អនុប្រធានគណបក្សប្រឆាំង ណែនាំឲ្យយុវជនប្រុងប្រយ័ត្នក្នុងការប្រើប្រាស់ហ្វេសប៊ុក
បន្ទាប់ពីត្រឡប់មកពីបរទេសវិញ លោក កឹម សុខា អនុប្រធានគណបក្សសង្គ្រោះជាតិ បានចាប់ផ្តើមកម្មវិធីជួបយុវជនមុនគេ ដោយលោកលើកឡើងសូមឲ្យយុវជនមានការប្រុងប្រយ័ត្ន ជាមួយអ្វីដែលពួកគេបង្ហោះតាមហ្វេសប៊ុក។ ការលើកឡើងដូច្នេះ ត្រូវបានធ្វើឡើងបន្ទាប់ពីអនុប្រធានគណបក្សប្រឆាំងរូបនេះជួបជាមួយនឹងមេដឹកនាំយុវជនគណបក្សសង្គ្រោះជាតិកាលពីរសៀលម្សិលមិញ ទាំង២៥ខេត្ត-រាជធានី។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងជំនួបជាមួយយុវជនដែលស្មោះស្ម័គ្រនឹងគណបក្សប្រឆាំងនៅប្រទេសកម្ពុជា លោក
កឹម សុខា បានបង្ហាញពីសារៈសំខាន់នៃប្រព័ន្ធហ្វេសប៊ុក ក្នុងការជួយផ្សព្វផ្សាយ ក៏ប៉ុន្តែលោក បញ្ជាក់នៅមុខយុវជនដែលជាសកម្មជនសង្គ្រោះជាតិថា «ខ្ញុំសូមអំពាវនាវឲ្យអ្នកគ្រប់គ្នា ប្រុងប្រយ័ត្នជាមួយការប្រើប្រាស់ហ្វេសប៊ុក ហើយកុំឲ្យធ្លាក់ក្នុងអន្ទាក់របស់ពួកគេ និងកុំប្រើពាក្យអសុរស»។
ជាទូទៅការណែនាំរបស់លោក កឹម សុខា ត្រូវបានយុវជនភាគច្រើននៃបក្សប្រឆាំងនេះពិចារណានិងអនុវត្តតាម។ នេះបើតាមលោក កែវ សាមឺឌី យុវជនមួយរូបនៃគណបក្សសង្គ្រោះជាតិ។
លោក សាមឺឌី យល់ថាព្រឹត្តិការណ៍ផ្សេងៗតាមហ្វេសប៊ុក គឺអ្នកនយោបាយជាអ្នកបង្កើតឡើង ថ្វីត្បិតតែការរិះគន់ជាសិទ្ធិសេរីភាពធម្មតាមែនពិត ក៏ប៉ុន្តែបើរិះគន់ចំចំណុចរសើបខ្លាំង ឬចំស្ថាប័ន ដែលមានការហាមប្រាម ដូចជាព្រះមហាក្សត្រជាដើមនោះ គឺអាចមានផលឆ្លើយតបវិញមិនល្អ និងជាការជាប់អន្ទាក់។ លោកថា យុវជនបក្សប្រឆាំងចាប់ផ្តើមយល់ពីការណែនាំនេះ។ ករណីលោក ហុង សុខហួរ សមាជិកព្រឹទ្ធសភាគណបក្សសម រង្ស៊ី ដែលកំពុងជាប់ក្នុងមន្ទីរឃុំឃាំងនៅឡើយ ដោយសារតែលោក បានបង្ហោះសន្ធិសញ្ញាក្លែងក្លាយពីបញ្ហាព្រំដែន គឺជាឧទាហរណ៍មួយ ដែលយុវជន យកមកពិចារណា និងគួរមានឥរិយាបទប្រុងប្រយ័ត្ន។
ជាការកត់សម្គាល់ចាប់តាំងពីមានការបោះឆ្នោត ឆ្នាំ២០១៣ មក យុវជនគណបក្សសង្គ្រោះជាតិ បានបង្ហាញពីឥទ្ធិពលរបស់ខ្លួនគ្របដណ្តប់លើប្រជាប្រិយភាពតាមប្រព័ន្ធហ្វេសប៊ុក បានយ៉ាងក្រាសក្រែល។ ជាមួយនឹងប្រសិទ្ធភាពនៃបច្ចេកវិជ្ជាបណ្តាញទំនាក់ទំនងសង្គមនេះ ធ្វើឲ្យអ្នកនយោបាយមិនថាយុវជន ឬមនុស្សចាស់ទេចាប់យកវា ហើយលើកតម្កើងថាជាផលប្រយោជន៍នយោបាយដ៏សំខាន់។ សំខាន់រហូតដល់មេដឹកនាំគណបក្សមានអាសនៈទាំងពីរ ប្រើប្រាស់ជាមធ្យោបាយឆ្លើយឆ្លងគ្នា និងផ្ញើសារទៅម្ចាស់ឆ្នោតដោយមិនចាំបាច់ចុះទៅដល់ទីកន្លែង ដែលធ្វើឲ្យខាតសាំងដឹកជញ្ជូននិងខាតពេលវេលា។
ជាមួយគ្នានេះ មេបក្សប្រឆាំងស្តីទីលោក កឹម សុខា បានទទូចផងដែរ ដល់ថ្នាក់ដឹកនាំកណ្តាលរបស់គណបក្សត្រូវធ្វើកម្មវិធី ចុះទៅស្តាប់សំដីយុវជន ដែលលើកឡើងពីបញ្ហាផ្សេង ដោយលោកចាត់ទុកថាការដែលស្តាប់យុវជននិយាយសំខាន់ណាស់សម្រាប់ថ្នាក់ដឹកនាំពោល គឺស្តាប់ទាំងការសម្តែងមតិ និងស្តាប់ទាំងយុវជនស្តីឲ្យផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ