កម្ពុជាផ្ញើកំណត់ទូតទៅវៀតណាមស្តីពីបញ្ហាព្រំដែននៅខេត្តរតនគិរី
នេះគឺជាលើកទីមួយហើយដែលក្រសួងការបរទេសកម្ពុជាផ្ញើកំណត់ទូតផ្លូវការទៅកាន់ស្ថានទូតវៀតណាមប្រចាំនៅកម្ពុជាស្តីពី ករណីវៀតណាមជីកស្រះទឹក៥កន្លែងចូលក្នុងទឹកដីខ្មែរ។ កំណត់ទូតចុះថ្ងៃទី ១២ មិថុនានេះ បានបង្ហាញថា ស្រះទឹកទាំង៥កន្លែង ត្រូវបានភាគីវៀតណាមជីកចូលក្នុងដីខ្មែរពីចន្លោះជាង ៣០០ ម៉ែត្រ ទៅជាង ៥០០ម៉ែត្រ នៅក្នុងស្រុកអូយ៉ាដាវ ខេត្តរតនគិរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
យោងតាមរបាយការណ៍របស់ក្រសួងមហាផ្ទៃនិងគណៈកម្មការទទួលបន្ទុកកិច្ចការព្រំដែនរួមកម្ពុជា អាជ្ញាធរនៅក្នុងខេត្តរតនគិរី បានរកឃើញស្រះទឹកចំនួន ៥ ដែលមានទំហំ ៥ម៉ែត្រ គុណនឹង ១៣ម៉ែត្រ សម្រាប់ស្រះទឹកនីមួយៗ ដែលត្រូវបានជីកដោយអាជ្ញាធរវៀតណាម នៅចន្លោះបង្គោលព្រំដែនលេខ ៣០ និង៤០ ស្ថិតក្នុងភូមិឡុំ ឃុំប៉ក់ញ៉ៃ ស្រុកអូយ៉ាដាវ ខេត្តរតនគិរី ក្នុងតំបន់ដែលបន្ទាត់ព្រំដែនរវាងប្រទេសទាំងពីរមិនទាន់បានកំណត់ជាក់លាក់។
កំណត់ទូតរបស់ក្រសួងការបរទេសកម្ពុជាផ្ញើទៅកាន់វៀតណាម បានបង្ហាញថា ខណៈដែលតំបន់នោះមិនទាន់ត្រូវបានកំណត់ច្បាស់លាស់ រដ្ឋាភិបាលកម្ពុជាទាមទារឲ្យរដ្ឋាភិបាលវៀតណាមគោរពខ្សែបន្ទាត់ព្រំដែន ដែលកម្ពុជាហើយនិងវៀតតាមបានទទួលស្គាល់រួមគ្នានៅក្នុងឆ្នាំ ១៩៩៥ កន្លងមក។
ជាមួយគ្នានេះ លោកនាយករដ្ឋមន្ត្រីហ៊ុន សែនក៏បានលើកយកបញ្ហាព្រំដែនរវាងប្រទេសកម្ពុជា និងវៀតយកមកពិភាក្សាជាមួយនិងលោក ឡេ ហុងអាញ់ (Le Hong Auh) សមាជិកការិយាល័យនយោបាយនៃគណបក្សកុម្មុយនីស្តវៀតណាម កាលពីរសៀលថ្ងៃទី៩មិថុនាកន្លង នៅវិមានសន្តិភាពផងដែរ។ លោកហ៊ុន សែន បានស្នើដល់ភាគីវៀតណាមឲ្យរក្សាស្ថានភាពព្រំដែនដូចមុន ជាពិសេសបញ្ហាព្រំដែននៅខេត្តរតនគិរីដោយរក្សាស្ថានភាពស្ងៀមស្ងាត់ កុំបង្កការប៉ះពាល់ដល់តំបន់ដែលមិនទាន់បានឯកភាពគ្នា និង មិនទាន់បានដោះស្រាយ។ ភាគីវៀតណាម ក៏បានឯកភាពទៅលើការស្នើសុំនេះ។
ក៏ប៉ុន្តែសូមរំលឹកជូនថា កាលពីថ្ងៃទី ៧ មិថុនាកន្លងទៅនេះ តំណាងរាស្ត្រគណបក្សសង្រ្គោះជាតិ ៦រូបដឹកនាំដោយលោក ម៉ៅ មុនីវណ្ណ បានធ្វើដំណើរទៅកាន់ខេត្តរតនគិរី ដើម្បីចុះទៅពិនិត្យមើលស្រះទឹកទាំង៥ បន្ទាប់ពីទទួលបានដំណឹងពីប្រជាពលរដ្ឋនៅទីនោះ ហើយមុនដំណើរចុះទៅត្រួតពិនិត្យ ក៏មានការព្រមានពីអាជ្ញាធរវៀតណាម ថានឹងប្រើកាំភ្លើងបាញ់ទៅលើក្រុមអ្នកតំណាងរាស្ត្រទាំងអស់នោះផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ