កម្ពុជា-បោះឆ្នោត

ជនបរទេសជាង៣០០នាក់មានឈ្មោះនៅក្នុងបញ្ជីបោះឆ្នោត

ការបិទបញ្ជីឈ្មោះបោះឆ្នោតដំបូងនឹងបិទបញ្ចប់នៅល្ងាចថ្ងៃទី១៤មករានេះ តាមការគ្រោងទុករបស់គណៈកម្មាធិការជាតិរៀបចំការបោះឆ្នោត។ លោក ហង្ស ពុទ្ធា អ្នកនាំពាក្យគជបបានវាយតម្លៃថា ការបិទផ្សាយបញ្ជីឈ្មោះនេះដំណើរការទៅល្អហើយពលរដ្ឋយ៉ាងច្រើនកុះករបានអញ្ជើញទៅពិនិត្យឈ្មោះ។ រយៈពេល១៤ថ្ងៃនៃការពិនិត្យឈ្មោះគជបថា មានជនបរទេសជាង៣០០នាក់មានឈ្មោះនៅក្នុងបញ្ជីឈ្មោះបោះឆ្នោត។ នេះបើយោងតាមបណ្ដឹងដែលគជបទទួលបាន។ ហើយជនបរទេសជាង៣០០នេះក៏មិនទាន់ត្រូវលុបឈ្មោះចេញដែរដោយរងចាំការបញ្ជាក់សញ្ជាតិពីក្រសួងមហាផ្ទៃនិងអគ្គនាយកដ្ឋានអន្តោប្រវេសន៍។

ចុះផ្សាយនៅថ្ងៃ៖ 14/01/2017 - 08:37

ដោយ៖ អេង គីមហុង

ផ្សាយពាណិជ្ជកម្ម

១៤ថ្ងៃនៃការបិទផ្សាយបញ្ជីឈ្មោះបោះឆ្នោតនេះ គឺក្រុមប្រឹក្សាឃុំសង្កាត់ទទួលបានបណ្ដឹងជាង៧០០ករណី។ ហើយ១៦ករណីបានមកដល់ដៃគជបដែលជាប្រភេទបណ្ដឹងសង្ស័យថា ជនជាតិរៀតណាមនិងជាតិសាសន៍ផ្សេងទៀតបានមកចុះឈ្មោះបោះឆ្នោតរហូតដល់ទៅជាង៣០០នាក់។

សម្រាប់ដំណោះស្រាយចំពោះការរកឃើញជនបរទេសជាង៣០០នាក់នៅក្នុងបញ្ជីឈ្មោះបោះឆ្នោតដែលបណ្ដឹងភាគច្រើនចេញពីគណបក្សសង្គ្រោះជាតិនេះ គជបកំពុងរៀបចំឯកសារបញ្ជូនទៅក្រសួងនិងស្ថាប័នពាក់ព័ន្ធដែលមានសមត្ថកិច្ចចេញអត្តសញ្ញាណបណ្ណទៅប្រជាពលរដ្ឋ។

ហើយក៏គ្រោងរៀបចំឯកសារបញ្ជូនទៅអគ្គនាយកដ្ឋានអន្តោប្រវេសន៍ដើម្បីឲ្យស្ថាប័នទាំងនេះបញ្ជាក់មកគជបវិញថា ឈ្មោះជនបរទេសដែលមាននៅក្នុងបញ្ជីឈ្មោះបោះឆ្នោតជាប្រភេទជនអន្តោប្រវេសន៍ឬក៏ពួកគេទទួលបានសញ្ជាតិជាជនជាតិខ្មែរហើយ។ ក្រោយទទួលបានការឆ្លើយតបគជបនឹងកោះប្រជុំជាមួយម្ចាស់បណ្ដឹងជជែកលើបញ្ហានេះ។

លោក ហង្ស ពុទ្ធា អ្នកនាំពាក្យគជបអះអាងថា ជានីតិវិធីគជបមិនអាចលុបឈ្មោះជនបរទេសទាំងនោះភ្លាមៗទេពោលគឺអ្នកប្ដឹងត្រូវមានសាក្សីនិងភស្ដុតាង។ លោកបន្ថែមថាសម្រាប់គជបមិនមែនចេះតែដោះស្រាយពាក្យបណ្ដឹងដោយគ្មានហេតុផលនោះទេ។

ដោយឡែកចំពោះពាក្យបណ្ដឹងជាង៧០០ករណីផ្សេងទៀតជាប្រភេទបណ្ដឹងកែទិន្នន័យឈ្មោះខុសអក្សរាវិរុទ្ធនិងភេទជាដើម។ លោក ហង្ស ពុទ្ធា បន្តវាយតម្លៃថាពលរដ្ឋមិនទាំងអស់ទេដែលអញ្ជើញទៅពិនិត្យឈ្មោះព្រោះថា ករណីខ្លះពលរដ្ឋចុះឈ្មោះរួចហើយពួកគេត្រឡប់ទៅធ្វើការនៅក្រៅប្រទេសវិញ។

លោក ហង្ស ពុទ្ធា ក៏បានលើកចិត្តដល់ពលរដ្ឋខ្មែរផ្សេងទៀតកុំឲ្យមានការព្រួយបារម្ភនៅពេលដែលមិនមានឈ្មោះនៅក្នុងបញ្ជីឈ្មោះបោះឆ្នោតឲ្យតែពួកគេមានបង្កាន់ដៃ។ម្យ៉ាងទៀតឈ្មោះពួកគេអាចនៅការិយាល័យផ្សេងក្រៅពីការិយាដែលចុះឈ្មោះ។ក្រោយការដោះស្រាយពាក្យបណ្ដឹងចប់សព្វគ្រប់គជបនឹងប្រកាសសុពលភាពនៃបញ្ជីឈ្មោះបោះឆ្នោត។ បន្ទាប់មកក៏ផ្ដើមចុះឈ្មោះបេក្ខជននៃគណបក្សនយោបាយ។

សូមបញ្ជាក់ថា ពលរដ្ឋខ្មែរ៩លាន៦សែននាក់ដែលមានសិទ្ធចុះឈ្មោះបោះឆ្នោតប៉ុន្តែក្នុងនោះមានប្រជាពលរដ្ឋតែចំនួន៧លាន៨សែននាក់ប៉ុណ្ណោះបានទៅចុះឈ្មោះបោះឆ្នោត៕