លោក សម រង្ស៊ី បាត់បង់ទាំងស្រុងនូវសិទ្ធិ បុព្វសិទ្ធិ និងសមាជិកភាពជាសមាជិករដ្ឋសភា
គណៈកម្មការអចិន្ត្រៃយ៍រដ្ឋសភានៃប្រទេសកម្ពុជានៅព្រឹកថ្ងៃចន្ទនេះ បានបើកកិច្ចប្រជុំបន្ទាន់មួយ ដើម្បីពិភាក្សាលើរបៀបវារៈចាំបាច់ចំនួន៣ ក្នុងនោះការពិនិត្យលើរបាយការណ៍ស្តីពីសំណុំរឿង ពាក់ព័ន្ធទៅនឹងការអនុវត្តទោសទៅលើលោក សម រង្ស៊ី ត្រូវបានចាត់ទុកជារបៀបវារៈសំខាន់។ ការលើករបៀបវារៈលោក សម រង្ស៊ី មកនិយាយនៅគណៈអចិន្ត្រៃយ៍ពេលនេះគឺដើម្បីពិនិត្យមើលពីនីតិវិធីច្បាប់ បន្ទាប់ពីមានសាលដីការបស់តុលាការ លិខិតក្រសួងយុត្តិធម៌ និងយោងបទដ្ឋានច្បាប់មួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
បន្ទាប់ពីចប់កិច្ចប្រជុំគណៈកម្មការអចិន្ត្រៃយ៍ នៅព្រឹកថ្ងៃចន្ទ ទី១៦ ខែវិច្ឆិកានេះ រដ្ឋសភាបានចេញសេចក្តីសម្រេចថាលោកសម រង្ស៊ី ត្រូវបាត់បង់ទាំងស្រុងនូវសិទ្ធិ បុព្វសិទ្ធិ និងសមាជិកភាពជាសមាជិករដ្ឋសភាមណ្ឌលខេត្តកំពង់ចាម នីតិកាលទី៥។ ជាមួយគ្នានេះ លោក ឈាង វុន អ្នកនាំពាក្យរដ្ឋសភា បានពន្យល់ប្រាប់អ្នកកាសែតថា ករណីលោកសម រង្ស៊ី ប្រធានគណបក្សសង្គ្រោះជាតិ ដែលប្រឈមនឹងដីកាចាប់ខ្លួន លោក សម រង្ស៊ី បានអស់សមាជិកភាពរដ្ឋសភាហើយ បន្ទាប់ពីមានសាលដីកាធ្លាក់មក។ យោងតាមរដ្ឋធម្មនុញ្ញមាត្រា៩៥ លោក ឈាង វុន បន្តថាលោកសម រង្ស៊ី បានស្ថិតនៅក្នុងករណីប្រាសចាកសមាជិកភាព ដែលគណបក្សត្រូវរកមនុស្សទៅជំនួសក្នុងរយៈពេល៦ខែមុនការបោះឆ្នោត។
ដោយឡែក លោក អេង ឆៃអ៊ាង ប្រធានគណៈកម្មការទី១រដ្ឋសភាមកពីកូតាគណបក្សសង្គ្រោះជាតិ ដែលបានដើរចេញពីកិច្ចប្រជុំគណៈកម្មការអចិន្ត្រៃយ៍នៅព្រឹកមិញនេះដែរ បានប្រាប់អ្នកកាសែតថាលោកបានស្នើសុំឲ្យគណៈអចិន្ត្រៃយ៍រដ្ឋសភាពិនិត្យ និងផ្អាកដីកាចាប់ខ្លួនលោក សម រង្ស៊ី។ ផ្អាកដោយប្រសិនមេបក្សរបស់លោក គឺលោក សម រង្ស៊ី មានទោសតាមសាលដីកាតុលាការកាលពីឆ្នាំ២០១៣ ហេតុអ្វីបានជាស្ថាប័នជាតិ មានគ.ជ.ប មានរដ្ឋសភា មានព្រះបរមរាជវាំងទៅជួយអ្នកទោសធ្វើជាតំណាងរាស្ត្រពេញសិទ្ធិ ដែលពេលនេះមានអភ័យឯកសិទ្ធិ។
នៅថ្ងៃចន្ទនេះដែរ ក្រសួងមហាផ្ទៃក៏បានបង្កើតគណៈកម្មការមួយដើម្បីអនុវត្តដីកាចាប់ខ្លួន លោក សម រង្ស៊ី ដែលបានប្រកាសថាលោកគ្រោងនឹងត្រឡប់មកដល់កម្ពុជា នៅវេលាម៉ោង ១០នឹង៣០នាទីយប់ ថ្ងៃទី១៦ ខែវិច្ឆិកានេះ តាមជើងយន្តហោះពីទីក្រុងសេអ៊ូល ប្រទេសកូរ៉េខាងត្បូង មកភ្នំពេញ។
នៅក្នុងសេចក្តីសម្រេច ដែលមានចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ
បានរៀបរាប់ពីសមាសភាពគណៈកម្មការចំនួន៨រូប ដឹកនាំដោយនាយឧត្តមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ។ គណៈកម្មការនេះត្រូវបានបែងចែកជា២គោលដៅ គឺនៅព្រលានយន្តហោះអន្តរជាតិភ្នំពេញ និងព្រលានយន្តហោះអន្តរជាតិសៀមរាប ដោយមានភារកិច្ច ប្រមែប្រមូលព័ត៌មាន និងសភាពការណ៍ចលាចលផ្សេងៗ ការពារសន្តិសុខ សុវត្ថិភាពទណ្ឌិត ពេលបញ្ជូនខ្លួនទៅកាន់មន្ទីរឃុំឃាំងនិងបង្កាទប់ស្កាត់បាតុភាពនានា ដែលបង្កការរំខានដល់ការអនុវត្តដីកា។
សូមរំលឹកថា លោក សម រង្ស៊ី ត្រូវបានតុលាការក្រុងភ្នំពេញ ចេញដីកាចាប់ខ្លួនកាលពីថ្ងៃទី១៣វិច្ឆិកា ពាក់ព័ន្ធនឹងសំណុំរឿងជាមួយលោកហោ ណាំហុង រដ្ឋមន្ត្រីការបរទេសកាលពីឆ្នាំ២០០៨ ដោយលោក សម រង្ស៊ី បានលើកឡើងថាលោក ហោ ណាំហុង ជាអតីតប្រធានគុកបឹងត្របែក នៅសម័យខ្មែរក្រហម។ សំណុំរឿងក្តីនេះ តុលាការបានសម្រេចផ្តន្ទាទោស ដាក់ពន្ធនាគារលោក សម រង្ស៊ី រយៈពេល ២ឆ្នាំ និងពិន័យជាប្រាក់៨លានរៀល ក្រោមបទចោទ «បរិហាកេរ្តិ៍ និងញុះញង់ឲ្យមានការស្អប់ខ្ពើមជាតិសាសន៍»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ