សព្វថ្ងៃនេះ ការអនុវត្តសិទ្ធិបញ្ចេញមតិរបស់ពលរដ្ឋខ្មែរនៅលើបណ្ដាញសង្គម ដោយចំពោះរឿងនយោបាយតែម្ដង គឺមានភាពរស់រវើកជាងពេលណាៗទាំងអស់។ ការបញ្ចេញមតិពេលខ្លះ បានឡើងកម្ដៅយ៉ាងខ្លាំង រហូតធ្វើឲ្យកើតជាសង្គ្រាមក្ដារចុចរវាងអ្នកប្រើប្រាស់បណ្ដាញសង្គមថែមទៀតផង។ តើសង្គ្រាមក្ដារចុចដែលកើតមានរវាងពលរដ្ឋខ្មែរសព្វថ្ងៃនេះ ឆ្លុះបញ្ចាំងឲ្យឃើញពីអ្វី?
នៅកម្ពុជា ប្រជាជននិយមប្រើប្រាស់បណ្ដាញសង្គមហ្វេសប៊ុកណាស់ ព្រោះហ្វេសប៊ុក មានលក្ខណៈសេរី និងទូលំទូលាយ។ វាបានក្លាយជាឧបករណ៍ដ៏សំខាន់ ដែលត្រូវប្រជាពលរដ្ឋកម្ពុជា ប្រើប្រាស់ដើម្បីអនុវត្តសេរីភាពបញ្ចេញមតិរបស់ពួកគេ។ ជនជាតិខ្មែរដែលប្រើប្រាស់បណ្ដាញសង្គមហ្វេសប៊ុកសព្វថ្ងៃនេះ មានភាពក្លាហាន ក្នុងការបង្ហាញពីការយល់ឃើញ ក៏ដូចជានិន្នាការនយោបាយរបស់ខ្លួនយ៉ាងបើកចំហ។ គំនិតគាំទ្រ ឬរិះគន់គណបក្សណាមួយ ត្រូវបានបញ្ចេញមកក្រៅដោយឥតលាក់លាម តាមរយៈក្ដារចុចកុំព្យូទ័រឬទូរសព្ទ។
ជាការពិត នេះមិនមែនជារឿងប្លែកទេនៅក្នុងសង្គមដែលប្រកាន់យករបបប្រជាធិបតេយ្យសេរីពហុបក្សដូចកម្ពុជា។ អ្វីដែលប្លែកនោះ គឺការប្រកាន់ជំហជ្រុលនិយមរៀងៗខ្លួន របស់ក្រុមអ្នកគាំទ្រគណបក្សនយោបាយ។ ជារឿយៗ អ្នកគាំទ្រគណបក្សកាន់អំណាចនិងគណបក្សប្រឆាំងមួយចំនួនធំ បានជ្រើសយកទស្សនៈប្រកាន់តឹងមកដាក់ក្នុងខ្លួន។ ទស្សនៈដែលយល់ថា អ្វីៗដែលជារបស់ខ្លួន ឬអ្វីៗដែលខ្លួនស្រឡាញ់ពេញចិត្ត គឺសុទ្ធតែត្រូវល្អឥតខ្ចោះ។ ហើយទង្វើ ឬកម្មសិទ្ធិគ្រប់យ៉ាងរបស់គូសត្រូវខ្លួន គឺសុទ្ធតែអាក្រក់រកលេខដាក់គ្មាន។
នៅពេលដែលអ្នកនយោបាយកម្ពុជារក្សាភាពស្ងប់ស្ងាត់ និងនៅពេលដែលគ្មានបាតុកម្មប្រឆាំងបែបចេញមុខ អ្នកគាំទ្រនយោបាយបានប្រើប្រាស់បណ្ដាញសង្គម ដើម្បីបង្ហាញពីទស្សនៈប្រកាន់តឹងរបស់ខ្លួន។ ការប្រកាន់តឹងទាំងអស់ទាំងនេះ អាចបង្កើតសង្គ្រាមក្ដារចុចបានគ្រប់ពេលទាំងអស់ តាមរយៈការរិះគន់ឈ្នានីស។ ហើយការរិះគន់នេះទៀតសោត មិនមែនធ្វើឡើងចំពោះរឿងនយោបាយតែមួយមុខនោះទេ ប៉ុន្តែចំពោះគ្រប់វិស័យទាំងអស់។
តើសង្គ្រាមក្ដារចុចដែលកើតមានរវាងពលរដ្ឋខ្មែរសព្វថ្ងៃនេះ កើតឡើងដោយសារអ្វី? តើវាកើតឡើងដោយសារតែបណ្ដាញសង្គមហ្វេសប៊ុក ដែលធ្វើឲ្យពលរដ្ឋមានឱកាសបញ្ចេញមតិដោយសេរីឬក៏យ៉ាងណា? ឬមែនទែនទៅ គឺសង្គមខ្មែរខ្លួនឯងទេ ដែលប្រេះឆារួចរាល់ទៅហើយ?
មែនទែនទៅ ភាពប្រេះឆានៅក្នុងសង្គមខ្មែរ មានតាំងពីយូរមកហើយ ហើយវាបានបង្ហាញយ៉ាងច្បាស់ នៅក្រោយការបោះឆ្នោតខែកក្កដា ឆ្នាំ២០១៣។ ហ្វេសប៊ុក គ្រាន់តែដើរតួជាសង្វៀនប្រដាល់សាធារណៈ ដែលអនុញ្ញាតឲ្យភាគីទំនាស់ ឡើងមកប្រកួតគ្នាដោយសេរី តាមថ្វីដៃចុចក្ដារចុចតែប៉ុណ្ណោះ។ ចំណែកលទ្ធផលឈ្នះចាញ់យ៉ាងណា វាអាស្រ័យលើបំណិនប្រសព្វនៃសំណេររិះគន់លាបពណ៌របស់ភាគីម្ខាងៗ។
ការរិះគន់ ដូចដែលបានលើកឡើងពីខាងដើមអ៊ីចឹង ថាជារឿងធម្មតានៅក្នុងសង្គមដែលប្រកាន់យកលទ្ធិប្រជាធិបតេយ្យ។ ប៉ុន្តែការរិះគន់ដែលមានប្រយោជន៍ និងមានតម្លៃ គឺត្រូវតែជាការរិះគន់ស្ថាបនា ដែលផ្អែកលើការសិក្សាគ្រប់ជ្រុងជ្រោយ និងមានបង្ហាញពីដំណោះស្រាយដ៏សមស្រប។ ចំណែកអ្នកដែលរងការរិះគន់ទៀតសោត ក៏ត្រូវទទួលយកគំនិតរិះគន់ស្ថាបនានោះ ទៅពិចារណា ដើម្បីកែលម្អចំណុចខ្វះខាតរបស់ខ្លួនផងដែរ។ គួរឲ្យសោកស្ដាយ ដែលពលរដ្ឋខ្មែរភាគច្រើន នៅមិនទាន់មានទំលាប់ដ៏ល្អទាំងនេះនៅឡើយ។
ខណៈដែលសង្គមខ្មែរនៅក្រោមសម្ពាធភាពជ្រុលនិយម សង្គ្រាមនៅលើហ្វេសប៊ុកបានក្លាយទៅជាមធ្យោបាយដែលធ្វើឲ្យសង្គមនេះ រហែកចេញពីគ្នាកាន់តែលឿនរហ័ស។ គ្មានពលរដ្ឋខ្មែរណា ដែលចង់ឃើញប្រទេសរបស់ខ្លួនបែកបាក់នោះទេ។ ហេតុដូច្នេះ មិនថានៅតាមបណ្ដាញសង្គម ឬនៅក្នុងជំនួបផ្ទាល់ទេ ប្រជាពលរដ្ឋខ្មែរគ្រប់រូប គួរតែប្រកាន់យកវប្បធម៌សន្ទនាគ្នាដោយក្ដីគោរព។ ការរិះគន់ឈ្នានីស និងការលាបពណ៌គួរតែបញ្ចប់ ជំនួសមកវិញនូវការរិះគន់ស្ថាបនា ប្រកបដោយការទទួលខុសត្រូវ ទើបជាការប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ