កូវីដ១៩ បង្ខំឲ្យសមាគមអ្នកនិពន្ធខ្មែរលើកពេលប្រគល់ពានរង្វាន់អក្សរសិល្ប៍ទន្លេមេគង្គដល់ជ័យលាភីនៃប្រទេសក្នុងតំបន់
សមាគមអ្នកនិពន្ធខ្មែរ កាលពីដើមសប្ដាហ៍នេះ បានប្រកាសពីការរកឃើញជ័យលាភី២រូបសម្រាប់ពានរង្វាន់អក្សរសិល្ប៍ទន្លេមេគង្គលើកទី១១។ ពានរង្វាន់អក្សរសិល្ប៍ទន្លេមេគង្គលើកទី១១ នាឆ្នាំ២០២០ ដែលមានកម្ពុជាធ្វើជាម្ចាស់ផ្ទះនេះ រៀបចំឡើងក្រោមប្រធានបទ «ជីវិតនិងនិរន្ដរភាពទន្លេមេគង្គ»។ យ៉ាងណាក៏ដោយ ក្នុងបរិបទកូវីដ១៩ ពិធីប្រគល់ពានរង្វាន់ដែលកម្ពុជាធ្វើជាម្ចាស់ផ្ទះជាលក្ខណៈតំបន់នាឆ្នាំនេះមិនត្រូវបានរៀបចំទេ។ ចំណែកការរៀបចំនៅសម្រាប់ជ័យលាភីនៅក្នុងស្រុកទាំងពីររូបទៀតសោត ក៏មិនទាន់ត្រូវបានកំណត់កាលបរិច្ឆេទដែរ។
ចុះផ្សាយនៅថ្ងៃ៖
ស្តាប់ - ០២:២៩
ជ័យលាភីសម្រាប់ពានរង្វាន់ទន្លេមេគង្គចែកជាពីរទម្រង់ គឺជ័យលាភីផ្នែកកំណាព្យរឿង បានទៅលើកវីនិពន្ធ លឹម ផាន់ណាដែលបានតាក់តែងរឿង «មេគង្គដួងចិត្ត» និងជ័យលាភីផ្នែករឿងខ្លី ធ្លាក់លើដៃអ្នកនិពន្ធ ឡុង លាបសុជាតា ដែលបាននិពន្ធរឿងខ្លី «វារីប្រាថ្នា»។
សូមជម្រាបថា ពានរង្វាន់ទន្លេមេគង្គ គឺជាពានរង្វាន់លក្ខណៈតំបន់ ដោយមានប្រទេសជាសមាជិកចំនួន៦ ក្នុងនោះរួមមានប្រទេសចិន កម្ពុជា ថៃ ឡាវ វៀតណាម និងមីយ៉ាន់ម៉ា។ ក្នុងនោះ ប្រទេសជាសមាជិកនីមួយៗ ត្រូវផ្លាស់វេនគ្នាធ្វើជាម្ចាស់ផ្ទះរៀបចំកម្មវិធីជារៀងរាល់ឆ្នាំ។ សម្រាប់ឆ្នាំ២០២០នេះ កម្ពុជាត្រូវធ្វើជាម្ចាស់ផ្ទះ បន្ទាប់ពីប្រទេសមីយ៉ាន់ម៉ាដែលធ្វើជាម្ចាស់ផ្ទះកាលពីឆ្នាំ២០១៩។ ដោយឡែក សម្រាប់ឆ្នាំ២០២១វិញ ពានរង្វាន់ទន្លេមេគង្គនេះ នឹងផ្លាស់វេនទៅឲ្យប្រទេសឡាវធ្វើជាម្ចាស់ផ្ទះ។
ក្នុងខណៈដែលពិភពលោកនិងកម្ពុជាកំពុងបន្តរងការវាយលុកពីជំងឺកូវីដ១៩ សមាគមអ្នកនិពន្ធខ្មែរដែលទទួលបន្ទុកទទួលរៀបចំពិធីប្រគល់ពានរង្វាន់ បានឲ្យដឹងថា កាលបរិច្ឆេទនៃការប្រគល់ពានរង្វាន់ដល់ជ័យលាភីក្នុងស្រុកមិនទាន់ត្រូវបានកំណត់ទេ។ ម្យ៉ាងដោយសារកូវីដ១៩ និងម្យ៉ាងទៀតដោយសារតែសមាគមកំពុងតែខិតខំស្វែងរកការឧបត្ថម្ភពីក្រុមហ៊ុនពាណិជ្ជកម្មនិងសប្បុរសជននានាដើម្បីរៀបចំពិធីប្រគល់ពានរង្វាន់ដល់ជ័យលាភី។
លោក ព្រឿង ប្រណីត ប្រធានសមាគមអ្នកនិពន្ធខ្មែរ បានគូសបញ្ជាក់ប្រាប់វិទ្យុបារាំងអន្ដរជាតិ RFI នៅថ្ងៃសុក្រទី១៨ធ្នូនេះថា បើទោះបីជាមិនអាចរៀបចំកម្មវិធីប្រគល់ពានរង្វាន់បានតាមការគ្រោងទុក ក៏គណៈកម្មការរៀបចំនឹងប្រគល់ពានរង្វាន់នេះជាប្រយោលដល់តំណាងស្ថានទូតនៃប្រទេសនីមួយៗ ដើម្បីឲ្យប្រទេសនីមួយៗប្រគល់បន្តទៅកាន់ម្ចាស់ជ័យលាភីដោយខ្លួនឯង។
សម្រាប់លោក ព្រឿង ប្រណីត ក្នុងបរិបទកូវីដ១៩ក៏ដោយ ក្នុងកាលៈទេសៈណាក៏ដោយ ពានរង្វាន់ទន្លេមេគង្គនេះ មានអត្ថន័យសំខាន់ខ្លាំងណាស់ ក្នុងការជំរុញឲ្យមាននិរន្ដរភាពទន្លេមេគង្គ តាមរយៈស្នាដៃអក្សរសិល្បិ៍របស់កវីអ្នកនិពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ