លោក ឃាង ភារម្យ៖ ស្ថានភាពជំនន់ទឹកភ្លៀងនៅក្នុងខេត្តព្រះសីហនុនៅតែធ្ងន់ធ្ងរ ប៉ុន្តែអាចគ្រប់គ្រងបាន
ចុះផ្សាយនៅថ្ងៃ៖
ស្តាប់ - ០៨:០៤
គិតត្រឹមល្ងាច ថ្ងៃសៅរិ៍ ទី១៩ កញ្ញា ស្ថានភាពជំនន់ទឹកភ្លៀងនៅក្នុងខេត្តព្រះសីហនុនៅតែធ្ងន់ធ្ងរ ដោយសារតែភ្លៀងនៅតែបន្តធ្លាក់ឥតដាច់នោះឡើយ។ ជំនន់ទឹកភ្លៀង ដែលបង្កឡើងដោយព្យុះទី១១ឈ្មោះ «នូល» បានបណ្តាលអោយឃុំចំនួន១១នៅក្នុងខេត្តព្រះសីហនុរងការលិចលង់ និងបានធ្វើអោយប៉ះពាល់ដល់ប្រជាពលរដ្ឋជិត២ពាន់គ្រួសារ។ ជំនន់ទឹកភ្លៀងនេះ បានបណ្តាលអោយក្មេងស្រីម្នាក់អាយុជាង១ខួបបានស្លាប់បាត់បង់ជីវិត ចំណែកឯផ្លូវមួយចំនួនក៏បានផ្អាកការធ្វើចរាចរណ៍។ ប៉ុន្តែផ្លូវជាតិលេខ៤នៅមិនទាន់ឈានដល់ការប្រកាសអាសន្ន ឬ ឈានទៅបិទចរាចរណ៍នៅឡើយទេ។ លោក ឃាង ភារម្យ អ្នកនាំពាក្យសាលាខេត្តព្រះសីហនុដែលជាភ្ញៀវរបស់វិទ្យុបារាំងអន្តរជាតិនៅថ្ងៃនេះបានថ្លែងថា ស្ថានភាពជំនន់ទឹកភ្លៀងនៅក្នុងខេត្តព្រះសីហនុនៅតែធ្ងន់ធ្ងរ ប៉ុន្តែខេត្តនៅអាចគ្រប់គ្រងបាន។