អ្នករាយការណ៍សិទ្ធិមនុស្សនៃអ.ស.ប. នឹងបំពេញទស្សនកិច្ចលើកទី៣នៅកម្ពុជានៅសប្ដាហ៍ក្រោយ
អ្នករាយការណ៍ពិសេសនៃអង្គការសហប្រជាជាតិ ស្ដីពីស្ថានភាពសិទ្ធិមនុស្សនៅកម្ពុជា លោកស្រី រ៉ូណា ស្មីត នឹងអញ្ជើញមកដល់ប្រទេសកម្ពុជានាសប្ដាហ៍ក្រោយ សម្រាប់ដំណើរទស្សនកិច្ចរយៈពេល១០ថ្ងៃ។ នេះជាដំណើរទស្សនកិច្ចលើកទី៣របស់លោកស្រីមកកាន់កម្ពុជា ចាប់តាំងពីត្រូវបានតែងតាំងជាអ្នករាយការណ៍ពិសេសរបស់អង្គការសហប្រជាជាតិ ស្ដីពីស្ថានភាពសិទ្ធិមនុស្សនៅកម្ពុជាបន្តពីលោកស៊ូប៊ែឌី នៅឆ្នាំ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ដំណើរទស្សនកិច្ចរយៈពេល១០ថ្ងៃរបស់លោកស្រី រ៉ូណា ស្មីត នឹងចាប់ផ្ដើមពីថ្ងៃទី១០ដល់ថ្ងៃទី២០ខែតុលាខាងមុខ ដើម្បីពិនិត្យស្ថានភាពនយោបាយជាទូទៅ ក៏ដូចជាទិដ្ឋភាពសិទ្ធិមនុស្សសំខាន់ៗផ្សេងៗនៅកម្ពុជា។ ការរកឃើញទាំងឡាយតាមរយៈដំណើរទស្សនកិច្ចនេះ នឹងត្រូវលោកស្រី រ៉ូណា ស្មីត យកទៅចងក្រងជារបាយការណ៍ មុននឹងបង្ហាញទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ នៅខែកញ្ញា ឆ្នាំ២០១៧។
នៅក្នុងដំណើរទស្សនកិច្ចលើកទី៣នៅកម្ពុជានេះ លោកស្រី រ៉ូណា ស្មីត នឹងផ្ដោតការយកចិត្តទុកដាក់ជាសំខាន់ ទៅលើបច្ចុប្បន្នភាពនៃស្ថានភាពសិទ្ធិមនុស្សនៅកម្ពុជា និងការតាមដានទៅលើអនុសាសន៍ដែលបានដាក់ជូនទៅរដ្ឋាភិបាលកម្ពុជានាពេលកន្លងមក។ ទិដ្ឋភាពនៃការរើសអើង ក៏ជារបៀបវារៈសំខាន់មួយ ដែលលោកស្រីត្រូវពិនិត្យស្វែងយល់ដែរ ដោយចំពោះការវាយតម្លៃលើសិទ្ធិជនជាតិដើមភាគតិច និងក្រុមដែលបាត់បង់ឱកាស។
នៅក្នុងអំឡុងពេល១០ថ្ងៃនេះ លោកស្រី រ៉ូណា ស្មីត នឹងជួបភាគីពាក់ព័ន្ធនានា ជាអាថិ៍ មន្ដ្រីជាន់ខ្ពស់នៃរាជរដ្ឋាភិបាល តំណាងអង្គការសង្គមស៊ីវិល ព្រមទាំងសហគមន៍ការទូតជាដើម។ អ្នករាយការណ៍ពិសេសរូបនេះ ក៏នឹងអញ្ជើញចុះទៅដល់មូលដ្ឋានផងដែរ ដើម្បីប្រមូលព័ត៌មានដោយផ្ទាល់ពីសហគមន៍ពលរដ្ឋ។ លោកស្រីនឹងជួបជាមួយអ្នកសារព័ត៌មាន នៅក្នុងសន្និសីទបិទបញ្ចប់ដំណើរទស្សនកិច្ច ចាប់ពីម៉ោង៣ដល់ម៉ោង៤រសៀលថ្ងៃទី១៩ខែតុលា នៅការិយាល័យសិទ្ធិមនុស្សអង្គការសហប្រជាជាតិប្រចាំទីក្រុងភ្នំពេញ។
គួររំលឹកជូនថា លោកស្រី រ៉ូណា ស្មីត ជាសាស្ត្រាចារ្យច្បាប់ជនជាតិអង់គ្លេសមួយរូប ដែលបន្តបេសកកម្មពីលោក សូរិយា ប្រាសាទ ស៊ូប៊ែរឌី តាំងពីខែមីនាឆ្នាំ២០១៥ ដើម្បីតាមដាននិងរាយការណ៍ស្ដីពីស្ថានភាពសិទ្ធិមនុស្សនៅកម្ពុជា។ នៅក្នុងដំណើរទសន្សកិច្ចចុងក្រោយរបស់លោកស្រីនៅកម្ពុជាកាលពីខែមីនាដើមឆ្នាំនេះ លោកស្រី រ៉ូណា ស្មីត បានគូសបញ្ជាក់ថា ប្រទេសកម្ពុជាស្ថិតក្នុងស្ថានភាពខិតទៅជិតចំណុចកំពូលនៃគ្រោះថ្នាក់ តាមរយៈការគម្រាមកំហែងដោយកងកម្លាំង ការវាយដំលើរាងកាយរបស់តំណាងរាស្ត្របក្សប្រឆាំង និងដំណើរការនីតិវិធីរបស់តុលាការលើមន្ដ្រីបក្សប្រឆាំងនិងសង្គមស៊ីវិល។ ដោយក្ដីព្រួយបារម្ភ លោកស្រីបានអំពាវនាវឲ្យមានការអនុវត្តច្បាប់ដោយស្មើភាព និងយុត្តិធម៌ ដល់គ្រប់គណបក្សនយោបាយ ដើម្បីការពារលំហប្រជាធិបតេយ្យនៅក្នុងដំណើរការបោះឆ្នោតនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ