តួកគីធានាថានឹងចាត់ការក្រុមអ្នកធ្វើរដ្ឋប្រហារ ដោយគោរពទៅតាមគោលការណ៍នីតិរដ្ឋ
បីថ្ងៃបន្ទាប់ពីមានការប៉ុនប៉ងធ្វើរដ្ឋប្រហារមិនបានសម្រេច នៅតួកគី សហគមអន្តរជាតិ បានសម្តែងការព្រួយបារម្ភជាខ្លាំង អំពីចំណាត់ការរបស់រដ្ឋអំណាចតួកគី ទៅលើក្រុមអ្នកធ្វើរដ្ឋប្រហារ ដែលគេចាប់ខ្លួនបាន។ នៅថ្ងៃចន្ទ ទី១៨កក្កដា លោកនាយករដ្ឋមន្ត្រីតួកគី បានប្រកាសថា រដ្ឋាភិបាលតួកគី ត្រូវតែរកយុត្តិធម៌ជូនអ្នកស្លាប់ ហើយកាត់ទោសក្រុមអ្នកធ្វើរដ្ឋប្រហារ ឲ្យសក្តិ៍សមបំផុត ដោយគោរពទៅតាមគោលការណ៍គ្រិះនៃនីតរដ្ឋ។
ចុះផ្សាយនៅថ្ងៃ៖
លោកនាយករដ្ឋមន្ត្រីតួកគី ប៊ីណាលី យីលឌីរីម បានបញ្ជាក់ថា យុត្តិធម៌ត្រូវតែរកជូនជនរងគ្រោះ ហើយជនល្មើសដែលឃុបឃិតគ្នា ធ្វើរដ្ឋប្រហារ និងត្រូវផ្តន្ទាទោសឲ្យសក្តិ៍សមបំផុត ហើយដោយគោរពទៅតាមក្របខណ្ឌច្បាប់ជាធរមាន។ នេះគឺជាការឆ្លើយតប ទៅនឹងការព្រមានរបស់សហរដ្ឋអាមេរិក ក៏ដូចជាពីសំណាក់ សហភាពអឺរ៉ុប ដែលសំណូមពរឲ្យអជ្ញាធរតួកគី ចាត់វិធានការកាត់ទោសទៅលើក្រុមអ្នកធ្វើរដ្ឋប្រហារ ដោយគោរពទៅតាមច្បាប់នីតិរដ្ឋនោះ។
សហគមអន្តរជាតិទាំងមូល មានការព្រួយបារម្ភខ្លាំង ព្រោះខ្លាចរដ្ឋាភិបាលតួកគី ដឹកនាំដោយលោក អ៊ែក ដូហ្កាន់ ប្រើកណ្តាប់ដៃដែក ធ្វើការចាប់ដាក់គុក រឺប្រហារជីវិត ក្រុមអ្នកធ្វើរដ្ឋប្រហារ ដោយមិនបានឆ្លងកាត់ការកាត់ទោសពីតុលាការ។ យ៉ាងណាមិញ លោកស្រី ម៉ូហ្កឺរីនី ប្រមុខការទូតសហភាពអឺរ៉ុប បានបញ្ជាក់កាលពីថ្ងៃអាទិត្យថា បើតួកគី អនុវត្តទោសប្រហារជីវិតឡើងវិញ គឺតួកគីគ្មានថ្ងៃអាចចូលជាសមាជិកសហភាពអឺរ៉ុប បានជាដាច់ខាត។
សូមរំលឹកថា ក្រោយរដ្ឋប្រហារមិនបានសម្រេច ដែលបានបណ្តាលឲ្យមានអ្នកស្លាប់ ជាង៣០០នាក់នោះ អាជ្ញាធរតួកគី បានចុះចាប់មនុស្សចំនួនប្រមាណជាង ៧៥០០នាក់ ដែលក្នុងនោះមាន៦០៣៨នាក់ ជាទាហាន ៧៥៥នាក់ ជាចៅក្រម និង១០០នាក់ ជាមន្ត្រីនគរបាល។ លោកប្រធានាធិបតីតួកគី បានចាត់ទុកក្រុមប្រឆាំងទាំងអស់ថាជាមេរោគ ហើយបានប្រកាសបោសសម្អាតមេរោគនេះ ឲ្យអស់ពីតួកគី។ កាលពីថ្ងៃចន្ទ ទី១៨ កក្កដា ប្រធានាធិបតី អ៊ែរដូហ្កាន់ បានដាក់បញ្ជារថាត្រូវបាញ់កម្ទេចឧត្តម្ភាគចក្រណា ដែលហោះកាត់ក្រុងអ៊ីស្តង់ប៊ូល ដើម្បីកុំឲ្យមានអ្នករត់គេចចេញទៅក្រៅប្រទេស។
ដោយឡែក ក្រសួងមហាផ្ទៃតួកគី បានលប់ឈ្មោះមន្ត្រីចំនួន៩០០០នាក់ ដែលក្នុងនោះមាននគរបាល ៤៥០០នាក់ និងមន្ត្រីកងអាវុធហត្ថ ៦១៤នាក់។ មិនត្រឹមតែប៉ុណ្ណោះ សកម្មជនប្រឆាំង ក៏ដូចជាក្រុមយោធាដែលជាប់ពាក់ព័ន្ធនឹងរដ្ឋប្រហារ ត្រូវបានរដ្ឋាភិបាលតួកគីចាត់ទុកថា គឺជាក្រុមភេរវកម្មទៀតផង។ ប្រធានាធិបតីតួកគី បានស្រែកក្តែងៗ ទាមទារឲ្យសហរដ្ឋអាមេរិក ធ្វើការប្រគល់ខ្លួនលោក Fetullah Gulen ដែលបច្ចុប្បន្នរស់នៅសហរដ្ឋអាមេរិក ហើយដែលតួកគីចោទថាជាមេគំនិតនៃការធ្វើរដ្ឋប្រហារ។ លោកចន ឃែរី បានថ្លែងថា តួកគី ត្រូវប្រគល់ភស្តុតាងជាមុនសិន មិនមែនត្រឹមតែស្រែកចោទប្រកាន់ទទេៗ ហើយឲ្យគេប្រគល់មនុស្សឲ្យ ដោយគ្មានភស្តុតាងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ