បក្សកាន់អំណាច ស្នើបក្សប្រឆាំងឲ្យគោរពច្បាប់
បន្ទាប់ពីគណបក្សសង្គ្រោះជាតិ បានចេញថ្លែងការណ៍អំពាវនាវឲ្យដោះលែងដោយគ្មានលក្ខខណ្ឌនូវសកម្មជន ដែលទើបត្រូវបានចាប់ខ្លួន កាលពីថ្ងៃទី ៥សីហា អ្នកនាំពាក្យគណបក្សប្រជាជនកម្ពុជា នៅថ្ងៃទី ៦សីហានេះ បានស្នើទៅបក្សប្រឆាំងវិញ ឲ្យគោរពច្បាប់របស់កម្ពុជាផង។ គណបក្សប្រជាជនកម្ពុជា បញ្ជាក់ថា ខ្លួននៅតែប្រកាន់ខ្ជាប់នូវគោលការណ៍ ៤ចំនុច ហើយក៏បញ្ជាក់ដដែលថា បក្សកាន់អំណាច គ្មានសមត្ថកិច្ចក្នុងរឿងប្រព័ន្ធតុលាការនោះទេ។
ចុះផ្សាយនៅថ្ងៃ៖
ស្តាប់ - ០២:០៦
អ្នកនាំពាក្យគណបក្សប្រជាជនកម្ពុជា លោកសួស យ៉ារ៉ា បានប្រាប់វិទ្យុបារាំង នៅថ្ងៃទី ០៦សីហានេះថា គណបក្សកាន់អំណាច នៅតែប្រកាន់គោលការណ៍ ៤ចំនុចរបស់ខ្លួនដដែល។ គោលការណ៍ទាំង ៤ចំនុច ដែលរួមមាន ការប្រកាន់ខ្ជាប់នូវវប្បធម៌សន្ទនា ប៉ុន្តែត្រូវស្ថិតនៅក្រោមឆ័ត្រនៃរដ្ឋធម្មនុញ្ញ និងច្បាប់នានា។ គោរពនូវកិច្ចព្រមព្រៀងថ្ងៃទី ២២កក្កដា ឆ្នាំ ២០១៤។ គោរពសិទ្ធិមនុស្ស និងសេរីភាពបុគ្គលគ្រប់រូប ក្នុងការអនុវត្តសិទ្ធិសេរីភាពរបស់ខ្លួនក្រោមច្បាប់របស់រដ្ឋ និងការពង្រឹងនីតិរដ្ឋនៅកម្ពុជា។
ការបញ្ចាក់របស់អ្នកនាំពាក្យគណបក្សប្រជាជនកម្ពុជា នៅពេលនេះ ធ្វើឡើង បន្ទាប់ពីគណបក្សសង្គ្រោះជាតិ បានចេញសេចក្តីថ្លែងការណ៍ សម្តែងការសោកស្តាយ ចំពោះការចាប់ខ្លួនសកម្មជនគណបក្សសង្គ្រោះជាតិជាបន្តបន្ទាប់ កាលពីថ្ងៃទី ៥សីហា។ ការចាប់ខ្លួន ដែលបក្សប្រឆាំង អះអាងថា បានធ្វើផ្ទុយពីស្មារតីនៃកិច្ចព្រមព្រៀង ថ្ងៃទី ២២កក្កដា ឆ្នាំ ២០១៤ រវាងគណបក្សជាប់ឆ្នោតទាំងពីរ។ បក្សសង្គ្រោះជាតិ ថែមទាំងបាន ស្នើឲ្យបក្សកាន់អំណាចបញ្ឃប់ជាបន្ទាន់ ក្នុងការប្រើប្រាស់ប្រព័ន្ធតុលាការ ដើម្បីចោទប្រកាន់ និងចាប់ខ្លួន សកម្មជនរបស់ខ្លួនថែមទៀតផង។
ផ្ទុយពីការចោទប្រកាន់នេះ អ្នកនាំពាក្យគណបក្សកាន់អំណាច បានបកស្រាយថា គណបក្សប្រជាជនកម្ពុជា មិនមានអំណាចលើប្រព័ន្ធតុលាការ ដែលជាអំណាចឯករាជ្យនៅកម្ពុជានោះទេ។ លោកសួស យ៉ារ៉ា បានបញ្ជាក់ថា បក្សប្រជាជន ស្វាគមន៍ចំពោះការចរចាគ្រប់រូបភាព ប៉ុន្តែក៏បានស្នើឲ្យបក្សសង្គ្រោះជាតិ ហ៊ានប្រឈមមុខជាមួយច្បាប់របស់កម្ពុជាផងដែរ។
លោកសួស យ៉ារ៉ា និយាយថា៖ «ខ្ញុំអាចជូនសេចក្តីទៅគណបក្សដៃគូថា បើសិនជាចង់ចរចា ឬមួយក៏យ៉ាងម៉េច បើចរចា ក្នុងន័យសហប្រតិបត្តិការ ដើម្បីធ្វើម៉េចពង្រឹងនិតិរដ្ឋនៅកម្ពុជា ប្រហែលជាល្អជាង ការចរចាដើម្បីដោះលែងជនផ្សេងៗ ព្រោះបើចង់ចរចាត្រូវតែធ្វើតាមនីតិវិធីតុលាការ ដើម្បីប្តឹងទៅសាលាឧទ្ធរណ៍ ឬមួយក៏ស្វែងរកភស្តុតាងណាថ្មី ដើម្បីបញ្ជាក់ថាពួកគេគ្មានកំហុស អានឹងរឿងរបស់គាត់។»
សូមបញ្ជាក់ថា ស្ថានភាពនយោបាយនៅកម្ពុជា ក្នុងពេលថ្មីៗនេះ កំពុងតែកើនកំដៅ ដោយសារមានការផ្ទន្តាទោស ចាប់ខ្លួន និងកំពុងតែតាមចាប់ខ្លួនសកម្មជនរបស់គណបក្សសង្គ្រោះជាតិជាបន្តបន្ទាប់។ សកម្មភាពទាំងនេះ បានធ្វើឲ្យបក្សប្រឆាំង ចោទបក្សកាន់អំណាចថា បានលូកដៃចូលក្នុងប្រព័ន្ធតុលាការ ក្នុងគោលដៅគំរាមកំហែងសកម្មជនបក្សសង្គ្រោះជាតិ មិនឲ្យបំពេញតួនាទី ស្របតាមលទ្ធិប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ