្អាប់លោកស្រី ហ៊ីលឡារី គ្លីនតុន។
លោកដូណាល់ត្រាំ ដែលគ្មានវត្តមាននៅពេលតែងតាំង ស្របតាមពិធីការបក្ស នឹងត្រូវទទួលយល់ព្រមយកតំណែងជាបេក្ខជន នៅល្ងាចថ្ងៃព្រហស្បតិ៍ជាកិច្ចបិទបញ្ចប់កម្មវិធី រួចទើបផ្តើមសម្រុកចេញធ្វើយុទ្ធនាការឃោសនាបោះឆ្នោតប្រធានាធិបតី ដែលត្រូវប្រព្រឹត្តទៅនៅថ្ងៃទី ៨ វិច្ឆិកា ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ