សេចក្តីព្រាងច្បាប់ហិរញ្ញវត្ថុ ឆ្នាំ២០១៥ ត្រូវបានរដ្ឋសភា ពិភាក្សាអនុម័ត
រដ្ឋសភា បានបើកកិច្ចប្រជុំពេញអង្គ នាព្រឹកថ្ងៃទី២៨វិច្ឆិកានេះ ដើម្បីពិភាក្សា និងអនុម័តលើសេចក្តីព្រាងចំណងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០១៥ ឬហៅថា ច្បាប់ហិរញ្ញវត្ថុ ឆ្នាំ២០១៥។ កិច្ចប្រជុំនៅរដ្ឋសភា នាព្រឹកថ្ងៃសុក្រនេះ មានអ្នកតំណាងរាស្ត្រចំនួន ១១២ រូប បានចូលរួម។ អ្នកតំណាងរាស្ត្រគណបក្សសង្គ្រោះជាតិ ដឹកនាំដោយលោកសម រង្ស៊ី និងលោកកឹម សុខា ចំនួន ៤៧ រូប ដែលបានចូលរួមកិច្ចប្រជុំរដ្ឋសភា នាព្រឹកនេះ មិនបានលើកដៃ គាំទ្រសេចក្តីព្រាងច្បាប់ហិរញ្ញវត្ថុ ឆ្នាំ២០១៥ នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
កិច្ចប្រជុំពេញអង្គរដ្ឋសភា នៅព្រឹកថ្ងៃសុក្រ ទី២៨វិច្ឆិកានេះ មានកូរ៉ុមចំនួន ១១២ រូប ក្នុងនោះ តំណាងរាស្ត្រមកពីគណបក្សប្រជាជនកម្ពុជាចំនួន ៦៥ រូប និងគណបក្សសង្គ្រោះជាតិ ៤៧ រូប។ លោកនាយករដ្ឋមន្ត្រី ហ៊ុន សែន ក៏បានចូលរួមកិច្ចប្រជុំរដ្ឋសភា ក្នុងនាមជាអ្នកតំណាងរាស្ត្រ មណ្ឌលខេត្តកណ្តាល។ ចំណែកលោកសម រង្ស៊ី ប្រធានគណបក្សសង្គ្រោះជាតិ អ្នកតំណាងរាស្ត្រមណ្ឌលខេត្តកំពង់ចាម ក៏បានចូលរួមប្រជុំរដ្ឋសភា នាព្រឹកនេះ ផងដែរ។
សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០១៥ ឬច្បាប់ហិរញ្ញវត្ថុ ឆ្នាំ២០១៥ បានកំណត់ការចំណាយថវិការដ្ឋ សរុបចំនួន ១៥.៦៩៩.៥២៩ លានរៀល ស្មើប្រមាណ ៣.៨៦៧ លានដុល្លារ។ ការចំណាយនេះ មានកំណើន ១០,៨ ភាគរយ ធៀបនឹងច្បាប់ ស្តីពី ហិរញ្ញវត្ថុ ឆ្នាំ២០១៤។
សេចក្តីព្រាងច្បាប់ហិរញ្ញវត្ថុ ឆ្នាំ២០១៥ មាន ៦ ជំពូក និង ១៧ មាត្រា បានកំណត់ពីការចំណាយលើក្រសួងអាទិភាព នៅក្នុងឆ្នាំ២០១៥ រួមមាន៖ ទី១-ក្រសួងអប់រំ យុវជន និងកីឡា ចំនួនជាង ៤៤៤ លានដុល្លារ ទី២-ក្រសួងសាធារណៈការ និងដឹកជញ្ជូន ចំនួនជាង ៤៣៤ លានដុល្លារ ទី៣-ក្រសួងការពារជាតិ ចំនួនជាង ៣២៤ លានដុល្លារ ទី៤-ក្រសួងសុខាភិបាល ចំនួនជាង ៣១៧ លានដុល្លារ ទី៥-ក្រសួងមហាផ្ទៃ ចំនួន ២៥៨ លានដុល្លារ។
សេចក្តីព្រាងច្បាប់ហិរញ្ញវត្ថុ ឆ្នាំ២០១៥ ក៏បានកំណត់ពីការតម្លើងកម្រិតបៀវត្សលើកលែងពន្ធ គឺចាប់ ៨០០.០០០ រៀល ទើបជាប់ពន្ធលើប្រាក់ខែ។ លើសពីនេះ សេចក្តីព្រាងច្បាប់ ហិរញ្ញវត្ថុ ឆ្នាំ២០១៥ រដ្ឋាភិបាល បានសម្រេចផ្តល់សិទ្ធិដល់មន្ត្រីពន្ធដារ ឲ្យធ្វើជាមន្ត្រីនគរបាលយុត្តិធម៌ ដើម្បីទទួលបានសិទ្ធិអំណាចពេញលេញក្នុងការស៊ើបអង្កេតបទល្មើសស្តីពីពន្ធដារ ក្នុងគោលបំណងធានាប្រសិទ្ធភាព ក្នុងការជំរុញការកៀរគរចំណូល និងពង្រឹងការអនុវត្តច្បាប់ ស្តីពី ពន្ធដារ។
ជាការកត់សម្គាល់ សេចក្តីព្រាងច្បាប់ ហិរញ្ញវត្ថុ ឆ្នាំ២០១៥ មិនត្រូវបានអ្នកតំណាងរាស្ត្រ គណបក្សសង្គ្រោះជាតិ ដែលចូលរួមកិច្ចប្រជុំ លើកដៃគាំទ្រនោះទេ។ គណបក្សសង្គ្រោះជាតិ យល់ថា សេចក្តីព្រាងច្បាប់នោះ មិនទាន់ពេញលេញ រីឯការកំណត់ពីការគៀងគរចំណូល នៅខ្វះចន្លោះ ហើយរដ្ឋសភា មានពេលខ្លី ដើម្បីពិនិត្យ ជាដើម។
ប៉ុន្តែអ្នកតំណាងរាស្ត្រគណបក្សសង្គ្រោះជាតិជាច្រើនរូប បានឡើងធ្វើបទអន្តរាគមន៍ និងសួរដេញដោលលើរដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ច ជុំវិញសេចក្តីព្រាងច្បាប់ ហិរញ្ញវត្ថុ ឆ្នាំ២០១៥។
ជារៀងរាល់ឆ្នាំ គណបក្សប្រឆាំង តែងតែមិនលើកដៃ គាំទ្រ និងអនុម័តលើសេចក្តីព្រាងច្បាប់ហិរញ្ញវត្ថុ។ ប៉ុន្តែគណបក្សប្រជាជនកម្ពុជា ដែលកំពុងដឹកនាំរដ្ឋាភិបាល រដ្ឋសភា និងព្រឹទ្ធសភា មានសំឡេងគ្រប់គ្រាន់ ដើម្បីអនុម័តសេចក្តីព្រាងច្បាប់នោះ ព្រោះត្រូវការសំឡេងភាគច្រើនដាច់ខាត ឬសំឡេង ៥០ ភាគរយ បូក ១ នៃសមាជិករដ្ឋសភា និងព្រឹទ្ធសភាទាំងមូលប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ