ជំនួបស ខេង និង សម រង្ស៊ី គ្មានលទ្ធផល
មេដឹកនាំគណបក្សប្រជាជនកម្ពុជា និងមេដឹកនាំគណបក្សសង្គ្រោះជាតិនៅល្ងាចថ្ងៃទី២៣ កញ្ញានេះ បានជួបប្រជុំគ្នាដូចការគ្រោងទុក។ កិច្ចប្រជុំមានសមាសភាពម្ខាង៥រូប នេះបានពិភាក្សាលើច្បាប់បោះឆ្នោតថ្មី។ យ៉ាងណាក៏ដោយ កិច្ចប្រជុំនេះ គឺគ្មានលទ្ធផលអ្វីនោះទេ ប៉ុន្តែភាគីទាំងពីរគ្រោងនឹងជួបគ្នានៅសប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
កិច្ចប្រជុំរយៈពេលមួយម៉ោងកន្លះរវាងលោក ស ខេង និងលោក សម រង្ស៊ី មិនមានលទ្ធផលនោះទេ។ លោកស ខេង និងលោក សមរង្ស៊ី មិនបានធ្វើសន្និសីទសារព័ត៌មាននោះឡើយ។ ប៉ុន្តែអ្នកនាំពាក្យកិច្ចប្រជុំទាំងពីរគណបក្សគឺលោកសក់ ស៊ីថា និងលោក អេង ឆៃអ៊ាង បានប្រាប់អ្នកសារព័ត៌មាននៅក្រោយកិច្ចប្រជុំថា គណបក្សនៅខ្វែងគំនិតគ្នាចំនួន៥ចំណុចលើច្បាប់បោះឆ្នោតថ្មី។ ចំណុចទាំង៥នោះគឺ ទី១ ការហែក្បួនឃោសនាបោះឆ្នោត ២ ការលើកបដាគណបក្សនៅទីសាធារណៈ ទី៣ រយៈពេលនៃការឃោសនា ទី៤ ទោសបញ្ញត្តិ និងការឈរឈ្មោះបោះឆ្នោត និងចុងក្រោយគឺការបន្ថែមទោសពិន័យ។
ដោយឡែកលោក សក់ ស៊ីថា បានបន្ថែមថា មេដឹកនាំទាំងពីរត្រូវការពេលវេលាដើម្បីសិក្សាលើចំណុចទាំង៥នេះព្រោះថា ជំនួបនៅថ្ងៃនេះគឺជាស្វែងយល់ពីគំនិតនិងបំណងរបស់ភាគីម្ខាងៗតែប៉ុណ្ណោះ។អ្នកនាំពាក្យកិច្ចប្រជុំដដែលបានគូសបញ្ជាក់ថា ក្រុមការងារនៃគណបក្សទាំងពីរបានព្រមព្រៀងគ្នាលើច្បាប់បោះឆ្នោតថ្មីនេះ ប្រមាណ៩៨ភាគរយហើយ។
ជំនួបនៅថ្ងៃពុធទី២៣ កញ្ញានេះ បានពិភាក្សាតែប្រធានបទតែមួយប៉ុណ្ណោះគឺច្បាប់នៃការបោះឆ្នោតថ្មីដែលមានប្រមាណ១៩០មាត្រា។ ច្បាប់នេះត្រូវបានតាក់តែងសារឡើងវិញក្រោយគណបក្សសង្គ្រោះជាតិចូលសភា និងជាផ្នែកមួយនៃកំណែទម្រង់បោះឆ្នោតផងដែរ។ ប្រធានបទផ្សេងៗដូចជាការឃុំខ្លួនសកម្មជនគណបក្សសង្គ្រោះជាតិ និងតំណាងរាស្ត្រព្រឹទ្ធសភា និងរបៀបវារៈវិសោធនកម្មបទបញ្ជាផ្ទៃក្នុងរបស់រដ្ឋសភាគឺមិនត្រូវបានយកមកពិភាក្សានោះទេ។
សមាសភាពចូលរួមកិច្ចប្រជុំនៅថ្ងៃទី២៣ កញ្ញា មានម្ខាងៗចំនួន៥រូបគណបក្សប្រជាជនកម្ពុជាដឹកនាំដោយលោក ស ខេង ជាប្រធាន លោក គាត ឈន់ លោកស្រីម៉ែន សំអន លោក សក់ ស៊ីថា និង លោកកើត រិទ្ធ។ ដោយឡែកគណបក្សសង្គ្រោះជាតិ ដឹកនាំដោយ លោក សម រង្ស៊ី ជាប្រធាន លោក កឹមសុខា ជាអនុប្រធាន លោកយឹម សុវណ្ណ លោក អេងឆៃអ៊ាង និងលោក យ៉ែម បុញ្ញឫទ្ធិ។
បើទោះបីជាជំនួបរវាងលោក ស ខេង និងលោក សម រង្ស៊ីមិនមានលទ្ធផលអ្វីជាផ្លែផ្កានៅពេលនេះក៏ដោយ ក៏គណបក្សទាំងពីរព្រមព្រៀងគ្នានឹងជួបសារជាថ្មីនៅសប្តាហ៍បន្តទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ