ចោរប្រដាប់អាវុធមួយក្រុមចូលប្លន់ធនាគារ RHB Indochina នៅផ្លូវម៉ៅសេទុង ទាំងកណ្ដាលថ្ងៃត្រង់
នៅថ្ងៃព្រហស្បតិ៍នេះ ចោរប្រដាប់អាវុធមួយក្រុម បានសម្រុកចូលទៅប្លន់ក្នុងធនាគារ RHB Indochina ដែលមានទីតាំងនៅលើផ្លូវម៉ៅសេទុង កណ្ដាលរាជធានីភ្នំពេញ។ ហេតុការណ៍ដ៏កម្រនេះ កើតឡើងនៅវេលាម៉ោងប្រមាណ១១និង៣០នាទីថ្ងៃត្រង់ ដោយក្រុមចោរប្រមូលយកប្រាក់ពីធនាគារបានជាង១០ម៉ឺនដុល្លារ មុនពេលគេចខ្លួនបាត់ដោយសុវត្ថិភាព។ ភ្លាមៗក្រោយកើតហេតុ ធនាគារ RHB Indochina នៅលើផ្លូវម៉ៅសេទុង ត្រូវបានសមត្ថកិច្ចផ្អាកលែងឲ្យដំណើរការជាបណ្ដោះអាសន្ន ដើម្បីបើកប្រតិបត្តិការស៊ើបអង្កេត។
ចុះផ្សាយនៅថ្ងៃ៖
ស្តាប់ - ០១:៣៩
សកម្មភាពប្លន់ធនាគារ RHB Indochina កើតឡើងក្នុងរយៈពេលមួយប៉ប្រិចភ្នែកប៉ុណ្ណោះ។ នៅក្នុងវីដេអូកាមេរ៉ាសុវត្ថិភាពដែលវិទ្យុបារាំងអន្ដរជាតិ RFI ទទួលបាន, ក្រុមចោរប្រដាប់អាវុធដែលមានគ្នីគ្នាពី៤នាក់ បានសម្រុកចូលទៅក្នុងធនាគារ នៅវេលាម៉ោងប្រមាណ១១និង៣០នាទីថ្ងៃត្រង់។ ចោរប្រដាប់អាវុធម្នាក់ ភ្ជង់សន្តិសុខធនាគារឲ្យអង្គុយនៅលើកៅអី នៅពេលគ្នីគ្នារបស់ក្រុមចោរដទៃទៀត ចូលទៅប្រមូលលុយរបស់ធនាគារដាក់ចូលក្នុងកាបូបស្ពាយ។
ដ្បិតតែកាមេរ៉ាសុវត្ថិភាពនៅក្នុងធនាគារថតបានសកម្មភាពរបស់ក្រុមចោរក៏ពិតមែន ប៉ុន្តែគេមិនអាចកំណត់អត្តសញ្ញាណរបស់ជនល្មើសបានទេ ព្រោះនៅពេលធ្វើសកម្មភាព ក្រុមចោរប្លន់ប្រដាប់អាវុធ បានពាក់ម៉ាស និងមួកការពារសុវត្ថិភាពបិទបាំងផ្ទៃមុខមិនឲ្យឃើញឡើយ។
ជាការកត់សម្គាល់ ក្រៅតែពីបាត់បង់ប្រាក់ ហេតុការណ៍ប្លន់ប្រដាប់អាវុធនេះ មិនបានបង្កឲ្យជនណាម្នាក់រងរបួសទេ។ សមត្ថកិច្ចមិនបានបង្ហើបឲ្យដឹងពីថវិកាដែលបាត់បង់នៅក្នុងហេតុការណ៍ប្លន់ធនាគារនេះនៅឡើយ ខណៈព័ត៌មានក្រៅផ្លូវការអះអាងថា ក្រុមចោរបានប្រមូលយកប្រាក់ជាង១០ម៉ឺនដុល្លារ មុនពេលគេចខ្លួនតាមម៉ូតូពីរគ្រឿងទៅបាត់ដោយសុវត្ថិភាព។
ភ្លាមៗក្រោយពេលកើតហេតុ ធនាគារ RHB Indochina នៅលើផ្លូវម៉ៅសេទុង ត្រូវបានសមត្ថកិច្ចផ្អាកលែងឲ្យដំណើរការជាបណ្ដោះអាសន្ន ដើម្បីបើកប្រតិបត្តិការស៊ើបអង្កេត ដោយសាកសួរសន្តិសុខនិងបុគ្គលិកនៅក្នុងធនាគារ។ រហូតមកទល់យប់ថ្ងៃព្រហស្បតិ៍នេះ សមត្ថកិច្ចបានបដិសេធមិនផ្ដល់ព័ត៌មានលម្អិតបន្ថែមចំពោះករណីប្លន់ធនាគារដ៏កម្រនេះទេ ដោយសង្កត់ធ្ងន់ថា ករណីនេះកំពុងស្ថិតក្នុងដំណាក់កាលប្រមូលព័ត៌មាននិងស៊ើបអង្កេតនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ