សង្គ្រោះជាតិគ្រោងស្នើលុបចោលសន្ធិសញ្ញាព្រំដែនឆ្នាំ២០០៥ ខណៈមន្ត្រីរដ្ឋាភិបាលថា មិនអាចទៅរួច
តំណាងរាស្ត្រគណបក្សសង្គ្រោះជាតិ គ្រោងនឹងស្នើឲ្យសភា បោះឆ្នោតលុបចោលនូវសន្ធិសញ្ញាបំពេញបន្ថែមឆ្នាំ២០០៥។ ប៉ុន្តែគម្រោងនេះ ត្រូវបានមន្ត្រីរដ្ឋាភិបាលទទួលបន្ទុកកិច្ចការព្រំដែន អះអាងថា មិនអាចទៅរួចនោះទេ ព្រោះនេះជាសន្ធិសញ្ញាអន្តរជាតិ ដែលមានទាំងការទទួលស្គាល់ពីអតីតព្រះមហាក្សត្រថែមទៀតផង។
ចុះផ្សាយនៅថ្ងៃ៖
ស្តាប់ - ០២:១៤
បន្ទាប់ពីបានទៅពិនិត្យមើលព្រំដែនកម្ពុជា-វៀតណាម នៅខេត្តរតនគិរី កាលពីដើមសប្តាហ៍នេះ តំណាងរាស្ត្រគណបក្សសង្គ្រោះជាតិ កំពុងរៀបចំរបាយការណ៍ ដាក់ទៅកាន់ក្រសួងការបរទេស នៅសប្តាហ៍ក្រោយ ដើម្បីជំរុញឲ្យមានការសរសេរកំណត់ទូត ទៅភាគីវៀតណាម។ ហើយប្រសិនបើរដ្ឋាភិបាល កម្ពុជា នៅតែមិនព្រមអើពើ គណបក្សប្រឆាំង នឹងកោះហៅរដ្ឋមន្ត្រីដែលទទួលបន្ទុកកិច្ចការព្រំដែន ឲ្យចូលទៅឆ្លើយបំភ្លឺ នៅរដ្ឋសភាទៀត។ លើសពីនេះ គណបក្សសង្គ្រោះជាតិ បានបញ្ជាក់ថា នឹងស្នើឲ្យលុបចោល នូវសន្ធិសញ្ញាបំពេញបន្ថែម ដែលធ្វើឡើង ដោយរដ្ឋាភិបាលកម្ពុជា និងវៀតណាម កាលពីឆ្នាំ ២០០៥។
លោកអ៊ុំ សំអាន តំណាងរាស្ត្រគណបក្សសង្គ្រោះជាតិ បានថ្លែងនៅថ្ងៃពុធនេះថា សន្ធិសញ្ញាបំពេញបន្ថែមនោះ បានធ្វើឲ្យកម្ពុជាបាត់បង់ទឹកដី ដោយសារតែការកំណត់បង្គោលព្រំដែន ជាមួយវៀតណាម។ លោកអ៊ុំ សំអាន បានបន្តថា ដើម្បីលុបចោលសន្ធិសញ្ញានោះបាន គឺសភា ត្រូវការសម្លេងគាំទ្រ ៥០ភាគរយ បូក១។ ទោះបីជាបច្ចុប្បន្ន គណបក្សសង្គ្រោះជាតិ មានសម្លេងតែ ៥៥ក៏ដោយ ប៉ុន្តែបក្សប្រឆាំងនឹងគៀងគរសម្លេងពីគណបក្សប្រជាជនកម្ពុជា ដែលខ្លួនអះអាងថា នៅមានអ្នកស្នេហាជាតិខ្លះដែរ មកបង្ក្រប់សម្លេង ដែលខ្វះនោះ។ នេះបើតាមលោកអ៊ុំ សំអាន ដដែល។
តាមតំណាងរាស្ត្រគណបក្សសង្គ្រោះជាតិ ការលុបចោលនូវសន្ធិសញ្ញាអន្តរជាតិនេះ អាចធ្វើបានដោយយោងទៅលើមាត្រា ៩០ នៃរដ្ឋធម្មនុញ្ញកម្ពុជា។
ផ្ទុយពីការលើកឡើងនេះ លោក វ៉ា គឹមហុង ទេសរដ្ឋមន្ត្រីកម្ពុជាទទួលបន្ទុកកិច្ចការព្រំដែន បានអះអាងដែរថា រឿងលុបចោលសន្ធិសញ្ញាបំពេញបន្ថែមឆ្នាំ២០០៥ គឺមិនអាចទៅរួចនោះទេ។ លោកវ៉ា គឹមហុង បានបន្ថែមថា ការពិតបញ្ហាព្រំដែន គឺកម្ពុជា និងវៀតណាម បានធ្វើការរួមគ្នាជារៀងរាល់ថ្ងៃរួចហើយ។ ហើយរាល់ការចោទប្រកាន់របស់តំណាងរាស្ត្របក្សប្រឆាំង គឺជារឿងភូតកុហកទាំងអស់។
សូមបញ្ជាក់ថា បញ្ហាព្រំដែនកម្ពុជា-វៀតណាម គឺនៅតែជាប្រធានបទក្តៅក្នុងពេលបច្ចុប្បន្ន។ កាលពីដើមសប្តាហ៍នេះ តំណាងរាស្ត្រគណបក្សសង្គ្រោះជាតិ និងប្រជាពលរដ្ឋនៅព្រំដែន ខេត្តរតនគិរី បានអះអាងថា មានស្រះទឹកយ៉ាងហោចណាស់ចំនួន៧ ដែលវៀតណាមបានលួចជីកនៅក្នុងតំបន់ស ដែលជាតំបន់ហាមឃាត់។ តំបន់ហាមឃាត់ ដែលភាគីកម្ពុជា-វៀតណាម នៅមិនទាន់បានឯកភាពគ្នាបោះបង្គោលព្រំដែននៅឡើយ បែរជាអាជ្ញាធរវៀតណាម បានជីកស្រះជាឯកតោភាគី ដើម្បីយកទៅស្រោចស្រពដំណាំម្រេច និងកៅស៊ូនៅក្បែរនោះទៅវិញ។ ចំពោះរឿងនេះ លោកវ៉ា គឹមហុង បាននិយាយថា នេះជារឿងដែលមិនខុសច្បាប់នោះទេ ហើយការជីកស្រះ ក៏មិនអាចធ្វើឲ្យបាត់បង់ដីនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ