បញ្ហា ៥០ភាគរយបូក១ ឬ ២ភាគ៣ មានអត្ថន័យនយោបាយច្រើនជាងបច្ចេកទេស
ចុះផ្សាយនៅថ្ងៃ៖
ស្តាប់ - ០៥:០២
ទីបំផុតទៅ កិច្ចចរចា រវាងគណបក្សជាប់ឆ្នោតទាំងពីរ បានជាប់គាំង ត្រឹមរូបមន្តបង្កើតគណៈកម្មាធិការជាតិរៀបចំការបោះឆ្នោត (គ.ជ.ប) ។ គណបក្សប្រជាជនកម្ពុជា ទាមទារចង់បានការអនុម័ត ដោយរូបមន្ត៥០%បូក១ ចំណែកឯគណបក្សសង្គ្រោះជាតិ ចង់បានរូបមន្ត ២ភាគ៣ នៃសមាជិកសភា។ ភាគីទាំងពីរសុទ្ធតែលើកហេតុផលសម្អាង ដើម្បីការពារជំហររៀងៗខ្លួន។ ប៉ុន្តែ តាមពិតទៅ បញ្ហា ៥០ភាគរយបូក១ ឬក៏ ២ភាគ៣ ត្រូវគេមើលឃើញថាមានអត្ថន័យនយោបាយច្រើនជាងបច្ចេកទេស។ ក៏ដូចជាក្នុងវិស័យផ្សេងទៀតដែរ នៅកម្ពុជាទិដ្ឋភាពនយោបាយតែងតែគ្របដណ្តប់ លើទិដ្ឋភាពបញ្ហាបច្ចេកទេសជានិច្ច។ នេះជាឧបសគ្គ ក្នុងការអភិវឌ្ឍប្រទេស។
បើទោះបីជាគណបក្សទាំងពីរ បានធ្វើសម្បទានឲ្យគ្នាទៅវិញទៅមកយ៉ាងច្រើន គួរឲ្យកត់សម្គាល់ក៏ដោយ ក៏ទីបំផុតទៅ វិបត្តិនយោបាយបែរមកជាប់គាំងត្រឹមរូបមន្តនៃការជ្រើសសមាសភាព គ.ជ.ប ទៅវិញ។ គណបក្សសង្គ្រោះជាតិ ទាមទារចង់បានរូបមន្ត ២ភាគ៣នៃសមាជិកសភា ដើម្បីអនុម័តយល់ព្រមបង្កើតស្ថាប័នរៀបចំការបោះឆ្នោត។
ហេតុផលរបស់បក្សប្រឆាំងគឺ រូបមន្ត ២ភាគ៣ អាចបង្កើតស្ថាប័នរៀបចំការបោះឆ្នោតមួយដែលគ្រប់ភាគីទទួលយកបាន។ ហេតុផលនេះពិតជាសមរម្យពីព្រោះប្រសិនបើអាចធ្វើបានដូច្នោះមែន ជម្លោះក្រោយការបោះឆ្នោតទំនងជាអាចកាត់បន្ថយបានច្រើនដោយសារគ្មានគណបក្សណាមួយមានលេសក្នុងការចោទ គ.ជ.ប ថាលម្អៀងទៀតឡើយ។ ដូច្នេះ វិបត្តិនយោបាយក្រោយការបោះឆ្នោត ក៏ទំនងជាគ្មានទៀតដែរ។
ប៉ុន្តែ គណបក្សប្រជាជនកម្ពុជា ដែលទាមទារចង់បានរូបមន្ត ៥០%បូក១ ក៏មានហេតុផលរបស់ខ្លួនដែរ។ ហេតុផលនោះគឺ រូបមន្ត ២ភាគ៣ នឹងធ្វើឲ្យការបង្កើតស្ថាប័ន គ.ជ.ប ជាប់គាំងមិនអាចចេញរួច។ ហេតុផលនេះ ក៏មានមូលដ្ឋានមិនអាចបដិសេធទាំងស្រុងបានដែរ ពីព្រោះក្នុងស្ថានភាពមិនទុកចិត្តគ្នា ដូចជាបច្ចុប្បន្ន គណបក្សកាន់អំណាច និងបក្សប្រឆាំងពិតជាគ្មានថ្ងៃយល់ស្របគ្នា អំពីសមាសភាព គ.ជ.ប នោះឡើយ។
គេនៅចាំបានថា ពាក្យថា«មនុស្សឯករាជ្យ» សម្រាប់ដឹកនាំស្ថាប័ន គ.ជ.ប ធ្លាប់ត្រូវបានគេជជែកគ្នាតាំងពីយូរយាណាស់មកហើយ ប៉ុន្តែ ទីបំផុត គេមិនអាចរកមនុស្សឯករាជ្យដែលគ្រប់គ្នាទទួលយកបាននោះឡើយ។ មនុស្សម្នាក់ អាចត្រូវបានមើលឃើញថា«ឯករាជ្យ» ដោយបក្សប្រឆាំង ប៉ុន្តែ មនុស្សនោះ«មិនឯករាជ្យ»ឡើយសម្រាប់បក្សកាន់អំណាច ឬក៏ផ្ទុយពីនេះទៅវិញ។ ប្រសិនបើដូច្នេះ តើគេអាចរកសំឡេង ២ភាគ៣បានដោយរបៀបណា?
ពិតណាស់ថា គណបក្សទាំងពីរមានហេតុផលសមរម្យម្យ៉ាងម្នាក់ ប៉ុន្តែ ហេតុផលនោះ ត្រូវគេមើលឃើញថា កើតចេញពីទម្ងន់នយោបាយច្រើនជាងទម្ងន់បច្ចេកទេស។ ទម្ងន់នយោបាយនៅត្រង់ថា គណបក្សសង្គ្រោះជាតិ ចង់ប្រើរូបមន្ត ២ភាគ៣ ដើម្បីរារាំងគណបក្សប្រជាជនកម្ពុជា មិនឲ្យសម្រេចអ្វីបានទេ បើទោះជាខ្លួនមានសំឡេងភាគច្រើនក្នុងរដ្ឋសភាក៏ដោយ។
ចំណែកឯគណបក្សកាន់អំណាចវិញ ចង់រក្សាទុករូបមន្ត ៥០ភាគរយបូក១ ដើម្បីខ្លួនអាចជ្រើសរើសសមាសភាព គ.ជ.ប ដែលខ្លួនពេញចិត្តបានដោយគ្មានឧបសគ្គ។ ដោយសារផលប្រយោជន៍នយោបាយមានទម្ងន់ខ្លាំងពេកបែបនេះហើយ បានជាវិបត្តិនយោបាយជាប់គាំងដោះស្រាយមិនចេញ។
ក្នុងបរិបទបច្ចុប្បន្ន ដំណោះស្រាយពិតជាពិបាកនឹងរកឃើញណាស់ ប្រសិនបើបក្សជាប់ឆ្នោតទាំងពីរនៅតែយកផលប្រយោជន៍នយោបាយរៀងៗខ្លួនមកធ្វើជាដើមទុន ហើយប្រសិនបើគណបក្សទាំងពីរ នៅតែធ្វើនយោបាយដោយមិនស្មោះត្រង់ជាមួយគ្នាតទៅទៀតនោះ។ ផ្ទុយទៅវិញ ដំណោះស្រាយនឹងងាយស្រួលដូចបកចេក ប្រសិនបើពួកគេត្រឡប់ផលប្រយោជន៍នយោបាយឲ្យមកនៅក្រោមផលប្រយោជន៍ជាតិវិញ ហើយត្រឡប់ពីការធ្វើនយោបាយ ដោយលាក់កាំបិតស្នៀតពីក្រោយខ្នងមកជាការធ្វើនយោបាយ ដោយស្មោះត្រង់ និងដោយគោរពសិទ្ធិប្រជាពលរដ្ឋម្ចាស់ឆ្នោតជាធំវិញនោះ។
ជាក់ស្តែង ប្រសិនបើគេក្រឡេកមើលបណ្តាប្រទេសប្រជាធិបតេយ្យធំៗ ការបោះឆ្នោតគឺជារឿងដ៏សាមញ្ញបំផុត។ ក្រោយការបោះឆ្នោត គណបក្សនីមួយត្រៀមខ្លួនទទួលយកលទ្ធផលដោយមិនតវ៉ា។ អ្នកឈ្នះនិងអ្នកចាញ់ឆ្នោតផ្ទេរតួនាទី ដោយគ្មានឧសគ្គអ្វីឡើយ។ នេះមកពីអ្នកនយោបាយប្រកួតប្រជែងដោយស្មោះត្រង់និងតម្លាភាព ហើយពួកគេគោរពសិទ្ធិសម្រេចរបស់ប្រជាពលរដ្ឋ។ ប្រសិនបើអ្នកនយោបាយខ្មែរអាចធ្វើដូច្នេះបាន បញ្ហា២ភាគ៣ នឹងមិនមែនជារឿងសំខាន់ទៀតទេ។ ប៉ុន្តែ តើពេលណាទើបកម្ពុជាឈានដល់ដំណាក់កាលនេះ? សំណួរនេះនៅតែពិបាករកចម្លើយដដែល បើទោះជាប្រទេសកម្ពុជាបានឆ្លងកាត់របត់ប្រជាធិបតេយ្យរយៈពេល ២០ឆ្នាំហើយក៏ដោយ។
ស្ថានភាពនេះសបញ្ជាក់ឲ្យឃើញបានថា ពីរទសវត្សរ៍កន្លងទៅនេះ អ្នកនយោបាយខ្មែរទទួលយកផ្នត់គំនិតប្រជាធិបតេយ្យបានតិចតួចតែប៉ុណ្ណោះ។ ដូច្នេះ ដល់ពេលហើយដែលពួកគេត្រូវរំដោះខ្លួនចេញពីវប្បធម៌នយោបាយចាស់គំរឹល ហើយបែរមកទទួលយកផ្នត់គំនិតថ្មីបែបជឿនលឿនដោយតម្កល់ផលប្រយោជន៍ជាតិជាធំ។ ក្នុងន័យនេះ ចំណោទបញ្ហា ២ភាគ៣ មិនគួរនឹងក្លាយជាឧបសគ្គសម្រាប់ដោះស្រាយវិបត្តិនយោបាយសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ