ការដាក់ញត្តិតវ៉ារឿងព្រំដែនបង្ហាញនូវការគោរពចំពោះវិញ្ញាណក្ខន្ធសពលោក ជា ស៊ីម
សហព័ន្ធនិស្សិតបញ្ញវន្តកម្ពុជា លុបចោលគម្រោងដង្ហែញត្តិទាក់ទងទៅនឹងបញ្ហាព្រំដែន ទៅកាន់ស្ថាប័នសំខាន់ៗនៅថ្ងៃទី១៤ឧសភាខាងមុខ ហើយប្តូរមកដាក់ញត្តិដោយស្ងាត់ស្ងៀមនៅថ្ងៃសុក្រនេះវិញ។ ការធ្វើដូច្នេះគឺដោយយល់ថាប្រជាជនខ្មែរទូទាំងប្រទេសរួមទាំងសហព័ន្ធនិស្សិតបញ្ញវន្តកម្ពុជាផងដែរ កំពុងតែចូលរួមមរណទុក្ខសពលោក ជា ស៊ីម។
ចុះផ្សាយនៅថ្ងៃ៖
ស្តាប់ - ០២:៣៩
សហព័ន្ធនិស្សិតបញ្ញវន្តកម្ពុជា ដែលដឹកនាំដោយលោក ម៉ៅ ពិសេស បានដាក់ញត្តិដោយ
ស្ងាត់ៗ ទៅកាន់ស្ថាប័នព្រះបរមរាជវាំង ទីស្តីការគណៈរដ្ឋមន្ត្រី រដ្ឋសភា និងទីស្នាក់ការគណបក្សសង្គ្រោះជាតិរួចរាល់ហើយនៅព្រឹកថ្ងៃទី១២ឧសភានេះ ដើម្បីឲ្យស្ថាប័នទាំងអស់នេះជួយដោះស្រាយឲ្យបានឆាប់រហ័សពីបញ្ហាព្រំដែនរវាងកម្ពុជានិងវៀតណាម នៅចំណុចខេត្តត្បូងឃ្មុំ។
កាលពីថ្ងៃព្រហស្បតិ៍ម្សិលមិញ ក្រុមយុវជនសហព័ន្ធនេះ បានសម្រេចបោះបង់ចោលពីគោលបំណងរបស់ខ្លួន ក្នុងការជួបជុំគ្នានៅទីលានប្រជាធិបតេយ្យ ដើម្បីផ្សព្វផ្សាយរបាយការណ៍និងដង្ហែរញត្តិទៅដាក់នៅតាមស្ថាប័ននានា ដែលគ្រោងធ្វើនៅថ្ងៃទី១៤មិថុនាខាងមុខ។
ការអាក់ខានដង្ហែរញត្តិនេះ ត្រូវបានសហព័ន្ធនិស្សិតបញ្ញវន្តកម្ពុជាអះអាងថា ដោយសារប្រជាពលរដ្ឋខ្មែរទូទាំងប្រទេសកំពុងតែចូលរួមរំលែកមរណៈទុក្ខដល់គ្រួសារសពលោក ជា ស៊ីម ដែលបានទទួលមរណៈភាពកាលពីថ្ងៃទី៨មិថុនាកន្លងទៅនេះ ហើយសហម្ព័ន្ធនិស្សិតបញ្ញវន្តកម្ពុជាក៏ចូលរួមផងដែរ។ ក៏ប៉ុន្តែក្រុមនេះ បញ្ជាក់ថានឹងផ្សព្វផ្សាយរបាយការណ៍និងដាក់ញត្តិ តាមរបៀបស្ងប់ស្ងាត់ជំនួសវិញ។
ដោយឡែកចំពោះញត្តិវិញ ក្នុងនាមក្រុមប្រឹក្សាឃ្លាំមើលកម្ពុជា រួមមានសហព័ន្ធនិស្សិតបញ្ញវន្តកម្ពុជាផងនោះ បានទូលសុំព្រះមហាក្សត្រ ធ្វើព្រះរាជអន្តរាគមន៍ទៅស្ថាប័នពាក់ព័ន្ធករណីជនជាតិវៀតណាមចូលមកបាញ់ថ្នាំបំផ្លិចបំផ្លាញដំណាំរបស់ប្រជាពលរដ្ឋខ្មែរនៅស្រុកមេមត់ខេត្តត្បូងឃ្មុំកាលពីខែមេសាកន្លងទៅ។
រីឯញត្តិចំនួនបីផ្សេងទៀត ដែលផ្ញើរទៅលោក ហេង សំរិន ប្រធានរដ្ឋសភា លោកនាយករដ្ឋមន្ត្រី ហ៊ុន សែន និងប្រធានគណបក្សសង្គ្រោះជាតិលោក សម រង្សី មានខ្លឹមសារដូចៗគ្នាចំនួនបីចំណុចគឺ អន្តរាគមន៍ឲ្យវៀតណាមសងការខូចខាតដំណាំកសិករខ្មែរនិងទប់ស្កាត់ប្រកបដោយប្រសិទ្ធភាព កុំឲ្យវៀតណាមបន្តការឈ្លានពានមកលើអធិបតេយ្យភាពកម្ពុជា។ស្នើសុំដកលោក ហោ ណាំហុង និងលោក វ៉ា គឹមហុង ចេញពីដំណែង និងសុំលុបសន្ធិសញ្ញាបន្ថែមឆ្នាំ២០០៥ និងគោរពតាមកិច្ចព្រមព្រៀងកិច្ចព្រមព្រៀងទីក្រុងប៉ារីសថ្ងៃ២៣តុលាឆ្នាំ១៩៩។
ទោះយ៉ាងនេះក្តីមន្ត្រីរដ្ឋាភិបាលកាលពីថ្ងៃទី២១ឧសភាកន្លងទៅនេះ បានបញ្ជាក់តាមរយៈវេទិការតុមូលមួយថា ការការពារបូរណភាពទឹកដីកម្ពុជា មិនមែនជាសិទ្ធិផ្តាច់មុខរបស់គណបក្សណា ឬបុគ្គលណាទេ។ រដ្ឋាភិបាលកម្ពុជា តាំងពីឆ្នាំ១៩៧៩ ក្រោយផ្តួលរំលំរបបខ្មែរក្រហម តែងតែធ្វើការដោយយកចិត្តទុកដាក់បំផុត ដើម្បីការពារអធិបតេយ្យបូរណភាពទឹកដីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ