តំណាងរាស្ត្រស្ត្រីបក្សប្រឆាំង ប្តេជ្ញាស្វែងរកយុត្តិធម៌ដល់ស្ត្រីកំពុងជាប់ឃុំនៅពន្ធនាគារព្រៃសរ
នៅព្រឹកថ្ងៃព្រហស្បតិ៍នេះ អ្នកតំណាងរាស្ត្រជាស្ត្រីចំនួន៧ រូបដែលជាសមាជិករដ្ឋសភា និងព្រឹទ្ធសភាមកពីគណបក្សប្រឆាំងបានចុះទៅសួរសុខទុក្ខស្ត្រីចំនួន១០នាក់ដែលកំពុងជាប់ឃុំនៅក្នុងពន្ធនាគារព្រៃសរ។ អ្នកតំណាងរាស្ត្រជាស្ត្រីបានប្តេជ្ញាថា នឹងជំរុញឲ្យតុលាការស្វែងរកយុត្តិធម៌ដល់ស្ត្រីដែលកំពុងជាប់ឃុំទាំងនោះ ព្រោះវាជារឿងអយុត្តិធម៌បំផុតសម្រាប់ពួកគេ។
ចុះផ្សាយនៅថ្ងៃ៖
ស្តាប់ - ០២:០០
ក្រុមអ្នកតំណាងរាស្ត្រជាស្ត្រីទាំងនោះ បានអំពាវនាវឲ្យតុលាការដោះលែងស្ត្រីដែលកំពុងជាប់ឃុំនៅឯពន្ធនាគារព្រៃសរនោះ ឲ្យមានសេរីភាពឡើងវិញដោយចាត់ទុកថាជារឿងអយុត្តិធម៌សម្រាប់ពួកគេដែលគ្រាន់តែចេញតវ៉ារឿងទឹកលិចផ្ទះតែត្រូវបានតុលាការផ្តន្ទាទោសឲ្យជាប់ពន្ធនាគារ។
លោកស្រី កែ សុវណ្ណារតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភាដែលបានចុះទៅសួរសុខទុក្ខស្ត្រីបឹងកក់ដែលកំពុងជាប់ទាំងនោះបានមានប្រសាសន៍ថា លោកស្រីនឹងជំរុញឲ្យសាលាឧទ្ធរណ៍ដោះស្រាយរឿងស្ត្រីទាំងនោះដោយផ្អែកតាមផ្លូវច្បាប់ដើម្បីផ្តល់យុត្តិធម៌ឲ្យពួកគេ។ បើតាមលោកស្រីកែ សុវណ្ណរតន៍ គណៈកម្មការទី៨នៃរដ្ឋសភានឹងសរសេរលិខិតមួយទៅកាន់សាលាឧទ្ធរណ៍ ដើម្បីស្នើឲ្យពិនិត្យឡើងនូវរឿងរ៉ាវស្ត្រីបឹងកក់នេះ។
សូមជំរាបជូនថា អ្នកតំណាងរាស្ត្រជាស្ត្រីដែលមួយរូបជាសមាជិកព្រឹទ្ធសភារបស់គណបក្សសម រង្ស៊ី និង ៦រូបទៀតជាសមាជិករដ្ឋសភារបស់គណបក្សសង្គ្រោះជាតិបានចុះទៅសួរសុខទុក្ខស្ត្រីបឹងកក់ចំនួន១០នាក់ដែលកំពុងជាប់ពន្ធនាគារព្រៃសរ។ អ្នកតំណាងរាស្ត្រទាំងនោះ មិនបានសួរសុខទុក្ខអ្នកជាប់ឃុំផ្សេងទៀតនោះទេ ព្រោះកន្លែងជាប់ឃុំឃាំងនៅផ្សេងគ្នា។ ប៉ុន្តែពួកគេអះអាងថា នឹងចុះទៅសួរសុខទុក្ខនៅពេលបន្ទាប់ទៀត។
សូមបញ្ជាក់ផងដែរថា ស្ត្រីបឹងកក់ទាំងនោះត្រូវបានតុលាការក្រុងភ្នំពេញកាលពីសប្តាហ៍មុន បានផ្តន្ទាទោសឲ្យជាប់ពន្ធនាគារ ក្នុងម្នាក់មួយឆ្នាំ និងពិន័យជាទឹកប្រាក់ក្នុងម្នាក់ចំនួន ២ លានរៀល។ តុលាការបានចោទប្រកាន់ពួកគេពីបទជេរប្រមាថមន្ត្រីរាជការសាធារណៈ និងបទបិទផ្លូវបង្កឲ្យស្ទះចរាចរណ៍។
លោកស្រីមួរ សុខហូរ តំណារាស្ត្រគណបក្សសង្គ្រោះជាតិដែលបានចុះទៅសួរសុខទុក្ខស្ត្រីជាប់ឃុំផងដែរនោះ បានហៅការចាប់ខ្លួន និងផ្តន្ទាទោសពួកគេថា ជារឿងអយុត្តិធម៌បំផុតដោយតុលាការធ្វើការកាត់ក្តីដោយគ្មានភ័ស្តតាងត្រឹមត្រូវ។ យ៉ាងណាក៏ដោយក្រុមអ្នកតំណាងរាស្ត្រជាស្ត្រីរបស់គណបក្សប្រឆាំង សង្ឈឹមថា តាមរយៈការជំរុញពីតំណារាស្ត្រ និង អង្គការជាតិ អន្តរជាតិ គួបផ្សំនឹងការស៊ើបអង្កេតឡើងវិញពីសាលាឧទ្ធរណ៍នោះ ស្ត្រីទាំងនោះក៏ដូចអ្នកជាប់ឃុំផ្សេងទៀតនឹងដោះលែងជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ