ចិនខឹងសម្បារនឹងអាមេរិកដែលបញ្ជូននាវាចម្បាំងទៅក្បែរកោះជម្លោះ នៅសមុទ្រចិនខាងត្បូង
ចុះផ្សាយនៅថ្ងៃ៖
ស្តាប់ - ០៥:១០
ក្រោយអាមេរិកបញ្ជូននាវាចម្បាំង USS Stethem ចូលទៅក្បែរកោះTriton សមុទ្រចិនខាងត្បូង បានប៉ុន្មានម៉ោងមក ថ្ងៃចន្ទនេះ ប្រធានាធិបតីចិននិងអាមេរិកបានជជែកគ្នាតាមទូរសព្ទ ក្នុងស្ថានភាពតានតឹងនឹងគ្នា។ លោកស៊ី ជីនពីង និងលោកដូណាល់ ត្រាំ បានពិភាក្សាពីរឿងនុយក្លេអ៊ែរកូរ៉េខាងជើង តែមិនបានលើកពីរឿងនាវាចម្បាំងអាមេរិក ចូលទៅសមុទ្រចិនទេ។
តាមទូរសព្ទ លោកស៊ី ជីនពីង លើកឡើងទៅលោកដូណាល់ ត្រាំ នូវកត្តាអវិជ្ជមានដែលបង្កភាពល្អក់កករដល់ទំនាក់ទំនងទ្វេភាគី
ក្រោយអាមេរិកបញ្ជូននាវាចម្បាំង USS Stethem ចូលទៅTriton សមុទ្រចិនខាងត្បូង រដ្ឋាភិបាលចិន មានទាំងក្រសួងការពារជាតិចិន បាននាំគ្នាប្រតិកម្មប្រឆាំងការបញ្ជូននាវាចម្បាំងអាមេរិក ទៅតំបន់សមុទ្រចិននេះរួចហើយ។ ដូច្នេះ ប្រធានាធិបតីចិន ស៊ី ជីនពីង មិនត្រូវការបន្ថែមភាពតានតឹងលើរឿងនេះ ជាមួយលោកត្រាំទៀតទេ។
គេមើលឃើញថា អាមេរិកផ្គើនចិន បញ្ជូននាវាចម្បាំងទៅក្បែរកោះទ្រីតុង នៅសមុទ្រចិននេះ គឺដើម្បីជំរុញចិន អោយដាក់សម្ពាធកាន់តែខ្លាំងលើកូរ៉េខាងជើងប៉ុណ្ណោះ។ ម្ល៉ោះហើយ បានជា ថ្ងៃចន្ទនេះ ប្រធានាធិបតីចិន ស៊ី ជីនពីង និងលោកដូណាល់ ត្រាំ និយាយតាមទូរសព្ទជាមួយគ្នា មិនលើកពីបញ្ហានាវាចម្បាំងអាមេរិកនេះមែន តែប្រធានាធិបតីទាំង២បានជជែកគ្នាពីរឿងនុយក្លេអ៊ែរកូរ៉េខាងជើង។ ត្បិតថា លោកស៊ី ជីនពីង មិននិយាយរឿងនាវាចម្បាំងអាមេរិកជាមួយលោកដូណាល់ ត្រាំមែន តែលោកបានប្រាប់លោកដូណាល់ ត្រាំ ថា ពេលនេះ មានកត្តាអវិជ្ជមានជាច្រើនដែលធ្វើអោយល្អក់កករដល់ទំនាក់ទំនងទ្វេភាគីរវាងអាមេរិកនិងចិន។
រឿងអវិជ្ជមានធ្វើអោយចិនក្តៅក្រហាយនឹងអាមេរិក មានអ្វីខ្លះទៅ ? មិនមែនមានតែរឿងអាមេរិកប្រើនាវាចម្បាំងផ្គើនចិននេះតែមួយមុខទេ មានច្រើនណាស់ មួយរយៈចុងក្រោយនេះ ។ បែបយ៉ាង កាលពីថ្ងៃព្រហស្បតិ៍ អាមេរិកបានដាក់ទណ្ឌកម្មមិនអោយធនាគារចិនឈ្មោះថា Dangdong Bank រកស៊ីលើទីផ្សារហិរញ្ញវត្ថុអាមេរិក។ ធនាគារចិនមួយនេះរងការចោទប្រកាន់ថា រកស៊ីលាងលុយកខ្វក់ ជាប់ពាក់ព័ន្ធសហគ្រាសរកស៊ីដែលពាក់ព័ន្ធនឹងការអភិវឌ្ឈន៍មីស៊ីលនៅកូរ៉េខាងជើង។ លើសពីនេះទៀត សប្តាហ៍មុនដដែល អាមេរិកថែមទាំងបានលូកដៃចូលរឿងសិទ្ធិមនុស្សនៅចិន ដូចជារឿងហុងកុង អាមេរិកបានសំដែងការបារម្ភពីការគោរពសិទ្ធិសេរីភាពនៅហុងកុងជាដើម។
មានរឿងមួយទៀតដែលចិនខឹងដែរនោះ គឺរឿងតៃវ៉ាន់ ទាក់ទងកិច្ចសន្យាលក់អាវុធទៅអោយកោះតៃវ៉ាន់ ដែលមានតម្លៃជាង១៤០០លានដុល្លារ។ ចិនចាត់ទុកតៃវ៉ាន់ជាខែត្ររបស់ចិន។ ចិនរំលឹកអាមេរិកច្រើនលើកហើយថា ចិនសង្ឃឹមថា អាមេរិកគោរពគោលការណ៍ទឹកដីចិនតែមួយនេះ។ ប៉ុន្តែ ខាងកងទ័ពអាមេរិកនោះហាក់ដូចមិនខ្វល់រឿងទឹកដីចិនតែមួយអីទេ។ គណៈកម្មាធិការកងទ័ពអាមេរិកបែរជាបានអនុម័តច្បាប់អោយនាវាអាមេរិកបានចូលទៅចតទៀងទាត់នៅតាមកំពង់ផែតៃវ៉ាន់ទៅវិញ។ ទោះយ៉ាងនេះក្តី ច្បាប់មួយនេះត្រូវឆ្លងកាត់សភា និងការចុះហត្ថលេខាពីលោកដូណាល់ ត្រាំសិន ទើបអនុវត្តបាន។
ប្រធានាធិបតីចិនលើកឡើងតាមទូរសព្ទទៅលោកដូណាល់ ត្រាំ នូវពាក្យថា “កត្តាអវិជ្ជមាន”បង្កបញ្ហាដល់ទំនាក់ទំនងរវាងចិននិងអាមេរិកនេះ ដើម្បីអោយលោកត្រាំដឺងថា បើចង់អោយចិនបន្ថែមសម្ពាធលើកូរ៉េខាងជើង ទាល់តែអាមេរិកខ្លួនឯងហ្នឹងចេះគោរពចិនដែរ មិនត្រូវបន្តផ្គើន លូកដៃក្នុងកិច្ចការផ្ទៃក្នុងចិនទេ។ អាមេរិកត្រូវដឹងថា រឿងសមុទ្រចិនខាងត្បូង រឿងសិទ្ធិមនុស្ស រឿងតៃវ៉ាន់ សុទ្ធតែជារឿងក្តៅគគុកមិនអាចលេងសើចទេ។
អាមេរិកដាក់សម្ពាធចិន រឿងកូរ៉េខាងជើង ដោយសារអាមេរិកខឹងនឹងការគំរាមវាយប្រហារមិនចេះចប់ពីសំណាក់កូរ៉េខាងជើង។ ថ្មីៗនេះទៀត និស្សិតអាមេរិកដែលកូរ៉េខាងជើងបានដោះលែងកាលពីខែមុននេះ បានស្លាប់ហើយ ធ្វើអោយប្រជាជនអាមេរិកខឹងកូរ៉េខាងជើង។ លោកត្រាំទើបទទួលជួបប្រធានាធិបតីកូរ៉េខាងត្បូង ដែលសន្យាដោះស្រាយរឿងកូរ៉េខាងជើង។ ពេលនេះ លោកដូណាល់ ត្រាំ មានតែដាក់សម្ពាធចិនអញ្ចឹងទៅ។ មានតែចិនទេ ជិតដិតនឹងក្រុងព្យុងយ៉ាង ដាក់សម្ពាធក្រុងព្យុងយ៉ាងបាន តែចិនដូចមិនសូវផុសផុលប៉ុន្មានទេ។ អាមេរិកបញ្ជុននាវាអាមេរិកទៅក្បែរកោះជម្លោះនៅសមុទ្រចិនម្សិលមិញនេះ ក៏ជាការព្រមានមួយដល់ចិនដែរ ឃើញថា ចិនសង់ហេដ្ឋារចនាសម្ព័ន្ធនៅតាមកោះទាំងនោះច្រើនណាស់។
បើចង់អោយលោកស៊ី ជីនពីង ដាក់សម្ពាធលើកូរ៉េខាងជើង ទាល់តែអាមេរិកចេះប្រើវិធីសាស្ត្រការទូត គោរពភាគីចិនដែរ មិនអាចសុខៗ យកនាវាចម្បាំងមកផ្គើនចិន នៅសមុទ្រចិនស្រួលៗអញ្ចឹងទេ។ អ្នកណាក៏ដឹងដែរថា លោកស៊ី ជីនពីង ចូលចិត្តដំណោះស្រាយតាមបែបការទូត។ លោកត្រាំនិងលោកស៊ី ជិនពីង ទើបបានជួបគ្នាផ្ទាល់មុខ កាលពីខែមេសា ធ្វើអោយទំនាក់ទំនងអាមេរិកនិងចិនកក់ក្តៅឡើងវិញ ពេលនេះ ទំនាក់ទំនងនេះបែរជាល្អក់កករទៅវិញ។
នាវាអាមេរិកចូលទៅកោះទ្រីតុង ស្ថិតនៅប្រជុំកោះជម្លោះប៉ារ៉ាសែល។ តៃវ៉ាន់និងវៀតណាមក៏ឈ្លោះដណ្តើមកោះនេះជាមួយចិនដែរ។ អាមេរិកប្រាប់ថា នាវាចម្បាំងចូលទៅទីនោះ គឺគ្រាន់តែបង្ហាញពីសេរីភាពនៃចរាចរណ៍ដែនទឹកប៉ុណ្ណោះ។ សេរីភាពយ៉ាងណាក៏ដោយ បើតំបន់កោះជម្លោះជាបញ្ហាក្តៅគគុក អាមេរិកមិនអាចលេងសើចអញ្ចឹងទេ។ ម្យ៉ាងទៀត គិតតាំងពីលោកដូណាល់ ត្រាំ ឡើងកាន់អំណាចមក មិនមែនជាលើកទី១ទេ ដែលនាវាអាមេរិកចូលទៅបង្ករឿង។ កាលពីថ្ងៃ២៥ឧសភា នាវាអាមេរិកធ្លាប់ចូលតំបន់ប្រជុំកោះSpratley ដែរ។
នាវាអាមេរិក ចូលទៅក្បែរកោះទ្រីតុងម្សិលមិញ ត្រូវបានក្រសួងការពារជាតិចិនចោទរហូតថា ប៉ះពាល់ស្ថិរភាពក្នុងតំបន់។ ក្រសួងការបរទេសចិនព្រមានអាមេរិកអោយកែប្រែកំហុសនេះ កុំអោយបង្ករឿងបែបនេះទៀត បើសិនជាអាមេរិកចង់អោយទំនាក់ទំនងចិន-អាមេរិក ត្រឹមត្រូវឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ