ធនាគារជាតិកម្ពុជា ដាក់ដេញថ្លៃប្រាក់ដុល្លារចំនួន២០លានដុល្លារ ដើម្បីរក្សាស្ថិរភាពអត្រាប្តូរប្រាក់នៅកម្ពុជា
ធនាគារជាតិនៃកម្ពុជានៅព្រឹកថ្ងៃទី០៦ ខែកញ្ញានេះ បានចាប់ផ្តើមដាក់ការដេញថ្លៃប្រាក់ដុល្លារអាមេរិកចំនួន ២០លានដុល្លារ ជាមួយវិស័យធនាគារនានា ដើម្បីជួយរក្សាតុល្យភាពនៃអត្រាប្តូរប្រាក់នៅកម្ពុជា។ ជាការកត់សម្គាល់ ប្រាក់ដុល្លារអាមេរិកនាពេលចុងក្រោយនេះបានឡើងថ្លៃដល់ ៤១០០រៀល ក្នុងមួយដុល្លារ។ លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា តាមរយៈវិទ្យុបារាំងអន្តរជាតិRFI ថា ការដេញថ្លៃប្រាក់ដុល្លារ ក្នុងអំឡុងពេលកូវីដ-១៩នេះ នឹងអាចរក្សាតម្លៃប្រាក់រៀលនៅកម្ពុជាបាន។
ចុះផ្សាយនៅថ្ងៃ៖
ស្តាប់ - ០២:៤០
ធនាគារជាតិនៃកម្ពុជា បានចាប់ផ្តើមដាក់ឲ្យដេញថ្លៃប្រាក់ដុល្លារអាមេរិកចំនួន ២០លានដុល្លារ ជាមួយគ្រឹះស្ថានធនាគារ គ្រឹះស្ថានមីក្រូហិរញ្ញវត្ថុ និងអាជីវកម្មប្តូរប្រាក់ដែលមានអាជ្ញាបណ្ឌទាំងអស់ឱ្យចូលរួមដេញថ្លៃ ដើម្បីជួយរក្សាតុល្យភាពនៃអត្រាប្តូរប្រាក់នៅកម្ពុជា ជៀសវាងការបង្កជាហានិភ័យដល់អតិផរណា។
ហានិភ័យអតិផរណាគឺ សំដៅទៅដល់ការឡើងថ្លៃជាមធ្យមនៃទំនិញ និងសេវាកម្ម ហើយជាបច្ចេកទេស គេអាចបកស្រាយបានថា អតិថិជនមិនអាចបន្តទិញទំនិញ និងសេវាកម្មបានទៀតឡើយ ព្រោះតម្លៃទំនិញ និងសេវាកម្មបានកើនឡើងធៀបទៅនឹងតម្លៃលុយ ដែលនេះធ្វើឱ្យបរិមាណលុយដដែលមិនអាចទិញទំនិញ និងសេវាកម្មទៀតបាន។
យ៉ាងណាមិញ លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានឱ្យដឹងថា ការដេញថ្លៃប្រាក់ដុល្លារ ជាពិសេសក្នុងអំឡុងស្ថានភាពជំងឺកូវីដ-១៩នេះ គឺមានសារៈប្រយោជន៍ណាស់ បើអាស្រ័យទៅតាមគោលនយោបាយរូបិយវត្ថុជាតិ ដែលធនាគារជាតិបានអនុវត្ត។ លោក អ៊ិន ចាន់នី បន្ថែមទៀតថា ការដាក់ដេញថ្លៃបែបនេះ ក៏ជាវិធានការមួយសម្រាប់រក្សាតម្លៃប្រាក់រៀលក្នុងប្រទេសកម្ពុជា និងធ្វើឱ្យប្រាក់រៀលមានតម្លៃ និងស្ថិរភាពល្អ បើប្រៀបធៀបជាមួយរូបិយប័ណ្ឌបរទេសជាពិសេសគឺ ប្រាក់ដុល្លារ។
ទោះបីការដាក់ចេញថ្លៃប្រាក់ដុល្លារនៅពេលនេះ ដើម្បីរក្សាអត្រាប្តូរប្រាក់ និងស្ថិរភាពប្រាក់រៀលនៅកម្ពុជាយ៉ាងណាក្តី លោក អ៊ិន ចាន់នី បានពន្យល់ថា ប្រាក់ដុល្លារក៏នៅតែមានសារៈសំខាន់ដូចគ្នា ក្នុងការទូទាត់ជាលក្ខណៈអន្តរជាតិ។ សំខាន់គឺ នៅក្នុងទីផ្សាររូបិយវត្ថុអន្តរជាតិ ការដែលធនាគារកណ្តាល រឺហៅថា ធនាគាររបស់ជាតិ បានប្រើប្រាស់វិធានការបែបនេះ ច្បាស់ណាស់ វានឹងជំរុញឱ្យប្រាក់រៀលមានតម្លៃហាងឆេងល្អ ហើយប្រាក់ដុល្លារក៏រឹតតែចូលរួមបំពេញមុខងារក្នុងការធ្វើចរាចរណ៍នៅក្នុងទីផ្សារកម្ពុជា ក៏ដូចជាអន្តរជាតិបន្ថែមទៀតផងដែរ។
ជាការកត់សម្គាល់ នៅពេលបច្ចុប្បន្នស្ថានភាពនៃអត្រាប្តូរប្រាក់នៅកម្ពុជា មានសញ្ញាណកើនឡើង ពោលគឺការទិញចូលរបស់ប្រាក់ដុល្លារមានការកើនឡើងក្នុងរង្វង់៤១០០រៀល ក្នុង១ដុល្លារ។ ប៉ុន្តែ ការលក់ចេញរបស់លុយដុល្លារវិញ មានតម្លៃចន្លោះត្រឹមតែ ៤០២៥រៀលប៉ុណ្ណោះ ក្នុង១ដុល្លារ។
ជាការឆ្លើយតបឱ្យទាន់ពេលវេលា និងដើម្បីជៀសវាងការបម្រែបម្រួលដោយគំហុក ដែលអាចនាំអោយមានឥទ្ធិពលដោយប្រយោលដល់អតិផរណាបច្ចុប្បន្ន និងអំណាចទិញរបស់ប្រជាជន ធនាគារជាតិនៃកម្ពុជា ក៏បានកំពុងប្រើប្រាស់ឧបករណ៍នយោបាយរូបិយវត្ថុផ្សេងទៀត ដើម្បីចូលរួមកាត់បន្ថយសម្ពាធនេះជាអតិបរមា ក្រៅតែពីការដេញថ្លៃប្រាក់ដុល្លារ។
សូមជម្រាបថា ធនាគារជាតិនៃកម្ពុជា ក៏ធ្លាប់បានដាក់ការដេញថ្លៃប្រាក់ដុល្លារចំនួន ៥០លានដុល្លារ ផងដែរ កាលពីខែតុលា ឆ្នាំ២០២០ ក្នុងគោលបំណងរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ តាមរយៈការពង្រឹងអំណាចទិញនៃប្រាក់រៀល ដែលនឹងរួមចំណែករក្សាស្ថិរភាពថ្លៃឲ្យនៅកម្រិតទាប និងពង្រឹងស្ថិរភាពម៉ាក្រូសេដ្ឋកិច្ច ក្រោយរងផលប៉ះពាល់ដោយសារវិបត្តិកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ