លោក ប៊ូ ឡាំ៖ អភិបាលក្រុងបានលុងប្រឆាំងបញ្ជានិងប្រើអំណាចបំពាន
តំណាងរាស្ត្រមណ្ឌលរតនៈគីរី របស់គណបក្សប្រជាជនកម្ពុជា លោក ប៊ូ ឡាំ បានចុះហត្ថលេខាលើលិខិពីរផ្សេងគ្នាផ្ញើជូនរដ្ឋសភា និងព្រឹទ្ធសភា។ ជាលិខិតដើម្បីស្នើសុំឱ្យដកអភិបាលក្រុងបានលុងចេញពីតំណែង ព្រោះរឿងបំពាន់អំណាច និងប្រឆាំងបញ្ជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ការប្រឆាំងបញ្ជាប្រមុខរដ្ឋាភិបាល និងការប្រើអំណាចបំពានលើប្រជាពលរដ្ឋ គឺជាមូលហេតុដែលធ្វើឱ្យលោក ប៊ូ ឡាំ តំណាងរាស្ត្រកូតាបក្សកាន់អំណាចស្នើដល់រដ្ឋសភាឱ្យដកមន្ត្រីក្នុងជួបក្សខ្លួនឯង។ បើតាមតំណាងរាស្ត្របក្សកាន់អំណាចរូបនេះ អភិបាលក្រុងបានលុង គឺលោក អ៊ុក សំអុល បានយកដីនៅកណ្តាលក្រុងដែលមានទំហំប្រមាណ៥០ គុណ១១០ ម៉ែត្រយកទៅធ្វើអាជីវកម្មដើម្បីប្រមូលយកផលប្រយោជន៍របស់ខ្លួន និងបានធ្វើឱ្យប្រជាពលរដ្ឋក្នុងតំបន់រងផលប៉ះពាល់។
លោក បូឡាំ បានបញ្ជាក់ថា ដីនៅតំបន់ផ្សារនោះ គឺរដ្ឋាភិបាលបានចារទុកមិនឱ្យធ្វើអាជីវកម្មនោះទេ។ ក្រៅពីនេះ ក៏មានដែរ ការប្រើប្រាស់អំណាចគំរាមកំហែងដល់អ្នកតវ៉ាផងដែរ ពីសំណាក់អភិបាលក្រុងរូបនេះ។
សូមបញ្ជាក់ថា តាមរយៈចុះហត្ថលេខាកាលពីចុងខែមេសានេះ លោក ប៊ូ ឡាំ តំណាងរាស្ត្រគណបក្សប្រជាជនកម្ពុជា បានសរសេរលិខិតពីរផ្សេងគ្នា ទៅកាន់រដ្ឋសភាតាមរយៈគណៈកម្មការទី៤ និងព្រឹទ្ធសភាជាតិ។ ការសរសេរនេះ គឺមានពាក្យបណ្តឹងពីប្រជាពលរដ្ឋប្រមាណជាង២១១នាក់ដែលបានប្តឹងមកកាន់អ្នកតំណាងរាស្ត្រគណបក្សប្រជាជន។
អភិបាលក្រុងបានលុង លោក អុក សំអុល បានបិដសេធថា លោកមិនបានប្រើអំណាចបំពាននោះទេ។ លោកក៏បានស្នើឱ្យរដ្ឋាភិបាលផ្តើមសើបអង្កេតពីករណីនេះផងដែរ។
ប្រធានគណៈកម្មការទី៤របស់រដ្ឋសភា លោក ហ៊ុន ណេង បានលើកឡើងថា លោកមិនមានភារកិច្ចចាត់ការសំណុំរឿងនេះទេ ព្រោះកិច្ចការដកហូតដំណែងនេះ គឺជាភារៈរដ្ឋបាលរបស់ក្រសួងមហាផ្ទៃ។ តាមរយៈលោក ខៀវ សុភ័គអ្នកនាំពាក្យក៏មិនអាចទាក់ទងបាននោះដែរ។
សូមបញ្ជាក់ថាខេត្តរតនៈគីរី ក៏ត្រូវបានគេកត់សំគាល់ឃើញថា មានបញ្ហាដីធ្លីរ៉ាំរៃមួយចំនួននៅទីនោះផងដែរ។ បើទោះបីជាបែបណាក៏ដោយ លោក ប៊ូ ឡាំតំណាងរាស្ត្រគណបក្សប្រជាជនកម្ពុជា បានបញ្ជាក់ថា ការស្នើដកអភិបាលក្រុងនេះ គឺជាធ្វើក្នុងនាមជាតំណាងរាស្ត្រដែលជាអ្នកទទួលខុសត្រូវក្នុងមណ្ឌលរបស់ខ្លួន។ ប៉ុន្តែអភិបាលក្រុងបានលុង ស្នើឱ្យស៊ើបអង្កេតករណីនេះតាមផ្លូវច្បាប់ ហើយអះអាងថាអ្វីដែលខ្លួនធ្វើគឺដើម្បីការពារប្រយោជន៍ពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ