គិតត្រឹមថ្ងៃទី១១មករា, CNRP បានប្តឹងទៅគ.ជ.ប. ៥ ករណី សង្ស័យជនបរទេសមានឈ្មោះបោះឆ្នោត
ប្រធាននាយកដ្ឋានបោះឆ្នោតនិងនីតិកម្ម របស់គណបក្សសង្គ្រោះជាតិ អ្នកស្រី ម៉េង សុភារី ប្រាប់វិទ្យុបារាំងអន្តរជាតិថា គិតត្រឹមថ្ងៃទី១១មករា ល្ងាចម្សិលមិញនេះ បក្សសង្គ្រោះជាតិ បានប្តឹងទៅគ.ជ.ប. ចំនួន៥ករណី ទាក់ទងទៅនឹងការសង្ស័យជនបរទេស មានឈ្មោះក្នុងបញ្ជីបោះឆ្នោតឃុំសង្កាត់។ ពាក្យបណ្តឹងទាំងនោះ មានមកពីខេត្តកំពង់ឆ្នាំង កំពង់ស្ពឺ ព្រះសីហនុ ប៉ៃលិន និង ព្រៃវែង។ បើតាមអ្នកស្រី ម៉េង សុភារី, ភាគច្រើននៃបណ្តឹងទាំងនោះ គឺបក្សប្រឆាំងប្តឹងចំពោះសេចក្តីសម្រេចរបស់ក្រុមប្រឹក្សាឃុំសង្កាត់ ដែលសម្រេចរក្សាទុកឈ្មោះរបស់ជនបរទេស។ សូមស្តាប់ប្រាសាសន៍របស់អ្នកស្រី ម៉េង សុភារី ប្រធាននាយកដ្ឋានបោះឆ្នោតនិងនីតិកម្ម របស់គណៈបក្សសង្គ្រោះជាតិ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
ក៏ប៉ុន្តែអ្នកនាំពាក្យគ.ជ.ប.ប្រាប់វិទ្យុបារាំងនៅល្ងាចថ្ងៃពុធថា រហូតមកដល់ល្ងាចថ្ងៃទី១១មករាម្សិលមិញនេះ មានអ្នកប្តឹងតវ៉ាទៅគណៈកម្មាធិការជាតិរៀបចំការបោះឆ្នោត គឺមានតែជាង៥រយករណីតែប៉ុណ្ណោះ។ តាមប្រភពដដែល, អ្នកដែលប្តឹងទាំងជាង៥រយនាក់នោះ គឺភាគច្រើនទាក់ទងនឹងរឿងខុសឈ្មោះ និងខុសទិន្នន័យផ្ទាល់ខ្លួន។
ចំណែកបណ្តឹងតវ៉ាពីសំណាក់បក្សប្រឆាំង ត្រូវលោក ហង្ស ពុទ្ធា បញ្ជាក់ថា គ្មានទាន់ឃើញមានពាក្យប្តឹងណាមួយពីតំណាងគណបក្សសង្គ្រោះជាតិនៅឡើយទេ។ លោកថា ការប្តឹងប្តល់នេះ គឺទាល់តែមានភស្តុតាងច្បាស់លាស់។
សូមរម្លឹកដែរថា លោក យឹម សុវណ្ណ អ្នកនាំពាក្យបក្សសង្គ្រោះជាតិ ធ្លាប់បានប្រាប់វិទ្យុបារាំងអន្តរជាតិ RFI នៅថ្ងៃទី៣មករាថា បក្សសង្គ្រោះជាតិ នឹងដាក់ពាក្យប្តឹងទៅ គ.ជ.ប. ចំពោះឈ្មោះជនបរទេស ពី៣ពាន់ទៅ៤ករណី។ ហើយនឹងប្តឹងផ្តល់ថែមទៀត ចំពោះករណីមេឃុំចៅសង្កាត់ ដែលមានភាពអើសរើង មិនព្រមចេញលិខិតបញ្ជាក់ទីលំនៅ ដោយយកលេសផ្សេងៗ។ អ្នកនាំពាក្យបក្សប្រឆាំងថា នឹងប្តឹងដែរ ចំពោះករណីមានកងទាហានទៅចុះឈ្មោះបោះឆ្នោតនៅកន្លែងតែម្តង ព្រមគ្នា ដោយមានការរៀបចំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ