បេក្ខភាពសមាជិកគ.ជ.ប ថ្មី នៅមិនទាន់បើកគ្របអស់នៅឡើយ
ទោះជាកាលកំណត់នៃការទទួលពាក្យសម្រាប់តំណែងសមាជិក គ.ជ.ប ថ្មី ដែលបាន កំណត់ ៤នាក់ម្ខាងពីគណបក្សជាប់ឆ្នោតទាំងពីរជិតដល់ទីបញ្ចប់ទៅហើយក៏ដោយ ក៏គេនៅមិនទាន់អាចដឹងបានពីឥស្សរជនណាខ្លះនៅឡើយ ក្រៅពីលោកហង្ស ពុទ្ធា និងលោក គួយ ប៊ុនរឿន។នៅថ្ងៃនេះដែរ ក្រុមអង្គការសង្គមស៊ីវិល មួយចំនួនកំពុងមានការចាប់អារម្មណ៍ហើយបានទៅដាក់ពាក្យជាបន្តបន្ទាប់ចាប់តាំងពីម្សិលមិញនៅរដ្ឋសភាតាមរយៈកូតាគណបក្សសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០២:១៤
នៅសល់ប្រមាណជា៣ថ្ងៃទៀតប៉ុណ្ណោះ ការទទួលពាក្យសម្រាប់បេក្ខភាពសមាជិកគណៈកម្មាធិការជាតិរៀបចំការបោះឆ្នោត (គ.ជ.ប)ថ្មីនឹងត្រូវបញ្ចប់។ ក៏ប៉ុន្តែគេនៅតែមិនទាន់ដឹងច្បាស់១០០ ភាគរយនៅឡើយទេថា បេក្ខជនដែលគណបក្សទាំងពីរសម្លឹងឃើញពិតប្រាកដចំនួន ៨នាក់នោះជាអ្នកណានៅឡើយ ខណៈដែលលោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជា និចហ្វិក ត្រូវបានជ្រើសរើសដោយមានការយល់ព្រមពីមេដឹកនាំគណបក្សនយោបាយជាប់ឆ្នោតទាំងពីរកាលពីពេលថ្មីៗនេះ។
ក៏ប៉ុន្តែក្រៅពីលោក ហង្ស ពុទ្ធា ដែលជាសមាជិកទី៩ មកពីសង្គមស៊ីវិល ជំនួស លោកស្រី
វេជ្ជបណ្ឌិត ពុង ឈីវកេក ដែលមិនទទួលយកតំណែងនេះ គេអាចដឹងបានខ្លះៗថា មានបេក្ខជន មួយចំនួនហើយដែលអាចនឹងបង្ហាញមុខនៅក្នុង គ.ជ.ប ថ្មីនោះ គឺមានលោក គួយ
ប៊ុនរឿន មកពីកូតាគណបក្សសង្គ្រោះជាតិ និងបេក្ខភាព៤រូបទៀតមកពីខាងកូតាគណបក្សកាន់អំណាច។
លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា បានឲ្យវិទ្យុបារាំងដឹងនៅថ្ងៃសុក្រនេះថា ជាផ្លូវការដំណាក់កាលចុងក្រោយក៏មានការផ្លាស់ប្តូរដែរ បើទោះណាជាថ្នាក់ដឹកនាំបានកំណត់ឈ្មោះបេក្ខជនរួចហើយក៏ដោយ។ លោកថារឿងនេះអាស្រ័យទៅលើការសម្រេច
ចិត្តខ្ពស់របស់បុគ្គល ដែលត្រូវលះបង់តំណែងនិងតួនាទីបច្ចុប្បន្ន ហើយទៅចូលរួមជាមួយ ស្ថាប័នគ.ជ.ប មួយដែលឯករាជ្យ។
ដោយឡែក មកទល់ថ្ងៃនេះដែរគេសង្កេតឃើញសមាសភាពមកពីអង្គការសង្គមស៊ីវិលមួយចំនួនទៀត បានដាក់ពាក្យទៅអគ្គលេខាធិការដ្ឋានរដ្ឋសភា ក្នុងនោះមានលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យផងដែរ ដែលបានដាក់ពាក្យកាលពីថ្ងៃព្រហស្បតិ៍ម្សិលមិញ សម្រាប់កូតាគណបក្សសង្គ្រោះជាតិ។
លោក យ៉ែម បុញ្ញរិទ្ធិ អ្នកនាំពាក្យគណបក្សសង្គ្រោះជាតិ បានថ្លែងថ្ងៃនេះដែរថា គណបក្សលោកកំពុងរង់ចាំបញ្ជីឈ្មោះពីរដ្ឋសភាវិញ ដើម្បីធ្វើការពិនិត្យមើលពីសម្ថភាព និងលក្ខណៈសម្បត្តិរបស់បេក្ខជនបីរូបទៀត ដោយក្នុងនោះមានពីររូបមកពីអង្គការសង្គមស៊ីវិល។
សូមបញ្ជាក់ថារហូតមកទល់ថ្ងៃម្សិលមិញ អ្នកដែលទៅសុំពាក្យនៅរដ្ឋសភា មានប្រមាណជាង ៥០នាក់ ក៏ប៉ុន្តែចំនួនពាក្យដែលបានដាក់ដើម្បីប្រជែងគ្នាជាបេក្ខជនចូលបំរើការងារជាសមាជិក គ.ជ.ប ថ្មី មានប្រហែលពី ៤ ទៅ៥នាក់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ