បញ្ហាព្រំដែន៖ លោក ហ៊ុន សែន ព្រមានចាប់ខ្លួនអ្នករិះគន់ជាបន្តបន្ទាប់ទៀត
បញ្ហាព្រំដែនកម្ពុជានៅបន្តជាបច្ចុប្បន្នភាព។ នៅថ្ងៃអាទិត្យទី១៦សីហានេះ លោកនាយករដ្ឋមន្ដ្រី ហ៊ុន សែន បានថ្លែងព្រមានជាចំហរ ថានឹងចាប់ខ្លួនបន្ថែមទៀត រាល់អ្នកទាំងឡាយដែលហ៊ានចេញមុខរិះគន់រដ្ឋាភិបាលក្នុងបញ្ហាព្រំដែន។ ការព្រមានរបស់លោក ហ៊ុន សែន ដូច្នេះ ធ្វើឡើងនាឱកាសលោកអញ្ជើញជាអធិបតីក្នុងពិធីសម្ពោធសួនទឹក ហ្គាដិនស៊ីធី ដែលមានទីតាំងនៅខណ្ឌជ្រោយចង្វារ ជាយក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:២៤
«ចេញមកប៉ុន្មាន ចាប់ប៉ុណ្ណឹង រឿងទល់ដែនអត់ឲ្យមានរញ៉េរញ៉ៃទេ។ កុំថារដ្ឋាភិបាលហ៊ុនសែនផ្ដាច់ការ! នេះមិនមែនជាការតស៊ូមតិទេ អ្នកខ្លះចេញមកថានេះជាការតស៊ូមតិ… អត់តស៊ូមតិទេ នេះជារឿងផ្លូវច្បាប់សុទ្ធសាធ។»
នេះគឺជាសារព្រមានខ្លាំងៗរបស់លោកនាយករដ្ឋមន្ដ្រី ហ៊ុន សែន ថ្លែងទៅកាន់អ្នកទាំងឡាយណាដែលហ៊ានចេញមុខរិះគន់រដ្ឋាភិបាលកម្ពុជាក្នុងសំណុំរឿងព្រំដែន និងបន្ទាប់ពីមានការចាប់ខ្លួនមនុស្សយ៉ាងហោចណាស់ពីរនាក់ ដែលបានរិះគន់បញ្ហាព្រំដែនកម្ពុជា-វៀតណាម ដោយចំពោះការដោះដូរដីជាមួយវៀតណាម ដោយចោទប្រកាន់រដ្ឋាភិបាលខ្មែរថា «ក្បត់ជាតិ»។
ថ្លែងនាថ្ងៃអាទិត្យទី១៦សីហានេះ ប្រមុខរដ្ឋាភិបាលកម្ពុជាបានរំឭកឡើងវិញត្រួសៗអំពីសវតាព្រំដែនរវាងខ្មែរនិងវៀតណាម ដែលត្រូវបានគូសវាសនិងបន្សល់ទុកតាំងពីសម័យអាណានិគមនិយមបារាំងមកម្ល៉េះ។ លោកក៏បានឆ្លៀតឱកាសនេះ ថ្លែងការពារខ្លួនក្នុងសំណុំរឿងផែនទីព្រំដែនរវាងកម្ពុជានិងវៀតណាមដ៏ចម្រូងចម្រាស់ផងដែរ។ ទាំងរឿងបន្ទាត់ បង្គោលព្រំដែន និងរឿងផែនទីលើក្រដាស លោក ហ៊ុន សែន អះអាងថា រដ្ឋាភិបាលបានធ្វើការហ្មត់ចត់ណាស់។
បញ្ហាព្រំដែន មិនមែនជាបញ្ហាលេងសើចទេ។ នេះបើតាមលោក ហ៊ុន សែន។ ហេតុដូច្នេះ លោកបានផ្ដាំកុំឲ្យយកបញ្ហានេះទៅលលេងឬនិយាយញុះញង់ព្រោះវាអាចបណ្ដាលឲ្យកើតសង្គ្រាមរវាងប្រទេសនិងប្រទេសបាន។
គួរជម្រាបជូនថា ការថ្លែងរបស់ប្រមុខរដ្ឋាភិបាលកម្ពុជាស្ដីពីបញ្ហាព្រំដែននាពេលនេះ ធ្វើឡើងបន្ទាប់ពីមានការចាប់ខ្លួនមនុស្សយ៉ាងហោចណាស់ពីររូបទៅឃុំឃាំងនៅពន្ធនាគារព្រៃស ក្រោមការចោទប្រកាន់ពីបទញុះញង់និងបំភ្លៃការពិតក្នុងរឿងព្រំដែន។ អ្នកទាំងពីររូបនោះ រួមមានទីមួយ លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា ត្រូវបានចាប់ខ្លួននាយប់ថ្ងៃទី៣១កក្កដា និងទី២ គឺលោក សួង សុភ័ណ្ឌ ប្រធានគណបក្សខ្មែរឈ្នះ។ ប្រធានគណបក្សនយោបាយរូបនេះ ត្រូវបានចាប់ខ្លួននៅថ្ងៃទី១៤ខែសីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ