លោកហ៊ុន សែន ព្រមានពីលទ្ធភាពដោះដូរគណៈរដ្ឋមន្ត្រីនៅក្នុងឆ្នាំនេះ
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន បានព្រមានដល់រដ្ឋមន្ត្រីរបស់ខ្លួនពីលទ្ធភាពក្នុងការដកចេញពីដំណែង ដោយសារភាពអសកម្មនៅក្នុងការងារនាពេលកន្លងមក។ លោកនាយករដ្ឋមន្ត្រី បានបញ្ជាក់ថា លោកកំពុងតែគិតពិចារណា ថាតើគួរដោះដូរគណៈរដ្ឋមន្ត្រីនៅក្នុងឆ្នាំនេះ ឫយ៉ាងណា? លោកហ៊ុន សែន បានព្រមានដូច្នេះនៅក្នុងពិធីបិទសន្និបាតរបស់ក្រសួងមហាផ្ទៃនៅរសៀលថ្ងៃព្រហស្បតិ៍។ យើងស្ដាប់វណ្ណ សុគន្ធា៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការព្រមានចង់រុះរើគណៈរដ្ឋមន្ត្រីរបស់លោកហ៊ុន សែននេះ គឺបានធ្វើឡើង បន្ទាប់ពីលោកបានស្តីបន្ទោសខ្លាំងៗដល់រដ្ឋមន្ត្រីរបស់ខ្លួននៅក្នុងពិធីបិទសន្និបាតបូកសរុបការងារប្រចាំឆ្នាំ២០១៥ និងលើកទិសដៅសម្រាប់ឆ្នាំ២០១៦ របស់ក្រសួងមហាផ្ទៃ។ រដ្ឋមន្ត្រីនៃក្រសួងពីរ គឺក្រសួងសាធារណការ និង ដឹកជញ្ជូន និង ក្រសួងកសិកម្ម ត្រូវបានលោកហ៊ុន សែន ធ្វើការស្តីបន្ទោសខ្លាំងជាងគេ ដោយសារតែក្រសួងទាំងពីរនេះមានភាពអសកម្មខ្លាំងនៅក្នុងការងារ ដោយលោកនាយករដ្ឋមន្ត្រីបានហៅថា ធ្វើការងារ “ស្ទក់”។ មិនតែប៉ុណ្ណោះ លោកហ៊ុន សែន ក៏បានចាត់ទុកក្រសួងទាំងពីរថា ជាក្រសួងដែលមានចំណាត់ថ្នាក់ទាបជាងគេនៅក្នុងចំណោមក្រសួងចំណុះរដ្ឋាភិបាលទាំងអស់ទៀតផង។ គឺបន្ទាប់ពីបញ្ចប់ការស្តីបន្ទោសនេះ លោកហ៊ុន សែន បានចង្អុលទៅកាន់តំណាងក្រសួងទាំងពីរ ព្រមទាំងព្រមានពីលទ្ធភាពក្នុងការដោះដូរគណៈរដ្ឋមន្ត្រីរបស់លោកនៅក្នុងឆ្នាំនេះ។
គួរបញ្ជាក់ថា មុនឈានដល់ការព្រមានធ្ងន់ៗបែបនេះ ប្រមុខរដ្ឋាភិបាលកម្ពុជាបានគូសបញ្ជាក់ថា លោកបានទុកពេលឲ្យរដ្ឋមន្ត្រីទាំងនេះយូរឆ្នាំហើយ ដើម្បីធ្វើការឆ្លុះកញ្ចក់ ងូតទឹក និង ដុះក្អែល ហើយពេលនេះដល់ពេលហើយដែលត្រូវព្យាបាលជំងឺដល់រដ្ឋមន្ត្រីអសកម្ម។
ជាកត់សម្គាល់ ការព្រមានដកមន្រ្តីរបស់ខ្លួនពីសំណាក់នាយករដ្ឋមន្ត្រីនេះ ធ្លាប់បានកើតមានជាហូរហែរួចមកហើយដែរនាពេលកន្លងមក។ តែទោះយ៉ាងណាក៏ដោយ លោកអ៊ូ វីរៈ ប្រធានវេទិកាអនាគត និង អ្នកតាមដានស្ថានការនយោបាយខ្មែរ បានស្វាគមន៍ចំពោះការព្រមាននេះ។ លោកថា វាគឺជារឿងល្អដែលលោកហ៊ុន សែន សម្រេចព្រមានរដ្ឋមន្ត្រីរបស់ខ្លួននៅពេលនេះ ជាពេលដែលអ្នកវិភាគស្ថានការនយោបាយរូបនេះ បញ្ជាក់ថា អាចធ្វើឲ្យគណបក្សប្រជាជនកម្ពុជាទទួលបានប្រជាប្រិយភាពបន្ថែមទៀតសម្រាប់ការបោះឆ្នោតនៅអាណត្តិក្រោយដោយហេតុថា ប្រជាពលរដ្ឋក៏ចង់ឲ្យមានការដោះដូរដូចនាយករដ្ឋមន្ត្រីដែរ។
ផ្ទុយទៅវិញ ប្រសិនបើការព្រមាននេះ គ្រាន់តែជាការបន្លាចដល់រដ្ឋមន្ត្រីរបស់ខ្លួនហើយមិនមានការដោះដូរទេនោះ លោកអ៊ូ វីរៈ យល់ឃើញថា វានឹងធ្វើឲ្យគណបក្សប្រជាជនកម្ពុជាដែលមានលោកនាយករដ្ឋមន្ត្រីហ៊ុន សែន ធ្វើជាប្រធាននឹងធ្លាក់ប្រជាប្រិយភាពជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ