ជំរឿនបង្ហាញថាកម្ពុជានឹងមានប្រជាជនវ័យចាស់ច្រើននៅពេលអនាគត
គិតត្រឹមឆ្នាំ២០១៩ កម្ពុជាមានប្រជាជនសរុបជាង ១៥.៥លាននាក់ និងមានអត្រាកំណើនប្រជាជនជាមធ្យមប្រចាំឆ្នាំ១.៤%។ នេះបើយោងតាមរបាយការណ៍ជាតិស្តីពីលទ្ធផលចុងក្រោយជំរឿនទូទៅប្រជាជនកម្ពុជាឆ្នាំ២០១៩ ដែលផ្សាយជាផ្លូវការនៅថ្ងៃទី២៦ ខែមករានេះ។ ទិន្នន័យជំរឿនក៏បង្ហាញថា ទៅថ្ងៃអនាគតកម្ពុជាជាប្រទេសមានប្រជាជនវ័យចាស់ច្រើន។
ចុះផ្សាយនៅថ្ងៃ៖
ស្តាប់ - ០២:១៣
លទ្ធផលជំរឿនទូទៅប្រជាជនកម្ពុជាឆ្នាំ២០១៩ កម្ពុជាមាន ចំនួនប្រជាជនសរុបមាន ១៥.៥លាននាក់ ក្នុងនោះប្រុសចំនួនជាង៧.៥លាននាក់ និងស្រីចំនួន៧.៩លាននាក់។ ប្រៀបធៀបនឹងលទ្ធផលជំរឿន កាលពីឆ្នាំ២០០៨ ចំនួនប្រជាជនបានកើនឡើងចំនួន២.២លាននាក់។
ទិន្នន័យដដែលបង្ហាញថា ខេត្តចំនួន៤ មានប្រជាជនច្រើនជាង ១លាននាក់ គឺរាជធានីភ្នំពេញមានប្រជាជនប្រមាណ២.៣លាននាក់ ខេត្តកណ្តាល ១.២លាននាក់ ខេត្តព្រៃវែង ១.១លាននាក់ និងខេត្តសៀមរាបមានប្រជាជនប្រមាណ១លាននាក់។
បើប្រៀបធៀបជំរឿនក្នុងឆ្នាំ២០១៩ និងឆ្នាំ២០០៨ ប្រជាជនវ័យក្មេង ដែលមានអាយុពី០ឆ្នាំ ទៅ៤ឆ្នាំ មានការធ្លាក់ចុះពី៣៣% ទៅ២៩.៤% ហើយប្រជាជនវ័យកណ្តាល(១៥-៥៩ឆ្នាំ) បានកើនឡើង ពី៦០% ទៅ៦១.៧% និងមនុស្សចាស់ចាប់ពី៦០ឆ្នាំឡើង បានកើនឡើងពី៦.៣% ទៅ៨.៩%។ តួលេខទាំងនេះបង្ហាញថា ប្រជាជនកម្ពុជាកំពុងចាប់ផ្តើមវិវត្តន៍ទៅតាមអាយុ ពោលគឺកម្ពុជាជាប្រទេសមានប្រជាជនវ័យចាស់ច្រើននៅពេលអនាគត។
យោងតាមសេចក្តីប្រកាសព័ត៌មានស្តីពីជំរឿន២០១៩ កត្តាកំណត់សំខាន់នៃវ័យចាស់របស់ប្រជាជន គឺការធ្លាក់ចុះនៃអត្រាលទ្ធភាពបង្កើតកូន និងការធ្លាក់ចុះនៃអត្រាមរណភាព។
គួរជម្រាបជូនថា ជំរឿនប្រជាជនឆ្នាំ២០១៩ ត្រូវបានធ្វើឡើងដោយវិទ្យាស្ថានជាតិស្ថិតនៃក្រសួងផែនការ។ លោក សុក កុសល អគ្គនាយករង វិទ្យាស្ថានជាតិស្ថិតិ បានអះអាងប្រាប់វិទ្យុបារាំងអន្តរជាតិថា ជំរឿនគឺជាប្រភពទិន្នន័យមួយ ដែលមានលក្ខណៈទូលំទូលាយ ដែលជាអាចប្រើសម្រាប់គណនាអថេរផ្សេងៗទៀត ដែលប្រើប្រាស់សម្រាប់រៀបចំគោលនយោបាយ ។ លោកបន្ថែមថា ជំរឿនក៏អាចធ្វើឲ្យមានទិន្នន័យ គ្រប់គ្រាន់ សម្រាប់ការព្យាករណ៍ប្រជាសាស្ត្រនៅពេលខាងមុខ សម្រាប់ការរៀបចំផែនការរយៈពេលវែង រួមនឹងចំណុចសំខាន់ៗច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ