សង្គមស៊ីវិលស្នើឲ្យរដ្ឋាភិបាលកម្ពុជា ធ្វើសកម្មភាពរារាំងការសាងសង់ទំនប់វារីអគ្គីសនីលើដងទន្លេមេគង្គ
ប្រតិកម្មបានបន្តធ្លាក់មកជាបន្តបន្ទាប់ ខណៈដែលប្រទេសចំនួន៤នៃទន្លេមេគង្គផ្នែកខាងក្រោម នឹងត្រូវជួបប្រជុំគ្នានាថ្ងៃទី២៦ និង២៧មិថុនាខាងមុខនេះ នៅទីក្រុងបាងកក ប្រទេសថៃ។ អង្គការសង្គមស៊ីវិលចំនួន៥ បានស្នើឲ្យរដ្ឋាភិបាលកម្ពុជា ធ្វើសកម្មភាពរារាំងការសាងសង់ទំនប់វារីអគ្គីសនីលើដងទន្លេមេគង្គ ពិសេសគឺទំនប់វារីអគ្គីសនីសាយ៉ាបូរី និងទំនប់វារីអគ្គីសនីដន សាហុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ការបង្កើតផែនការទំនប់លើតួទន្លេមេគង្គ ទាំង១១ទំនប់ នៅក្នុងប្រទេសឡាវ និងប្រទេសកម្ពុជា រួមបញ្ចូលទាំងទំនប់សាយាបូរី និងទំនប់ដនសាហុង គឺជាការគម្រាមកំហែងដល់ការបំផ្លាញជីវិត និងវប្បធម៌របស់ប្រជាពលរដ្ឋ។ រដ្ឋាភិបាលកម្ពុជា គួរចាត់វិធានការ ឬធ្វើសកម្មភាពមួយ ដើម្បី ទាមទារឲ្យផ្អាកជាបន្ទាន់ ចំពោះការសាងសង់ទំនប់វារីអគ្គីសនីសាយបូរី និងទំនប់ដនសាហុង។ នេះជាខ្លឹមសារនៃសេចក្ដីប្រកាសព័ត៌មានរួម របស់អង្គការសង្គមស៊ីវិលចំនួន៥ ដែលចេញផ្សាយនៅថ្ងៃទី២០មិថុនា។
អង្គការទាំង៥នោះរួមមាន វេទិកានៃអង្គការមិនមែនរដ្ឋាភិបាលស្ដីពីកម្ពុជា NGOs Forum អង្គការ Fact អង្គការភូមិខ្ញុំ សមាគមថែរក្សាបរិស្ថាននិងវប្បធម៌ និងបណ្ដាញការពារទន្លេសេសាន ស្រែពក សេកុង។
សូមជម្រាបជូនថា សេចក្ដីប្រកាសព័ត៌មាននេះ ចេញផ្សាយខណៈដែលកិច្ចប្រជុំថ្នាក់រដ្ឋមន្ដ្រី នៃគណៈកម្មការទន្លេមេគង្គ នឹងប្រព្រឹត្តទៅនៅថ្ងៃទី២៦ និង២៧មិថុនាខាងមុខ នៅទីក្រុងបាងកក ប្រទេសថៃ។ មូលនិធិពិភពលោកដើម្បីធម្មជាតិ ឬអង្គការ WWF ក៏បានចាប់អារម្មណ៍ពីកិច្ចប្រជុំនេះដែរ។
បើតាមអង្គការ WWF កិច្ចប្រជុំរវាងប្រទេសចំនួន៤ គឺកម្ពុជា ឡាវ ថៃ និងវៀតណាម ដែលជាសមាជិកនៅក្នុងតំបន់ទន្លេមេគង្គក្រោម នាសប្ដាហ៍ក្រោយនេះ ត្រូវតែបញ្ជៀសឲ្យបាននូវផលប្រយោជន៍ឯកតោភាគី កុំឲ្យមានឥទ្ធិពលអវិជ្ជមានដល់កិច្ចសហប្រតិបត្តិការក្នុងតំបន់ និងការគ្រប់គ្រងរួមគ្នានូវទន្លេដ៏ពិសិដ្ឋមួយនេះ។
ទន្លេមេគង្គត្រូវបានទទួលស្គាល់ថា ជាទន្លេធម្មជាតិមួយ ដែលមានសក្កានុពលមហាសាលសម្រាប់ការអភិវឌ្ឍន៍ នៃប្រទេសនានានៅតាមដងទន្លេមេគង្គនេះ។ យោងតាមរបាយការណ៍របស់គណៈកម្មការទន្លេមេគង្គ មានមនុស្សជាង៦០លាននាក់ដែលកំពុងរស់នៅអាស្រ័យផល នៅផ្នែកអាងទន្លេមេគង្គក្រោម។ កសិកម្មគឺជាសកម្មភាពសេដ្ឋកិច្ចចាំបាច់តែមួយគត់សម្រាប់ប្រជាជនទាំងនេះ។ មានផ្ទៃដីធ្វើស្រែច្រើនជាង១០លានហិចតានៅតាមអាងទន្លេមេគង្គក្រោមដែលត្រូវប្រើប្រាស់ទឹកទន្លេមេគង្គនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ