ហេតុអ្វីបានជាអឺរ៉ុបប្រើកូនដង្កាប់គាបតួកគីដែលកាន់តែផ្តាច់ការ ?!
ចុះផ្សាយនៅថ្ងៃ៖
រដ្ឋប្រហារមិនសម្រេចនៅតួកគី កាលពីថ្ងៃទី ១៥កក្កដា បានប្រែក្លាយទៅការឆាកឈុតនៃការបោសសម្អាត កម្ចាត់បណ្តេញចេញពីតួនាទី មន្ត្រីយោធា ប៉ូលិស និងស៊ីវិល តាមគ្រប់ក្រសួង ជាទ្រង់ទ្រាយធំ។ ក្តីព្រួយបារម្ភទាក់ទងនឹងអនាគតប្រទេស និងទំនាក់ទំនងជាមួយបរទេស រីកធំធាត់កាន់ខ្លាំង ជាពិសេសសម្រាប់អឺរ៉ុប។ សហរដ្ឋអាមេរិក សហភាពអឺរ៉ុប និងអូតង់ បានព្រមានតួកគីអំពីសកម្មភាពបង្ក្រាបមិនរើសមុខ និងជំរុញឱ្យអង់ការ៉ាគោរពច្បាប់។ តែភាសាព្រមាន ហាក់ដូចជាមិនសូវ ខ្លាំង និងមិនសូវមានទម្ងន់លើតួកគីសោះ។ ហេតុអ្វី ?
ប្រធានាធិបតីតួកគីគ្មានប្រណីនរណាម្នាក់ទេ ! ក្រោយរដ្ឋប្រហារមិនសម្រេច លោក អែរដូហ្កាន បានវាយបកវិញយ៉ាងខ្លាំងនិងយ៉ាងទាន់ហន់។ មន្ត្រីក្នុងក្រសួងមហាផ្ទៃ ភាគច្រើនជាប៉ូលិស និងកងអាវុធហត្ថ ជិត៩ពាន់នាក់ត្រូវដកចេញពីតំណែង ជនសង្ស័យជិត៨ពាន់នាក់ត្រូវឃាត់ខ្លួន ក្នុងនោះជាង៦ពាន់នាក់ជាទាហាន ជាង៧រយនាក់ជាចៅក្រមឬរដ្ឋអាជ្ញា អភិបាលក្រុង ឃុំសង្កាត់ ៣០នាក់ត្រូវបាត់តួនាទី... គឺជាការបោសសម្អាត កម្ទេចមីក្រុមជាតិ ទាំងហ្វូងៗមិនធ្លាប់មានឡើយ។
លើកឆាកអន្តរជាតិវិញ ភាពធូរស្បើយក្នុងចិត្តនៅពេលឃើញរដ្ឋប្រហារបរាជ័យ បានក្លាយទៅការព្រួយបារម្ភ។ រដ្ឋប្រហារមិនសម្រេច ប្រធានាធិបតីមិនធ្លាក់ពីអំណាច តែប្រើអំណាចកាន់តែខ្លាំង និងកាន់ផ្តាច់ការឡើងៗទៅវិញ។ បស្ចឹមលោកព្រួយបារម្ភកាន់តែខ្លាំង និងអំពាវនាវ បែបសំឡុតផង ឱ្យតួកគីគោរពច្បាប់ គោរពសិទ្ធិ និងកុំត្រលប់ទៅអនុវត្តទោសប្រហារជីវិត ដែលអឺរ៉ុបជាពិសេសអាល្លឺម៉ង់ប្រឆាំងដាច់ខាត។
ប៉ុន្តែដោយជាក់ស្តែងទៅ ទាំងអាមេរិក ទាំងអឺរ៉ុប គ្មាននរណាម្នាក់អាចសំឡុត និងចាប់តួកគី បញ្ជូលក្នុងបញ្ជីខ្មៅបានឡើយ ក្នុងស្ថានភាពបច្ចុប្បន្ននេះ។ តួកគីអាចត្រូវការដៃគូអន្តរជាតិមែន តែគឺអន្តរជាតិទេត្រូវការជាចាំបាច់តួកគី ! ប្រធានាធិបតីតួកគី បានដឹងនិងយល់យ៉ាងច្បាស់។
ហេតុអ្វី ? តួកគី គឺជាសម្ព័ន្ធមិត្តយុទ្ធសាស្ត្រក្នុងការប្រយុទ្ធប្រឆាំងនឹងភេរវនិយម។ ក្នុងក្របខ័ណ្ឌសង្គ្រាមប្រឆាំងភេរវកម្ម តួកគីជាមូលដ្ឋានរបស់ក្រុមបស្ចឹមលោក។ តួកគីដើរតួនាទី កាន់តែសកម្មឡើងៗប្រឆាំងនឹងភេរវកម្ម ដោយពីដំបូងឡើយពួកអង្គការរដ្ឋអ៊ីស្លាមប្រើព្រំព្រទល់តួកគីសម្រាប់ចម្លងមនុស្សនិងសម្ភារៈមកបង្កភេរវកម្មផ្សេង ផ្តើមដោយប្រទេសតួកគីខ្លួនឯងនេះតែម្តង។
ទីតាំងភូមិសាស្ត្រប្រទេសតួកគីស្ថិតនៅចន្លោះរវាងអឺរ៉ុបនិងដើមបូព៌ា។ ដូច្នេះជាទីតាំងយុទ្ធសាស្ត្រសម្រាប់ប្រទេសលោកខាងលិច អាមេរិក អូតង់ អឺរ៉ុប ប្រើជាមូលដ្ឋានយោធាជើងអាកាស សម្រាប់បង្ហោះយន្តហោះចេញធ្វើប្រតិបត្តិកម្ទេចពួកអង្គការរដ្ឋអ៊ីស្លាមនៅស៊ីរីឬអ៊ីរ៉ាក់។ ក្នុងរយៈពេលមានរដ្ឋប្រហារ កងកម្លាំងសម្ព័ន្ធមិត្តមិនអាចចេញធ្វើសកម្មភាពបានឡើយ។
ទីពីរ តួកគីជាស្ពានវប្បធម៌ ភូមិសាស្រ្តភ្ជាប់ទៅតំបន់ដើមបូព៌ា ឬជាតំបន់ទ្រនាប់។ ក្នុងវិបត្តិជនភៀសខ្លួន តួកគីចង់តាំងខ្លួនជាអ្នកការពារព្រំដែនឱ្យអឺរ៉ុប និងកំពុងក្លាយជាអ្នកមានអំណាចខ្លាំងក្នុងរឿងនេះ។ តើនរណាហ៊ានរអ៊ូរទាំអ្វី បើតួកគីមានជនភៀសខ្លួនក្នុងប្រទេសដល់ទៅជាងបីលាននាក់ឯណោះ។ កាលពីខែមិនា អឺរ៉ុបបានចុះកិច្ចព្រមព្រៀងជាមួយតួកគី ឱ្យជួបទប់ជនភៀសខ្លួនជាថ្នូរនឹងជំនួយហិរញ្ញវត្ថុ៣ពាន់លានអឺរ៉ូក្នុងមួយឆ្នាំៗ និងការផ្តល់ទិដ្ឋាការដល់ពលរដ្ឋតួកគីចូលអឺរ៉ុប។
ចំណុចចុងក្រោយមិនទាន់អនុវត្តបានទេ ព្រោះជាផ្លូវការតួកគីមិនទាន់មានច្បាប់ប្រឆាំងភេរវកម្មស្របនឹងច្បាប់អឺរ៉ុប។
កន្លងមក ដើម្បីតម្រង់ទិសឱ្យតួកគីដើរត្រង់ផ្លូវ អឺរ៉ុបតែងយកការសុំចូលជាសមាជិកសហភាពមកធ្វើជានុយ។ ប៉ុន្តែពេលនេះ មានមនុស្សតិចតួចណាស់ដែលនៅជឿលើលទ្ធភាពតួកគីក្លាយជាសមាជិកអឺរ៉ុប។
តួកគីបានដាក់ពាក្យសុំចូលអឺរ៉ុបនៅឆ្នាំ១៩៨៧។ តែរហូតទល់ឆ្នាំ១៩៩៩ទើបអឺរ៉ុបព្រមទទួលស្គាល់ថាមានបេក្ខភាពថ្មី តែការចរចាមានដំណើរដូចអូសឬស្សីបញ្ច្រាសចុង។ ប្រទេសនៅអឺរ៉ុបខាងកើតនិងកណ្តាលផ្សេងទៀតសុំចូលក្រោយផង ក៏បានក្លាយជាសម្រេចបំណងមុនតួកគីទៀត។ អឺរ៉ុបបានបើកទម្លាយព្រំដែន បង្កើនសមាជិក ពី១៥ទៅ២៧ ឆ្ពោះទៅទិសខាងកើត ក្រោមក្រសែភ្នែកហួសចិត្តរបស់តួកគី។
ក្នុងបរិបទនៃវិបត្តិអន្តោប្រវេសន៍ និងភេរវកម្ម ដែលបានរុញច្រានឱ្យអង់គ្លេសដល់ថ្នាក់បោះឆ្នោតដើរចេញពីអឺរ៉ុប អឺរ៉ុបពិតជាគ្មានថ្ងៃបើកទ្វារឱ្យពលរដ្ឋតួកគី៧៧លាននាក់ ធ្វើដំណើរដោយសេរីក្នុងអឺរ៉ុបបានណាស់។ ដែលមានប្រជាជនភាគច្រើនកាន់សាសនាអ៊ីស្លាមឡើយ។ ប្រធានាធិបតីតួកគី ធុនទ្រាញ់នឹងការរង់ចាំ និងបានពិគ្រោះយោបល់ជាមួយពលរដ្ឋតាមរយៈប្រជាមតិ ថាគួរតែសុំចរចាចូលអឺរ៉ុបទៀតឬអត់។ សម្រាប់លោក អែរដូហ្កាន អឺរ៉ុបរើសអើង អឺរ៉ុបដែលជាទូទៅជាអ្នកគ្រិស្តសាសនាមិនចង់ទទួលតួកគីជាអ្នកអ៊ីស្លាមទេ។ បើមិនចង់ម្តេចក៏អូសបន្លាយសំណុំរឿងនេះធ្វើអ្វី ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ