ហ្វេសប៊ុកជាទីលានប្រកួតប្រជែងរបស់អ្នកនយោបាយដែលពលរដ្ឋមិនត្រូវការ
ចុះផ្សាយនៅថ្ងៃ៖
ស្តាប់ - ០៤:៥៣
នៅក្នុងយុគសម័យឌីជីថលនេះ អ្នកនយោបាយខ្មែរចាប់ផ្តើមប្រើប្រាស់ប្រព័ន្ធទំនាក់ទំនងសង្គម ដែលមានហ្វេសប៊ុកជាដើម ដើម្បីបង្ហាញពីគោលនយោបាយ សកម្មភាពផ្សេងៗរបស់បក្ស និងរបស់មន្ត្រីបក្ស ក្នុងបំណងទាក់ទាញការចាប់អារម្មណ៍របស់ម្ចាស់ឆ្នោត។ នៅលើទំព័រហ្វេសប៊ុករបស់ខ្លួន អ្នកនយោបាយបក្សកាន់អំណាច បានបង្ហាញនូវការអភិវឌ្ឍ សន្តិភាព ការជួបជុំដ៏សប្បាយរីករាយ។ ឯទំព័រហ្វេសប៊ុករបស់អ្នកនយោបាយប្រឆាំង បានបង្ហាញពីការរំលោភសិទ្ធិមនុស្ស ការជិះជាន់ ការបណ្តេញចេញដោយខុសច្បាប់ ការរិះគន់ ជាដើម។ ទោះជាមាននិន្នាការផ្ទុយគ្នាយ៉ាងដូច្នេះក៏ដោយ ក៏ការចុចចូលចិត្ត (Like) របស់អ្នកគាំទ្រអ្នកនយោបាយនិមួយៗ មានចំនួនច្រើនសន្ធឹកសន្ធាប់។ ជាមួយគ្នានេះដែរ អ្នកនយោបាយខ្មែរបានចាប់ផ្តើមប្រកួតប្រជែងគ្នា ដើម្បីឲ្យបានការចុចចូលចិត្ត (Like) ច្រើនជាងគ្នា។ ប៉ុន្តែតាមពិតទៅ ប្រជាពលរដ្ឋខ្មែរ ដែលភាគច្រើនជាកសិករយល់ឃើញថា ហ្វេសប៊ុក មិនមែនជាទីលានប្រកួតប្រជែងដែលពលរដ្ឋត្រូវការនោះទេ។
នៅចុងខែមករា ឆ្នាំ ២០១៦នេះ ចំនួនអ្នកចុចចូលចិត្តនៅលើទំព័រហ្វេសប៊ុករបស់លោក នាយករដ្ឋមន្ត្រី ហ៊ុន សែន បានកើនឡើងរហូតដល់ជាង ២លាន ច្រើនជាងចំនួនអ្នកចុចចូលចិត្ត នៅលើទំព័រហ្វេសប៊ុករបស់លោក សម រង្ស៊ី ដែលបង្កើតតាំងពីឆ្នាំ២០១៣មកម៉្លេះ។ ចំនួននេះ បានកើនឡើងជាគំហុក ត្រឹមរយៈពេលតែ៥ខែតែប៉ុណ្ណោះ បន្ទាប់ពីលោកនាយករដ្ឋមន្ត្រីប្រកាសថាមានទំព័រហ្វេសប៊ុកផ្លូវការ។
នេះគឺ ជាការប្រកួតប្រជែង ដែលទទួលបានជោគជ័យ និង សប្បាយរីករាយ ហើយដែលអ្នកគាំទ្រផងទាំងឡាយ សម្តែងការអបអរសាទរ។ ជ័យជម្នះនេះ បានធ្វើឲ្យមេបក្សប្រឆាំង បាត់បង់ឈ្មោះជានាយករដ្ឋមន្ត្រីហ្វេសប៊ុក ដែលគេប្រសិទ្ធិនាមឲ្យ កាលពីប៉ុន្មានឆ្នាំមុន។
ទាក់ទងនឹងការកើនឡើងចំនួនអ្នកចុចចូលចិត្តជាគំហុក នេះ ក្រុមអ្នកវិភាគមើលឃើញថា គឺដោយសារ លោកនាយករដ្ឋមន្ត្រី បានប្រើប្រាស់ហ្វេសប៊ុកជាស្ពានភ្ជាប់ទំនាក់ទំនង ជាមួយម្ចាស់ឆ្នោត និងប្រើប្រាស់ហ្វេសប៊ុកជាវេទិកាសំណូមពរ និង ដោះស្រាយបញ្ហាដែលប្រជាពលរដ្ឋកំពុងប្រឈមភ្លាមៗ។ ម្យ៉ាងវិញទៀត ការកើនឡើងនេះ ក៏ដោយសារអ្នកគាំទ្រ និង មន្ត្រីគណបក្សប្រជាជនភាគច្រើនងាកមកប្រើប្រាស់ប្រព័ន្ធបច្ចេកវិទ្យាទំនើបនេះ ហើយចុចចូលចិត្តមេបក្សរបស់ខ្លួន។
ប្រសិនបើគេមើលមួយភ្លែត ការប្រកួតប្រជែងដណ្តើមប្រជាប្រិយភាពតាមហ្វេសប៊ុកគឺជារឿងសប្បាយរីក រាយ និង ជារឿងល្អជាងការប្រកួតប្រជែងតាមបែបហឹង្សា។ ប៉ុន្តែតាមពិតទៅ ការចាញ់ឈ្នះនៅលើហ្វេស ប៊ុក មិនអាចឆ្លុះបញ្ចាំងពីឆន្ទះពិតប្រាកដនៃការបោះឆ្នោតនោះទេ ពីព្រោះក្នុងចំណោមអ្នកដែលចុចចូលចិត្តអ្នកនយោបាយទាំងពីរ អ្នកខ្លះជាអ្នកចូលចិត្តពិតប្រាកដ ឯអ្នកខ្លះទៀតជាអ្នកដែលចង់ដឹងត្រឹមតែ ព័ត៌មានតែប៉ុណ្ណោះ។
គេមិនអាចទុកចិត្តអ្នកចុចចូលចិត្តនៅលើទំព័រហ្វេសប៊ុកបានទេ ពីព្រោះអ្នកទាំងនោះ ពេលខ្លះមិនខុសពី អ្នកដែលមកទទួលអំណោយពីអ្នកនយោបាយ ហើយនាំគ្នាទៅជួយហែរក្បួនឃោសនាបោះឆ្នោតនោះទេ។ នៅទីបំផុតទៅ អ្នកទាំងនោះ បែរជាទៅបោះឆ្នោតឲ្យបក្សផ្សេងទៅវិញ។ នេះជាឧទាហរណ៍ជាក់ស្តែងមួយ ដែលកើតមានឡើងនៅក្នុងការបោះឆ្នោតកាលពីឆ្នាំ ២០១៣កន្លងមក។
តើអ្នកនយោបាយខ្មែរត្រូវធ្វើយ៉ាងដូចម្តេច ដើម្បីឲ្យខ្លួនទទួលបានការចូលចិត្តពិតប្រាកដ?
អ្នកនយោបាយខ្មែរគប្បីយល់ថា ប្រជាពលរដ្ឋខ្មែរដែលភាគច្រើនជាកសិករ មិនចូលចិត្តអ្នកនយោបាយដែលប្រកួតប្រជែងគ្នាដើម្បីតែប្រជាប្រិយភាពនៅលើហ្វេសប៊ុកនោះទេ។ ពួកគេចង់ឃើញអ្នកនយោបាយខ្មែរ ប្រកួតប្រជែងគ្នាធ្វើយ៉ាងដូចម្តេចដើម្បីឲ្យស្រែរបស់ពួកគេមានទឹកស្រោចស្រព ខួបប្រាំងខួបវស្សា និងលែងពឹងពាក់លើមេឃតទៅទៀត។
ឯ កសិផលរបស់ពួកគេមានទីផ្សារ និង លក់បានតម្លៃដែលអាចឲ្យពួកគេចិញ្ចឹមជីវិតបាន។ ជាមួយគ្នា នេះដែរ ពួកគេចង់រស់នៅក្នុងភូមិដ្ឋានមួយដែលប្រកបដោយសន្តិសុខ មិនមានការលេងល្បែងស៊ីសង មិនមានអំពើ លួច ឆក់ ប្លន់បាញ់ សម្លាប់ ជាដើម។
ក្រៅពីនេះប្រជាពលរដ្ឋខ្មែរ ចង់ឃើញអ្នកនយោយបាយខ្មែរ ក៏សាងប្រជាប្រិយភាព តាមរយៈការរួមគ្នាដោះស្រាយបញ្ហាសង្គមដែលកើតមានឡើងច្រើនឆ្នាំមកហើយ។ បញ្ហាសង្គមទាំងនោះ រួមមានការកែសម្រួល សេវាសាធារណៈរបស់រដ្ឋ ពិសេសវិស័យអប់រំ វិស័យសុខាភិបាលដែលកំពុងតែប្រឈមនឹងការរិះគន់ សុវត្ថិភាពចំណីអាហារដែលកំពុងរងការគំរាមកំហែង ជម្លោះដីធ្លីដ៏រ៉ាំរ៉ៃ ការបំផ្លាញធនធានធម្មជាតិ ការធ្វើចំណាកស្រុកដែលខុសច្បាប់ ភាពអត់ការងារធ្វើ ការបញ្ចុះតម្លៃប្រេងសាំង តម្លៃភ្លើងអគ្គិសនី ការលប់បំបាត់អំពើពុករលួយ បញ្ហាអយុត្តិធម៌សង្គម ផ្សេងៗទៀតជាដើម។
ពលរដ្ឋខ្មែរ ចង់ឃើញដែរ អ្នកនយោបាយ ខ្មែរស្វែងយល់ពីគ្នាទៅវិញទៅមក នឹងលើកយកបញ្ហាមកដាក់លើតុជជែកគ្នា ដោះស្រាយបញ្ហារួមគ្នា និង រៀនធ្វើការជាមួយគ្នាដែរ ដើម្បីសេចក្តីសុខរបស់ប្រជាពលរដ្ឋ និង ផលប្រយោជន៍សម្រាប់សង្គមជាតិទាំងមូល។ ហើយការធ្វើដើម្បីផលប្រយោជន៍សង្គមនេះទៀត សោត មិនមែនធ្វើឡើងតែមួយរយៈពេលជិតបោះឆ្នោតនោះទេ។ អ្នកនយោបាយ ត្រូវរួមគ្នាបម្រើរាស្ត្រជា រៀងរហូត។មកដល់ដំណាក់កាលនេះ ប្រជាពលរដ្ឋខ្មែរ លែងចាញ់បោកអ្នកនយោបាយទៀតហើយ ។
ដូច្នេះដើម្បីឲ្យប្រជាប្រិយភាពរបស់ខ្លួន កើនឡើងទាំងនៅលើទំព័រហ្វេសប៊ុក ទាំងនៅក្នុងចំណោម ប្រជាពលរដ្ឋ អ្នកនយោបាយខ្មែរ គប្បីគិតគូដល់តម្រូវការជាក់ស្តែង និង មានលក្ខណៈយូរអង្វែងរបស់ប្រជាពលរដ្ឋ។ ប្រជាប្រិយភាពរបស់អ្នកនយោបាយ អាចនឹងកើនឡើងឬធ្លាក់ចុះ គង់វង្សស្ថិតស្ថេរឬសាបរលាបទៅ គឺមិនអាស្រ័យលើសកម្មភាពក្នុងទំព័រ ហ្វេសប៊ុកនោះទេ គឺអាស្រ័យលើសកម្មភាពរបស់អ្នកនយោបាយជាមួយនឹងរាស្ត្រ។
ប្រសិនបើអាចអនុវត្តបានល្អយ៉ាងដូច្នេះមែន នោះចំនួនចូលចិត្តនៅលើទំព័រហ្វេសប៊ុក នឹងប្រែកាយក្លាយជាចំនួនសន្លឹកឆ្នោតគាំទ្រយ៉ាងសក្តិសិទ្ធិ។ ប៉ុន្តែបើពុំដូច្នោះទេ ប្រជាពលរដ្ឋខ្មែរនឹងបោះឆ្នោតឲ្យអ្នកនយោបាយតាមហ្វេសប៊ុកតែប៉ុណ្ណោះ។ ឯសន្លឹកឆ្នោតគាំទ្រពិតប្រាកដ ពួកគេនឹងបោះឲ្យអ្នកនយោបាយណា ដែលពួកគេគិតថាអាចដោះស្រាយបញ្ហារបស់ពួកគេ និង ផ្តល់សេចក្តីសុខឲ្យពួកគេបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ